मार्तण्डस्य भानोरभीशवो दीधितयो वो युष्माकमशुभभिदेऽकल्याणविनाशाय भवन्तु जायन्ताम् ॥ (१।०)

चिरं बहुकालम् ॥ (२।०)

किंविशिष्टाः ॥ (३।०)

ये धरित्र्या भुवो रसं जलं धयन्ति पिबन्ति ॥ (४।०)

असकृदनेकवारम् ॥ (५।०)

किंभूता इव धयन्ति ॥ (६।०)

शोषिण इव शोषयुक्ता इव ॥ (७।०)

शोषिणोऽपि श्रममिव दधतः खेदमिव दधाना बिभ्राणाः ॥ (८।०)

श्रमाधाने हेतुमाहावृत्तिभ्रान्तविश्वाः ॥ (९।०)

आवृत्त्या पौनःपुन्येन भ्रान्तं पर्यटितं विश्वं जगद्यैस्ते तथोक्ताः ॥ (१०।०)

क्व ॥ (११।०)

ग्रीष्मे निदाघकाले ॥ (१२।०)

शोषिणः स्वोष्मणेव ॥ (१३।०)

पुनरुत्प्रेक्षते दावाग्नितप्ता इव जलम् अतीव नरा धयन्ति तद्वदेते इत्युत्प्रेक्षिताः ॥ (१४।०)

तेऽभीशवः प्रावृषि वर्षाकाले उद्वान्ततोया उद्गीर्णपयस्काः ॥ (१५।०)

किंभूताः ॥ (१६।०)

आत्तपानातिशयरुज इव आत्ता प्राप्ता पानातिशयरुग् यैस्ते ॥ (१७।०)

हिमर्तौ हेमन्तेऽप्रचण्डा मन्दा अपटवः ॥ (१८।०)

यथा कोऽपि पानीयपानातिशयात् प्राप्तवेदनो मन्दो भवति तद्वदेतेऽपि ॥ (१९।०)