कैलासशिखरे रम्ये नानारत्नोपशोभिते । (१।१)

पप्रच्छ परया भक्त्या भैरवं परमेश्वरम् ॥ (१।२)

श्रीचण्डिकोवाच । (२।१)

त्रिपुरापूजनं नाथ स्वर्णरत्नैर् विशेषतः । (२।२)

कलिकाले स्वर्णरूप्यं गुप्तभावं तथा मणिम् ॥ (२।३)

केनोपायेन देवेश स्वर्णरूप्यादि लभ्यते । (३।१)

तद् वदस्व विशेषेण यथा रत्नादिकं भवेत् ॥ (३।२)

यन् नोक्तं सर्वतन्त्रेषु तद् वदस्व दयानिधे ॥ (४।१)

श्रीशङ्कर उवाच । (५।१)

शृणु देवि प्रवक्ष्यामि यथा रत्नादिकं भवेत् । (५।२)

मत्तेजसा पारदेन किं रत्नं न हि लभ्यते ॥ (५।३)

तथा सामुद्रकेणैव सुशुभ्रलवणेन च । (६।१)

सम्बलस्य प्रकारं हि शृणु देवि प्रयत्नतः ॥ (६।२)

चीनतन्त्रानुसारेण पूजयेत् सिद्धकालिकाम् । (७।१)

अथवा पूजयेद् देवीं दक्षिणां कालिकां पराम् । (७।२)

कालीतन्त्रोक्तविधिना सप्ताहं जपपूजनम् ॥ (७।३)

सत्ये चैकं तु त्रेतायां द्विगुणं द्वापरे त्रयम् । (८।१)

एवं सर्वत्र जानीयाच् चतुर्गुणजपः कलौ ॥ (८।२)

आनीय बहुयत्नेन सम्बलं तोलद्वयम् । (९।१)

वसुर् आद्यं शिवं चाद्यं मायाबिन्दुविभूषितम् । (९।२)

बीजत्रयं चाष्टशतं प्रजपेत् सम्बलोपरि ॥ (९।३)

अशीतितोलकं मानं कृष्णधेनुसमुद्भवम् । (१०।१)

दुग्धम् आनीय यत्नेन चाष्टोत्तरशतं जपेत् ॥ (१०।२)

वस्त्रयुक्तेन सूत्रेण दुग्धमध्ये विनिक्षिपेत् । (११।१)

उत्तापं जनयेद् धीमान् मन्दमन्देन वह्निना ॥ (११।२)

बिन्दुं वेदान्तपर्यन्तम् अर्धशोषं भवेद् यदा । (१२।१)

तदैवोत्तोल्य तद् द्रव्यं तोयमध्ये विनिक्षिपेत् ॥ (१२।२)

ततः परीक्षा कर्तव्या प्रदद्यात् पावकोपरि । (१३।१)

निर्धूमं वावके द्रव्यं दृष्ट्वा उत्थाप्य यत्नतः ॥ (१३।२)

तत्रैव प्रजपेन् मन्त्रं सर्ववन्द्यनवात्मकम् । (१४।१)

आनीय बहुयत्नेन शुद्धं ताम्रं मनोहरम् ॥ (१४।२)

सार्धेन तोलकं ताम्रं वह्निमध्ये विनिक्षिपेत् । (१५।१)

यथा वह्निस् तथा ताम्रं दृष्ट्वा उत्थाप्य यत्नतः ॥ (१५।२)

गुञ्जाप्रमाणं तद् द्रव्यं तत्क्षणाद् यदि योजयेत् । (१६।१)

सत्यं सत्यं हि गिरिजे रौप्यं भवति निश्चितम् ॥ (१६।२)

श्रीचण्डिकोवाच । (१७।१)

कारणं दुग्धरूपं वा केन रूपेण शङ्करः । (१७।२)

तत्प्रकारं महादेव कृपया वद शङ्कर ॥ (१७।३)

श्रीशङ्कर उवाच । (१८।१)

टङ्कनम् आनयेद् धीमान् तोलकं तु चतुष्टयम् । (१८।२)

वह्नियोगेन गिरिजे लाजरूपं चकार ह ॥ (१८।३)

आम्रपुष्पं तद्द्विगुणं पिष्ट्वा मिलनम् आचरेत् । (१९।१)

तस्योपरि जपेन् मन्त्रं महामायां हि चण्डिके ॥ (१९।२)

एतत् तु गुटिकां कृत्वा मेलनं कारयेद् यदि । (२०।१)

तदैव दुग्धरूपं स्यात् सत्यं सत्यं हि शैलजे ॥ (२०।२)

श्रीचण्डिकोवाच । (२१।१)

गन्धहीनं भवेन् मद्यं केनोपायेन शङ्कर । (२१।२)

तत् सर्वं श्रोतुम् इच्छामि यदि स्नेहो ऽस्ति मा प्रति ॥ (२१।३)

श्रीशङ्कर उवाच । (२२।१)

शिवं वह्निसमारूढं वामनेत्रविभूषितम् । (२२।२)

बिन्दुनादसमायुक्तं गन्धम् आदाय संलिखेत् ॥ (२२।३)

उह्यतां पदम् उच्चार्यं चाष्टोत्तरशतं यदि । (२३।१)

प्रजपेत् साधकश्रेष्ठो दुर्गन्धादिविनाशनम् ॥ (२३।२)