श्रीचण्डिकोवाच । (१।१)

शृणु नाथ परानन्द परापरजगत्पते । (१।२)

इदानीं श्रोतुम् इच्छामि मालायाः कीदृशो जपः । (१।३)

का माला कस्य देवस्य तद् वदस्व समाहितः ॥ (१।४)

श्रीशंकर उवाच । (२।१)

वैष्णवे तुलसीमाला गजदन्तैर् गणेश्वरे । (२।२)

कालिकाया महामन्त्रं जपेद् रुद्राक्षमालया ॥ (२।३)

तारायाश् च जपेन् मन्त्री महाशङ्खाख्यमालया । (३।१)

महाशङ्खाख्यमालायां सर्वां विद्यां जपेत् सुधीः ॥ (३।२)

अकस्माद् वै महासिद्धिर् महाशङ्खाख्यमालया । (४।१)

तथैव सकला विद्या महाशङ्खे वसेत् सदा ॥ (४।२)

स्फाटिकी सर्वदेवस्य प्रवालैः सकलां जपेत् । (५।१)

स्वर्णरौप्यसमुद्भूतां सर्वदेवेषु योजिताम् ॥ (५।२)

कालिकायाश् च सुन्दर्या रुद्राक्षैः प्रजपेत् सदा । (६।१)

भैरव्याः प्रजपेन् मन्त्री शङ्खपद्माख्यया प्रिये ॥ (६।२)

श्मशाने धुस्तुरैर् मालां जपेद् धूमावतीविधौ । (७।१)

इति ते कथितं कान्ते महामालाविनिर्णयम् ॥ (७।२)

अथ ग्रन्थिं प्रवक्ष्यामि शृणु कान्ते समाहिता । (८।१)

येन माला सुसिद्धा च नॄणां सर्वफलप्रदा ॥ (८।२)

मालायाश् चाधिका कान्ते ग्रन्थिश् चैका फलप्रदा । (९।१)

एकपञ्चाशिकायां च मालायां परमेश्वरि ॥ (९।२)

ब्रह्मग्रन्थियुतां मालां सार्धद्वितयवेष्टिताम् । (१०।१)

सपादवेष्टनं देवि नागपाशं मनोहरम् ॥ (१०।२)

सर्वदेवस्य मालायां सर्वत्र परमेश्वरि । (११।१)

ब्रह्मग्रन्थिं विधायेत्थं नागपाशम् अथापि वा ॥ (११।२)

मालायां त्व् अधिकां देवि चैकां ग्रन्थिं प्रदापयेत् । (१२।१)

मूलेन ग्रथितं कुर्यात् प्रणवेनाथवा प्रिये ॥ (१२।२)

ग्रन्थिमध्ये च गुटिकां कुर्याद् अतिमनोहराम् । (१३।१)

सूत्रद्वयं महेशानि मिलनं कारयेत् ततः ॥ (१३।२)

मेरुं च ग्रथनं कुर्यात् तदूर्ध्वे ग्रन्थिसंयुतम् । (१४।१)

एवं मालां विनिर्माय गोपयेद् बहुयत्नतः ॥ (१४।२)

कम्पनं धूननं शब्दं नैव तत्र प्रकाशयेत् । (१५।१)

करभ्रष्टं तथा छिन्नं महाविघ्नस्य कारणम् ॥ (१५।२)

कम्पने सिद्धिहानिः स्याद् धूननं बहुदुःखदम् । (१६।१)

शब्दे जाते भवेद् रोगः करभ्रष्टाद् विनाशकृत् ॥ (१६।२)

छिन्नसूत्रे भवेन् मृत्युस् तस्माद् यत्नपरो भवेत् । (१७।१)

एवं ज्ञात्वा महेशानि शान्तिस्वस्त्ययनं चरेत् ॥ (१७।२)

कम्पने यो जपेन् मन्त्रं यदि सिद्धिं प्रयच्छति । (१८।१)

यत्नेन गुरुम् आनीय द्वाविंशदुपचारतः ॥ (१८।२)

कुम्भस्थापनकं कृत्वा पूजयेद् इष्टदेवताम् । (१९।१)

ततो हुनेद् बिल्वपत्त्रैर् अष्टोत्तरशताहुतिम् ॥ (१९।२)

त्रिमध्वक्तेन विधिना धूनने ऽपि च सुन्दरि । (२०।१)

सशब्दे जपने चण्डि ह्य् एवं कुर्याद् विचक्षणः ॥ (२०।२)

करभ्रष्टे तथा छिन्ने पुरश्चरणम् आचरेत् । (२१।१)

जपाद्यन्ते यजेद् देवीं षोडशैर् उपचारकैः ॥ (२१।२)

प्रत्यहं प्रजपेन् मन्त्रं प्रत्यहं बलिदानकम् । (२२।१)

पञ्चाङ्गस्य प्रमाणेन सर्वकर्म समापयेत् ॥ (२२।२)

दरिद्रः परमेशानि यदि विघ्नपरायणः । (२३।१)

आद्यन्ते महतीं पूजां दिक्सहस्रं जपेन् मनुम् ॥ (२३।२)

सहस्रैकं हुनेत् पश्चात् सर्वविघ्नस्य शान्तये । (२४।१)

कुम्भतोयैः स्नापयित्वा पुनर् मालां प्रदापयेत् ॥ (२४।२)

अनेनैव विधानेन विघ्नजालैर् न लिप्यते ॥ (२५।१)