अतः परं गृहस्थस्य कर्माचारं कलौ युगे । (१।१)

धर्मं साधारणं शक्त्या चातुर्वर्ण्याश्रमागतम् ॥ (१।२)

तं प्रवक्ष्याम्य् अहं पूर्वं पराशरवचो यथा । (२।१)

षट्कर्मसहितो विप्रः कृषिकर्म च कारयेत् ॥ (२।२)

क्षुधितं तृषितं श्रान्तं बलीवर्दं न योजयेत् । (३।१)

हीनाङ्गं व्याधितं क्लीबं वृषं विप्रो न वाहयेत् ॥ (३।२)

स्थिराङ्गं नीरुजं तृप्तं सुनर्दं षण्ढवर्जितम् । (४।१)

वाहयेद् दिवसस्यार्धं पश्चात् स्नानं समाचरेत् ॥ (४।२)

जप्यं देवार्चनं होमं स्वाध्यायं चैवम् अभ्यसेत् । (५।१)

एकद्वित्रिचतुर्विप्रान् भोजयेत् स्नातकान् द्विजः ॥ (५।२)

स्वयंकृष्टे तथा क्षेत्रे धान्यैश् च स्वयमर्जितैः । (६।१)

निर्वपेत् पञ्च यज्ञांश् च क्रतुदीक्षां च कारयेत् ॥ (६।२)

तिला रसा न विक्रेया विक्रेया धान्यतत्समाः । (७।१)

विप्रस्यैवंविधा वृत्तिस् तृणकाष्ठादिविक्रयः ॥ (७।२)

ब्राह्मणश् चेत् कृषिं कुर्यात् तन्महादोषम् आप्नुयात् । (८।१)

संवत्सरेण यत् पापं मत्स्यघाती समाप्नुयात् ॥ (८।२)

अयोमुखेन काष्ठेन तद् एकाहेन लाङ्गली । (९।१)

पाशको मत्स्यघाती च व्याधः शाकुनिकस् तथा ॥ (९।२)

अदाता कर्षकश् चैव सर्वे ते समभागिनः । (१०।१)

वृक्षं छित्त्वा महीं भित्त्वा हत्वा च कृमिकीटकान् ॥ (१०।२)

कर्षकः खलयज्ञेन सर्वपापैः प्रमुच्यते । (११।१)

यो न दद्याद् द्विजातिभ्यो राशिमूलम् उपागतः ॥ (११।२)

स चौरः स च पापिष्ठो ब्रह्मघ्नं तं विनिर्दिशेत् । (१२।१)

राज्ञे दत्त्वा तु षड्भागं देवानां चैकविंशकम् ॥ (१२।२)

विप्राणां त्रिंशकं भागं सर्वपापैः प्रमुच्यते । (१३।१)

क्षत्रियो ऽपि कृषिं कृत्वा देवान् विप्रांश् च पूजयेत् ॥ (१३।२)

वैश्यः शूद्रस् तथा कुर्यात् कृषिवाणिज्यशिल्पकम् । (१४।१)

विकर्म कुर्वते शूद्रा द्विजशुश्रूषयोज्झिताः ॥ (१४।२)

भवन्त्य् अल्पायुषस् ते वै निरयं यान्त्य् असंशयं । (१५।१)

चतुर्णाम् अपि वर्णानाम् एष धर्मः सनातनः ॥ (१५।२)