अथातो द्रव्यशुद्धिस् तु पराशरवचो यथा । (१।१)

दारवाणां पात्राणां तक्षणाच्छुद्धिर् इष्यते ॥ (१।२)

भस्मना शुध्यते कांस्यं ताम्रमम्लेन शुध्यति । (२।१)

रजसा शुध्यते नारी विकलं या न गच्छति ॥ (२।२)

नदी वेगेन शुध्येत लोपो यदि न दृश्यते । (३।१)

वापीकूपतडागेषु दूषितेषु कथंचन ॥ (३।२)

उद्धृत्य वै घटशतं पञ्चगव्येन शुध्यति । (४।१)

अष्टवर्षा भवेद् गौरी नववर्षा तु रोहिणी ॥ (४।२)

दशवर्षा भवेत् कन्या अत ऊर्ध्वं रजस्वला । (५।१)

प्राप्ते तु द्वादशे वर्षे यः कन्यां न प्रयच्छति ॥ (५।२)

मासि मासि रजस् तस्याः पिबन्ति पितरः स्वयम् । (६।१)

माता चैव पिता चैव ज्येष्ठो भ्राता तथैव च ॥ (६।२)

त्रयस् ते नरकं यान्ति दृष्ट्वा कन्यां रजस्वलाम् । (७।१)

यस् तां समुद्वहेत् कन्यां ब्राह्मणो मदमोहितः ॥ (७।२)

असंभाष्यो ह्य् अपाङ्क्तेयः स विप्रो वृषलीपतिः । (८।१)

यः करोत्य् एकरात्रेण वृषलीसेवनं द्विजः ॥ (८।२)

स भैक्षभुज् जपन् नित्यं त्रिभिर् वर्षैर् विशुध्यति । (९।१)

अस्तं गते यदा सूर्ये चण्डालं पतितं स्त्रियम् ॥ (९।२)

सूतिकां स्पृशतश् चैव कथं शुद्धिर् विधीयते । (१०।१)

जातवेदःसुवर्णं च सोममार्गं विलोक्य च ॥ (१०।२)

ब्राह्मणानुमतश् चैव स्नानं कृत्वा विशुध्यति । (११।१)

स्पृष्ट्वा रजस्वलान्योन्यं ब्राह्मणी ब्राह्मणी तथा ॥ (११।२)

तावत् तिष्ठेन् निराहारा त्रिरात्रेणैव शुध्यति । (१२।१)

स्पृष्ट्वा रजस्वलान्योन्यं ब्राह्मणी क्षत्रिया तथा ॥ (१२।२)

अर्धकृच्छ्रं चरेत् पूर्वा पादम् एकम् अनन्तरा । (१३।१)

स्पृष्ट्वा रजस्वलान्योन्यं ब्राह्मणी वैश्यजा तथा ॥ (१३।२)

पादहीनं चरेत् पूर्वा पादम् एकम् अनन्तरा । (१४।१)

स्पृष्ट्वा रजस्वलान्योन्यं ब्राह्मणी शूद्रजा तथा ॥ (१४।२)

कृच्छ्रेण शुध्यते पूर्वा शूद्रा दानेन शुध्यति । (१५।१)

स्नाता रजस्वला या तु चतुर्थे ऽहनि शुध्यति ॥ (१५।२)

कुर्याद् रजो निवृत्तौ तु दैवपित्र्यादि कर्म च । (१६।१)

रोगेण यद् रजः स्त्रीणाम् अन्वहं तु प्रवर्तते ॥ (१६।२)

नाशुचिः सा ततस् तेन तत् स्याद् वैकालिकं मतम् । (१७।१)

साध्वाचारा न तावत् स्याद् रजो यावत् प्रवर्तते ॥ (१७।२)

रजोनिवृत्तौ गम्या स्त्री गृहकर्मणि चैव हि । (१८।१)

प्रथमे ऽहनि चण्डाली द्वितीये ब्रह्मघातिनी ॥ (१८।२)

तृतीये रजकी प्रोक्ता चतुर्थे ऽहनि शुध्यति । (१९।१)

आतुरे स्नानोत्पन्ने दशकृत्वो ह्य् अनातुरः ॥ (१९।२)

स्नात्वा स्नात्वा स्पृशेद् एनं ततः शुध्येत् स आतुरः । (२०।१)

उच्छिष्टोच्छिष्टसंस्पृष्टः शुना शूद्रेण वा द्विजः ॥ (२०।२)

उपोष्य रजनीम् एकां पञ्चगव्येन शुध्यति । (२१।१)

अनुच्छिष्टेन शूद्रेण स्पर्शे स्नानं विधीयते ॥ (२१।२)

तेनोच्छिष्टेन संस्पृष्टः प्राजापत्यं समाचरेत् । (२२।१)

भस्मना शुध्यते कांस्यं सुरया यन् न लिप्यते ॥ (२२।२)

सुरामात्रेण संस्पृष्टं शुध्यते ऽग्न्युपलेखनैः । (२३।१)

गवाघ्रातानि कांस्यानि श्वकाकोपहतानि च ॥ (२३।२)

शुध्यन्ति दशभिः क्षारैः शूद्रोच्छिष्टानि यानि च । (२४।१)

गण्डूषं पादशौचं च कृत्वा वै कांस्यभाजने ॥ (२४।२)

षण्मासान् भुवि निःक्षिप्य उद्धृत्य पुनर् आहरेत् । (२५।१)

आयसेष्व् आयसानां च सीसस्याग्नौ विशोधनम् ॥ (२५।२)

दन्तम् अस्थि तथा भृङ्गं रूप्यं सौवर्णभाजनम् । (२६।१)

मणिपाषाणपात्राणीत्य् एतान् प्रक्षालयेज् जलैः ॥ (२६।२)

पाषाणे तु पुनर् घर्षः शुद्धिर् एवम् उदाहृता । (२७।१)

मृण्मये दहनाच्छुद्धिर् धान्यानां मार्जनाद् अपि ॥ (२७।२)

वेणुवल्कलचीराणां क्षौमकार्पासवाससाम् । (२८।१)

और्णनेत्रपटानां च प्रोक्षणाच्छुद्धिर् इष्यते ॥ (२८।२)

मुञ्जोपस्करशूर्पाणां शणस्य फलचर्मणाम् । (२९।१)

तृणकाष्ठस्य रज्जूणाम् उदकाभ्युक्षणं मतम् ॥ (२९।२)

तूलिकाद्युपधानानि रक्तवस्त्रादिकानि च । (३०।१)

शोषयित्वातपेनैव प्रोक्षणाच्छुद्धिताम् इयुः ॥ (३०।२)

मार्जारमक्षिकाकीटपतङ्गकृमिदर्दुराः । (३१।१)

मेध्यामेध्यं स्पृशन्तो ऽपि नोच्छिष्टं मनुर् अब्रवीत् ॥ (३१।२)

महीं स्पृष्ट्वागतं तोयं याश् चाप्य् अन्योन्यविप्रुषः । (३२।१)

भुक्तोच्छिष्टं तथा स्नेहं नोच्छिष्टं मनुर् अब्रवीत् ॥ (३२।२)

ताम्बूलेक्षुफले चैव भुक्तस्नेहानुलेपने । (३३।१)

मधुपर्के च सोमे च नोच्छिष्टं धर्मतो विदुः ॥ (३३।२)

रथ्याकर्दमतोयानि नावः पन्थास् तृणानि च । (३४।१)

मारुतार्केण शुध्यन्ति पक्वेष्टकचितानि च ॥ (३४।२)

अदुष्टा संतता धारा वातोद्धूताश् च रेणवः । (३५।१)

स्त्रियो वृद्धाश् च बालाश् च न दुष्यन्ति कदाचन ॥ (३५।२)

देशभङ्गे प्रवासे वा व्याधिषु व्यसनेष्व् अपि । (३६।१)

रक्षेद् एव स्वदेहादि पश्चाद् धर्मं समाचरेत् ॥ (३६।२)

येन केन च धर्मेण मृदुना दारुणेन वा । (३७।१)

उद्धरेद् दीनम् आत्मानं समर्थो धर्मम् आचरेत् ॥ (३७।२)

आपत्काले तु निस्तीर्णे शौचाचारं तु चिन्तयेत् । (३८।१)

शुद्धिं समुद्धरेत् पश्चात् स्वस्थो धर्मं समाचरेत् ॥ (३८।२)