अतिमानाद् अतिक्रोधात् स्नेहाद् वा यदि वा भयात् । (१।१)

उद्बध्नीयात् स्त्री पुमान् वा गतिर् एषा विधीयते ॥ (१।२)

पूयशोणितसम्पूर्णे त्व् अन्धे तमसि मज्जति । (२।१)

षष्ठीर् वर्षसहस्राणि नरकं प्रतिपद्यते ॥ (२।२)

नाशौचं नोदकं नाग्निं नाश्रुपातं च कारयेत् । (३।१)

वोढारो ऽग्निप्रदातारः पाशच्छेदकरास् तथा ॥ (३।२)

तप्तकृच्छ्रेण शुध्यन्तीत्य् एवम् आह प्रजापतिः । (४।१)

गोभिर् हतं तथोद्बद्धं ब्राह्मणेन तु घातितम् ॥ (४।२)

संस्पृशन्ति तु ये विप्रा वोढारश् चाग्निदाश् च ये । (५।१)

अन्ये ये वानुगन्तारः पाशच्छेदकराश् च ये ॥ (५।२)

तप्तकृच्छ्रेण शुद्धास् ते कुर्युर् ब्राह्मणभोजनम् । (६।१)

अनडुत्सहितां गां च दद्युर् विप्राय दक्षिणाम् ॥ (६।२)

त्र्यहम् उष्णं पिबेद् वारि त्र्यहम् उष्णं पयः पिबेत् । (७।१)

त्र्यहम् उष्णं पिबेत् सर्पिर् वायुभक्षो दिनत्रयम् ॥ (७।२)

षट्पलं तु पिबेद् अम्भस् त्रिपलं तु पयः पिबेत् । (८।१)

पलम् एकं पिबेत् सर्पिस् तप्तकृच्छ्रं विधीयते ॥ (८।२)

यो वै समाचरेद् विप्रः पतितादिष्व् अकामतः । (९।१)

पञ्चाहं वा दशाहं वा द्वादशाहम् अथापि वा ॥ (९।२)

मासार्धं मासम् एकं वा मासद्वयम् अथापि वा । (१०।१)

अब्दार्धम् अब्दम् एकं वा तदूर्ध्वं चैव तत्समः ॥ (१०।२)

त्रिरात्रं प्रथमे पक्षे द्वितीये कृच्छ्रम् आचरेत् । (११।१)

तृतीये चैव पक्षे तु कृच्छ्रं सांतपनं चरेत् ॥ (११।२)

चतुर्थे दशरात्रं स्यात् पराकः पञ्चमे मतः । (१२।१)

कुर्याच्चान्द्रायणं षष्ठे सप्तमे त्व् ऐन्दवद्वयम् ॥ (१२।२)

शुद्ध्यर्थम् अष्टमे चैव षण् मासान् कृच्छ्रम् आचरेत् । (१३।१)

पक्षसंख्याप्रमाणेन सुवर्णान्य् अपि दक्षिणा ॥ (१३।२)

ऋतुस्नाता तु या नारी भर्तारं नोपसर्पति । (१४।१)

सा मृता नरकं याति विधवा च पुनः पुनः ॥ (१४।२)

ऋतुस्नातां तु यो भार्यां संनिधौ नोपगच्छति । (१५।१)

घोरायां भ्रूणहत्यायां युज्यते नात्र संशयः ॥ (१५।२)

दरिद्रं व्याधितं मूर्खं भर्तारं यावमन्यते । (१६।१)

सा शुनी जायते मृत्वा सूकरी च पुनः पुनः ॥ (१६।२)

पत्यौ जीवति या नारी उपोष्य व्रतम् आचरेत् । (१७।१)

आयुष्यं हरते भर्तुः सा नारी नरकं व्रजेत् ॥ (१७।२)

अपृष्ट्वा चैव भर्तारं या नारी कुरुते व्रतम् । (१८।१)

सर्वं तद् राक्षसान् गच्छेद् इत्य् एवं मनुर् अब्रवीत् ॥ (१८।२)

बान्धवानां सजातीनां दुर्वृत्तं कुरुते तु या । (१९।१)

गर्भपातं च या कुर्यान् न तां संभाषयेत् क्वचित् ॥ (१९।२)

यत् पापं ब्रह्महत्यायां द्विगुणं गर्भपातने । (२०।१)

प्रायश्चित्तं न तस्याः स्यात् तस्यास् त्यागो विधीयते ॥ (२०।२)

न कार्यम् आवसथ्येन नाग्निहोत्रेण वा पुनः । (२१।१)

स भवेत् कर्मचाण्डालो यस् तु धर्मपराङ्मुखः ॥ (२१।२)

ओघवाताहृतं बीजं यस्य क्षेत्रे प्ररोहति । (२२।१)

स क्षेत्री लभते बीजं न बीजी भागम् अर्हति ॥ (२२।२)

तद्वत् परस्त्रियाः पुत्रौ द्वौ स्मृतौ कुण्डगोलकौ । (२३।१)

पत्यौ जीवति कुण्डः स्यात् मृते भर्तरि गोलकः ॥ (२३।२)

औरसः क्षेत्रजश् चैव दत्तः कृत्रिमकः सुतः । (२४।१)

दद्यान् माता पिता वापि स पुत्रो दत्तको भवेत् ॥ (२४।२)

परिवित्तिः परिवेत्ता यया च परिविद्यते । (२५।१)

सर्वे ते नरकं यान्ति दातृयाजकपञ्चमाः ॥ (२५।२)

द्वौ कृच्छ्रौ परिवित्तेस् तु कन्यायाः कृच्छ्र एव च । (२६।१)

कृच्छ्रातिकृच्छ्रौ दातुस् तु होता चान्द्रायणं चरेत् ॥ (२६।२)

कुब्जवामनषण्ढेषु गद्गदेषु जडेषु च । (२७।१)

जात्यन्धे बधिरे मूके न दोषः परिवेदने ॥ (२७।२)

पितृव्यपुत्रः सापत्नः परनारीसुतस् तथा । (२८।१)

दाराग्निहोत्रसंयोगे न दोषः परिवेदने ॥ (२८।२)

ज्येष्ठो भ्राता यदा तिष्ठेद् आधानं नैव कारयेत् । (२९।१)

अनुज्ञातस् तु कुर्वीत शङ्खस्य वचनं यथा ॥ (२९।२)

नष्टे मृते प्रव्रजिते क्लीबे च पतिते पतौ । (३०।१)

पञ्चस्व् आपत्सु नारीणां पतिर् अन्यो विधीयते ॥ (३०।२)

मृते भर्तरि या नारी ब्रह्मचर्यव्रते स्थिता । (३१।१)

सा मृता लभते स्वर्गं यथा ते ब्रह्मचारिणः ॥ (३१।२)

तिस्रः कोट्यो ऽर्धकोटी च यानि रोमाणि मानुषे । (३२।१)

तावत्कालं वसेत् स्वर्गे भर्तारं यानुगच्छति ॥ (३२।२)

व्यालग्राही यथा व्यालं बलाद् उद्धरते बिलात् । (३३।१)

एवं स्त्री पतिम् उद्धृत्य तेनैव सह मोदते ॥ (३३।२)