दुःस्वप्नं यदि पश्येत् तु वान्ते तु क्षुरकर्मणि । (१।१)

मैथुने प्रेतधूमे च स्नानम् एव विधीयते ॥ (१।२)

अज्ञानात् प्राश्य विण्मूत्रं सुरासंस्पृष्टम् एव च । (२।१)

पुनः संस्कारम् अर्हन्ति त्रयो वर्णा द्विजातयः ॥ (२।२)

अजिनं मेखला दण्डो भैक्ष्यचर्या व्रतानि च । (३।१)

निवर्तन्ते द्विजातीनां पुनः संस्कारकर्मणि ॥ (३।२)

विण्मूत्रभोजी शुद्ध्यर्थं प्राजापत्यं समाचरेत् । (४।१)

पञ्चगव्यं च कुर्वीत स्नात्वा पीत्वा शुचिर् भवेत् ॥ (४।२)

जलाग्निपतने चैव प्रव्रज्यानाशकेषु च । (५।१)

प्रत्यवसितवर्णानां कथं शुद्धिर् विधीयते ॥ (५।२)

प्राजापत्यद्वयेनैव तीर्थाभिगमनेन च । (६।१)

वृषैकादशदानेन वर्णाः शुध्यन्ति ते त्रयः ॥ (६।२)

ब्राह्मणस्य प्रवक्ष्यामि वनं गत्वा चतुष्पथे । (७।१)

सशिखं वपनं कृत्वा प्राजापत्यद्वयं चरेत् ॥ (७।२)

गोद्वयं दक्षिणां दद्याच्छुद्धिं स्वायंभुवो ऽब्रवीत् । (८।१)

मुच्यते तेन पापेन ब्राह्मणत्वं च गच्छति ॥ (८।२)

स्नानानि पञ्च पुण्यानि कीर्तितानि मनीषिभिः । (९।१)

आग्नेयं वारुणं ब्राह्मं वायव्यं दिव्यम् एव च ॥ (९।२)

आग्नेयं भस्मना स्नानम् अवगाह्य तु वारुणम् । (१०।१)

आपोहिष्ठेति च ब्राह्मं वायव्यं गोरजः स्मृतम् ॥ (१०।२)

यत् तु सातपवर्षेण तत् स्नानं दिव्यम् उच्यते । (११।१)

तत्र स्नात्वा तु गङ्गायां स्नातो भवति मानवः ॥ (११।२)

स्नातुं यान्तं द्विजं सर्वे देवाः पितृगणैः सह । (१२।१)

वायुभूतास् तु गच्छन्ति तृषार्ताः सलिलार्थिनः ॥ (१२।२)

निराशास् ते निवर्तन्ते वस्त्रनिष्पीडने कृते । (१३।१)

तस्मान् न पीडयेद् वस्त्रं अकृत्वा पितृतर्पणम् ॥ (१३।२)

रोमकूपेष्व् अवस्थाप्य यस् तिलैस् तर्पयेत् पितॄन् । (१४।१)

पितरस् तर्पितास् तेन रुधिरेण मलेन च ॥ (१४।२)

अवधूनोति यः केशान् स्नात्वा यस् तूत्सृजेन् मलम् । (१५।१)

आचामेद् वा जलस्थे ऽपि स बाह्यः पितृदैवतैः ॥ (१५।२)

शिरः प्रावृत्त्य कण्ठं वा मुक्तकच्छशिखो ऽपि वा । (१६।१)

विना यज्ञोपवीतेन आचान्तो ऽप्य् अशुचिर् भवेत् ॥ (१६।२)

जले स्थलस्थो नाचामेज् जलस्थश् च बहिःस्थले । (१७।१)

उभे स्पृष्ट्वा समाचान्त उभयत्र शुचिर् भवेत् ॥ (१७।२)

स्नात्वा पीत्वा क्षुते सुप्ते भुक्त्वा रथ्योपसर्पणे । (१८।१)

आचान्तः पुनर् आचामेद् वासो विपरिधाय च ॥ (१८।२)

क्षुते निष्ठीवने चैव दन्तोच्छिष्टे तथानृते । (१९।१)

पतितानां च संभाषे दक्षिणं श्रवणं स्पृशेत् ॥ (१९।२)

प्रभासादीनि तीर्थानि गङ्गाद्याः सरितस् तथा । (२०।१)

विप्रस्य दक्षिणे कर्णे सन्तीति मनुर् अब्रवीत् ॥ (२०।२)

अग्निर् आपश् च वेदाश् च सोमसूर्यानिलास् तथा । (२१।१)

सर्व एव तु विप्रस्य श्रोत्रे तिष्ठन्ति दक्षिणे ॥ (२१।२)

भास्करस्य करैः पूतं दिवा स्नानं प्रशस्यते । (२२।१)

अप्रशस्तं निशि स्नानं राहोर् अन्यत्र दर्शनात् ॥ (२२।२)

स्नानं दानं जपो होमः कर्तव्यो राहुदर्शने । (२३।१)

अन्यदा त्व् अशुची रात्रिस् तस्मात् तां परिवर्जयेत् ॥ (२३।२)

मरुतो वसवो रुद्रा आदित्याश् चैव देवताः । (२४।१)

सर्वे सोमे प्रलीयन्ते तस्माद् दानं तु तद्ग्रहे ॥ (२४।२)

खलयज्ञे विवाहे च संक्रान्तौ ग्रहणे तथा । (२५।१)

शर्वर्यां दानम् अस्त्य् एव नान्यत्रैव विधीयते ॥ (२५।२)

पुत्रजन्मनि यज्ञे च तथा चात्ययकर्मणि । (२६।१)

राहोश् च दर्शने दानं प्रशस्तं नान्यदा निशि ॥ (२६।२)

महानिशा तु विज्ञेया मध्यस्थं प्रहरद्वयम् । (२७।१)

प्रदोषपश्चिमौ यामौ दिनवत् स्नानम् आचरेत् ॥ (२७।२)

चैत्यवृक्षश् चितिर् यूपश् चण्डालः सोमविक्रयी । (२८।१)

एतांस् तु ब्राह्मणः स्पृष्ट्वा सवासा जलम् आविशेत् ॥ (२८।२)

अस्थिसंचयनात् पूर्वं रुदित्वा स्नानम् आचरेत् । (२९।१)

अन्तर्दशाहे विप्रस्य ह्य् ऊर्ध्वम् आचमनं भवेत् ॥ (२९।२)

सर्वं गङ्गासमं तोयं राहुग्रस्ते दिवाकरे । (३०।१)

सोमग्रहे तथैवोक्तं स्नानदानादिकर्मसु ॥ (३०।२)

कुशैः पूतं तु यत् स्नानं कुशेनोपस्पृशेद् द्विजः । (३१।१)

कुशेन चोद्धृतं तोयं सोमपानसमं भवेत् ॥ (३१।२)

अग्निकार्यात् परिभ्रष्टाः संध्योपासनवर्जिताः । (३२।१)

वेदं चैवानधीयानाः सर्वे ते वृषलाः स्मृताः ॥ (३२।२)

तस्माद् वृषलभीतेन ब्राह्मणेन विशेषतः । (३३।१)

अध्येतव्यो ऽप्य् एकदेशो यदि सर्वं न शक्यते ॥ (३३।२)

शूद्रान्नरसपुष्टस्याप्य् अधीयानस्य नित्यशः । (३४।१)

जपतो जुह्वतो वापि गतिर् ऊर्ध्वा न विद्यते ॥ (३४।२)

शूद्रान्नं शूद्रसंपर्कः शूद्रेण तु सहासनम् । (३५।१)

शूद्राज् ज्ञानागमश् चैव ज्वलन्तम् अपि पातयेत् ॥ (३५।२)

यः शूद्र्या पाचयेन् नित्यं शूद्री च गृहमेधिनी । (३६।१)

वर्जितः पितृदेवेभ्यो रौरवं याति स द्विजः ॥ (३६।२)

मृतसूतकपुष्टाङ्गो द्विजः शूद्रान्नभोजनः । (३७।१)

अहं तन् न विजानामि कां कां योनिं गमिष्यति ॥ (३७।२)

गृध्रो द्वादशजन्मानि दशजन्मानि सूकरः । (३८।१)

श्वयोनौ सप्तजन्मा स्याद् इत्य् एवं मनुर् अब्रवीत् ॥ (३८।२)

दक्षिणार्थम् तु यो विप्रः शूद्रस्य जुहुयाद्धविः । (३९।१)

ब्राह्मणस् तु भवेच्छूद्रः शूद्रस् तु ब्राह्मणो भवेत् ॥ (३९।२)

मौनव्रतं समाश्रित्य आसीनो न वदेद् द्विजः । (४०।१)

भुञ्जानो हि वदेद् यस् तु तद् अन्नं परिवर्जयेत् ॥ (४०।२)

ब्रह्महत्यादिभिर् मर्त्यो मनोवाक्कायकर्मजैः । (५०।१)

एतद् गोचर्मदानेन मुच्यते सर्वकिल्बिषैः ॥ (५०।२)

कुटुम्बिने दरिद्राय श्रोत्रियाय विशेषतः । (५१।१)

यद् दानं दीयते तस्मै तद् दानं शुभकारकम् ॥ (५१।२)

वापीकूपतडागाद्यैर् वाजपेयशतैर् मुखैः । (५२।१)

गवां कोटिप्रदानेन भूमिहर्ता न शुध्यति ॥ (५२।२)

अष्टादशदिनाद् अर्वाक् स्नानम् एव रजस्वला । (५३।१)

अत ऊर्ध्वं त्रिरात्रं स्याद् उशना मुनिर् अब्रवीत् ॥ (५३।२)

युगं युगद्वयं चैव त्रियुगं च चतुर्युगम् । (५४।१)

चाण्डालसूतिकोदक्यापतितानाम् अधः क्रमात् ॥ (५४।२)

ततः संनिधिमात्रेण सचैलं स्नानम् आचरेत् । (५५।१)

स्नात्वावलोकयेत् सूर्यम् अज्ञानात् स्पृशते यदि ॥ (५५।२)

विद्यमानेषु हस्तेषु ब्राह्मणो ज्ञानदुर्बलः । (५६।१)

तोयं पिबति वक्त्रेण श्वयोनौ जायते ध्रुवम् ॥ (५६।२)

यस् तु क्रुद्धः पुमान् ब्रूयाज् जायायास् तु अगम्यताम् । (५७।१)

पुनर् इच्छति चेद् एनां विप्रमध्ये तु श्रावयेत् ॥ (५७।२)

श्रान्तः क्रुद्धस् तमोऽन्धो वा क्षुत्पिपासाभयार्दितः । (५८।१)

दानं पुण्यम् अकृत्वा तु प्रायश्चित्तं दिनत्रयम् ॥ (५८।२)

उपस्पृशेत् त्रिषवणं महानद्युपसंगमे । (५९।१)

चीर्णान्ते चैव गां दद्याद् ब्राह्मणान् भोजयेद् दश ॥ (५९।२)

दुराचारस्य विप्रस्य निषिद्धाचरणस्य च । (६०।१)

अन्नं भुक्त्वा द्विजः कुर्याद् दिनम् एकम् अभोजनम् ॥ (६०।२)

सदाचारस्य विप्रस्य तथा वेदान्तवेदिनः । (६१।१)

भुक्त्वान्नं मुच्यते पापाद् अहोरात्रान्तरान् नरः ॥ (६१।२)

ऊर्ध्वोच्छिष्टम् अधोच्छिष्टम् अन्तरिक्षम् ऋतौ तथा । (६२।१)

कृच्छ्रत्रयं प्रकुर्वीत अशौचमरणे तथा ॥ (६२।२)

कृच्छ्रं देव्य् अयुतं चैव प्राणायामशतद्वयम् । (६३।१)

पुण्यतीर्थे ऽनार्द्रशिरः स्नानं द्वादशसंख्यया ॥ (६३।२)

द्वियोजने तीर्थयात्रा कृच्छ्रम् एकं प्रकल्पितम् । (६४।१)

गृहस्थः कामतः कुर्याद् रेतसः स्खलनं भुवि ॥ (६४।२)

सहस्रं तु जपेद् देव्याः प्राणायामैस् त्रिभिः सह । (६५।१)

चतुर्विद्योपपन्नस् तु विधिवद् ब्रह्मघातके ॥ (६५।२)

समुद्रसेतुगमनं प्रायश्चित्तं विनिर्दिशेत् । (६६।१)

सेतुबन्धपथे भिक्षां चातुर्वर्ण्यात् समाचरेत् ॥ (६६।२)

वर्जयित्वा विकर्मस्थांश् छत्रोपानद्विवर्जितः । (६७।१)

अहं दुष्कृतकर्मा वै महापातककारकः ॥ (६७।२)

गृहद्वारेषु तिष्ठामि भिक्षार्थी ब्रह्मघातकः । (६८।१)

गोकुलेषु वसेच् चैव ग्रामेषु नगरेषु वा ॥ (६८।२)

तपोवनेषु तीर्थेषु नदीप्रस्रवणेषु वा । (६९।१)

एतेषु ख्यापयन्न् एनः पुण्यं गत्वा तु सागरम् ॥ (६९।२)

दशयोजनविस्तीर्णं शतयोजनम् आयतम् । (७०।१)

रामचन्द्रसमादिष्टनलसंचयसंचितम् ॥ (७०।२)

सेतुं दृष्ट्वा समुद्रस्य ब्रह्महत्यां व्यपोहति । (७१।१)

सेतुं दृष्ट्वा विशुद्धात्मा त्ववगाहेत सागरम् ॥ (७१।२)

यजेत वाश्वमेधेन राजा तु पृथिवीपतिः । (७२।१)

पुनः प्रत्यागते वेश्म वासार्थम् उपसर्पति ॥ (७२।२)

सपुत्रः सह भृत्यैश् च कुर्याद् ब्राह्मणभोजनम् । (७३।१)

गाश् चैवैकशतं दद्याच्चतुर्विध्येषु दक्षिणाम् ॥ (७३।२)

ब्राह्मणानां प्रसादेन ब्रह्महा तु विमुच्यते । (७४।१)

सवनस्थां स्त्रियं हत्वा ब्रह्महत्याव्रतं चरेत् ॥ (७४।२)

मद्यपश् च द्विजः कुर्यान् नदीं गत्वा समुद्रगाम् । (७५।१)

चान्द्रायणे ततश् चीर्णे कुर्याद् ब्राह्मणभोजनम् ॥ (७५।२)

अनडुत्सहितां गां च दद्याद् विप्रेषु दक्षिणाम् । (७६।१)

सुरापानं सकृत् कृत्वा अग्निवर्णं सुरां पिबेत् ॥ (७६।२)

स पावयेद् अथात्मानम् इहलोके परत्र च । (७७।१)

अपहृत्य सुवर्णं तु ब्राह्मणस्य ततः स्वयम् ॥ (७७।२)

गच्छेन् मुसलम् आदाय राजाभ्याशं वधाय तु । (७८।१)

ततः शुद्धिम् अवाप्नोति राज्ञासौ मुक्त एव च ॥ (७८।२)

कामतस् तु कृतं यत् स्यान् नान्यथा वधम् अर्हति । (७९।१)

आसनाच्छयनाद् यानात् संभाषात् सहभोजनात् ॥ (७९।२)

संक्रामन्ति हि पापानि तैलबिन्दुर् इवाम्भसि । (८०।१)

चान्द्रायणं यावकं तु तुलापुरुष एव च ॥ (८०।२)

गवां चैवानुगमनं सर्वपापप्रणाशनम् । (८१।१)

एतत् पाराशरं शास्त्रं श्लोकानां शतपञ्चकं । (८१।२)

द्विनवत्या समायुक्तं धर्मशास्त्रस्य संग्रहः ॥ (८१।३)

यथाध्ययनकर्माणि धर्मशास्त्रम् इदं तथा । (८२।१)

अध्येतव्यं प्रयत्नेन नियतं स्वर्गगामिना ॥ (८२।२)