आत्मा स्कन्धा यदि भवेद् उदयव्ययभाग् भवेत् । (१।१)

स्कन्धेभ्यो ऽन्यो यदि भवेद् भवेद् अस्कन्धलक्षणः ॥ (१।२)

आत्मन्यसति चात्मीयं कुत एव भविष्यति । (२।१)

निर्ममो निरहंकारः शमाद् आत्मात्मनीनयोः ॥ (२।२)

निर्ममो निरहंकारो यश्च सो ऽपि न विद्यते । (३।१)

निर्ममं निरहंकारं यः पश्यति न पश्यति ॥ (३।२)

ममेत्यहम् इति क्षीणे बहिर्धाध्यात्मम् एव च । (४।१)

निरुध्यत उपादानं तत्क्षयाज्जन्मनः क्षयः ॥ (४।२)

कर्मक्लेशक्षयान्मोक्षः कर्मक्लेशा विकल्पतः । (५।१)

ते प्रपञ्चात् प्रपञ्चस्तु शून्यतायां निरुध्यते ॥ (५।२)

आत्मेत्यपि प्रज्ञपितम् अनात्मेत्यपि देशितम् । (६।१)

बुद्धैर् नात्मा न चानात्मा कश्चिद् इत्यपि देशितम् ॥ (६।२)

निवृत्तम् अभिधातव्यं निवृत्तश्चित्तगोचरः । (७।१)

अनुत्पन्नानिरुद्धा हि निर्वाणम् इव धर्मता ॥ (७।२)

सर्वं तथ्यं न वा तथ्यं तथ्यं चातथ्यम् एव च । (८।१)

नैवातथ्यं नैव तथ्यम् एतद् बुद्धानुशासनम् ॥ (८।२)

अपरप्रत्ययं शान्तं प्रपञ्चैर् अप्रपञ्चितम् । (९।१)

निर्विकल्पम् अनानार्थम् एतत् तत्त्वस्य लक्षणम् ॥ (९।२)

प्रतीत्य यद् यद् भवति न हि तावत् तद् एव तत् । (१०।१)

न चान्यदपि तत्तस्मान्नोच्छिन्नं नापि शाश्वतम् ॥ (१०।२)

अनेकार्थम् अनानार्थम् अनुच्छेदम् अशाश्वतम् । (११।१)

एतत् तल् लोकनाथानां बुद्धानां शासनामृतम् ॥ (११।२)

संबुद्धानाम् अनुत्पादे श्रावकाणां पुनः क्षये । (१२।१)

ज्ञानं प्रत्येकबुद्धानाम् असंसर्गात् प्रवर्तते ॥ (१२।२)