ते भास्करस्य करा वो युष्माकं कल्याणं क्रियासुर् विधेयासुः ॥ (१।०)

ये कमलवनोद्घाटनं कुर्वते पद्मखण्डानामुन्मीलनं विदधते ॥ (२।०)

उत्प्रेक्षते लक्ष्मीम् आक्रष्टुकामा इवापक्रष्टुमनस इव ॥ (३।०)

यतो लक्ष्मीं सदैव कमलवनेषु कृतसंनिधानामाक्रष्टुमिव ॥ (४।०)

किं कर्तुम् ॥ (५।०)

दातुं वितारितुम् ॥ (६।०)

कस्मै ॥ (७।०)

भक्तिप्रह्वाय ॥ (८।०)

भक्त्या प्रह्वो नम्रो भक्तिप्रह्वस्तस्मै ॥ (९।०)

कीदृशीं श्रियम् ॥ (१०।०)

मुकुलपुटकुटीकोटरक्रोडलीनाम् ॥ (११।०)

मुकुलशब्देन कुड्मलमुच्यते ॥ (१२।०)

तस्य यः पुटः स एव कुटी शालेव मुकुलपुटकुटी तस्याः कोटरमभ्यन्तरं तस्य क्रोडोऽवनम्रप्रदेशस्तत्र लीनां संश्लिष्टाम् ॥ (१३।०)

कीदृशाः कराः ॥ (१४।०)

कालाकारान्धकाराननपतितजगत्साध्वसध्वंसकल्याः ॥ (१५।०)

कालस्येवाकारो यस्य स कालाकारः स चासावन्धकारश्च तस्याननं मुखं तत्र पतितं यज्जगत्तस्य साध्वसं भयं तस्य ध्वंसो नाशस्तत्र कल्याः पटवः समर्था एव ॥ (१६।०)

पुनः किंलक्षणाः ॥ (१७।०)

किसलयरुचयः किसलयानामिव रुचिर्येषां तेऽभिनवाङ्कुरभासः ॥ (१८।०)