दीप्तांशोर् आदित्यस्य संबन्धिन्यो गावो दीधितयो वो युष्माकं प्रीतिं सुखमुत्पादयन्तु जनयन्तु ॥ (१।०)

किंभूताः ॥ (२।०)

दत्तानन्दाः दत्तो वितीर्ण आनन्दो याभिस्ताः ॥ (३।०)

कासाम् ॥ (४।०)

प्रजानां लोकानाम् ॥ (५।०)

कैः कृत्वा ॥ (६।०)

पयोभिर्जलैः ॥ (७।०)

समुचितसमयाकृष्टसृष्टैः समुचितो योग्यः समयः कालस्तत्राकृष्टसृष्टैः ॥ (८।०)

भूयोऽपि विशेष्यन्ते पूर्वाह्णे विप्रकीर्णाः अह्नः पूर्वो भागस्तत्र विक्षिप्ताः ॥ (९।०)

क्व ॥ (१०।०)

दिशि दिशि सर्वासु दिक्षु ॥ (११।०)

विरमत्यह्नि याति दिवसेऽस्तमनसमये संहारभाजः संहृतिमाश्रिताः ॥ (१२।०)

पुनरपि किंभूताः । (१३।१)

दीर्घदुःखप्रभवभवभयोदन्वदुत्तारनावः ॥ (१३।२)

दीर्घं च तद्दुःखं च तस्य प्रभव उत्पत्तिस्थानं स चासौ भवश्च संसारस्तस्माद् भयं तद् एवोदन्वान् समुद्रस् तस्माद् उत्तारस् तत्र नावो यानपात्राणि ॥ (१४।०)

पावनानां पावकानां परम् उत्कृष्टम् ॥ (१५।०)

किंभूतां प्रीतिम् ॥ (१६।०)

अपरिमितामपर्यन्ताम् ॥ (१७।०)

गाव इति श्लिष्टमेतदभिन्नम् ॥ (१८।०)

गावो धेनवश्चोच्यन्ते ॥ (१९।०)

ता अपि पयोभिर्दुग्धैः समुचितसमयाकृष्टसृष्टैः प्रजानां दत्तानन्दा भवन्ति ॥ (२०।०)

पूर्वाह्णे प्रत्युषसि विप्रकीर्णा भवन्ति ॥ (२१।०)

अह्नोऽवसाने संहारभाजः ॥ (२२।०)

दीर्घदुःखप्रभवभवभयोदन्वदुत्तारनावश्च दत्ताः सत्यः सद्यः ॥ (२३।०)

तदीयैः पयोभिर्विप्राग्नितर्पणैर् लोकाः संसारं तरन्तीत्यागमविदः ॥ (२४।०)