अथातो धर्मं व्याख्यास्यामः ॥ (१।१)

यतो ऽभ्युदयनिःश्रेयससिद्धिः स धर्मः ॥ (२।१)

तद्वचनाद् आम्नायप्रामाण्यम् ॥ (३।१)

पृथिव्य् आपस् तेजो वायुर् आकाशं कालो दिग् आत्मा मन इति द्रव्याणि ॥ (४।१)

रूपरसगन्धस्पर्शाः संख्याः परिमाणानि पृथक्त्वं संयोगविभागौ परत्वापरत्वे बुद्धयः सुखदुःखे इच्छाद्वेषौ प्रयत्नश् च गुणाः ॥ (५।१)

उत्क्षेपणम् अवक्षेपणम् आकुञ्चनं प्रसारणं गमनम् इति कर्माणि ॥ (६।१)

सद् अनित्यं द्रव्यवत् कार्यं कारणं सामान्यविशेषवद् इति द्रव्यगुणकर्मणाम् अविशेषः ॥ (७।१)

द्रव्याणि द्रव्यान्तरम् आरभन्ते ॥ (८।१)

गुणाश् च गुणान्तरम् ॥ (९।१)

कर्म कर्मसाध्यं न विद्यते ॥ (१०।१)

कार्याविरोधि द्रव्यं कारणाविरोधि च ॥ (११।१)

उभयथा गुणः ॥ (१२।१)

कार्यविरोधि कर्म ॥ (१३।१)

क्रियावद् गुणवत् समवायिकारणम् इति द्रव्यलक्षणम् ॥ (१४।१)

द्रव्याश्रय्य् अगुणवान् संयोगविभागेष्व् अकारणम् अनपेक्ष इति गुणलक्षणम् ॥ (१५।१)

एकद्रव्यम् अगुणं संयोगविभागेष्व् अनपेक्षं कारणम् इति कर्मलक्षणम् ॥ (१६।१)

द्रव्यगुणकर्मणां द्रव्यं कारणं सामान्यम् ॥ (१७।१)

तथा गुणः ॥ (१८।१)

संयोगविभागानां कर्म ॥ (१९।१)

न द्रव्याणां व्यतिरेकात् ॥ (२०।१)

गुणवैधर्म्यान् न कर्मणां ॥ (२१।१)

द्रव्याणां द्रव्यं कार्यं सामान्यम् ॥ (२२।१)

द्वित्वप्रभृतयश् च संख्याः पृथक्त्वं संयोगविभागाश् च ॥ (२३।१)

असमवायात् सामान्यं कर्म कार्यं न विद्यते ॥ (२४।१)

संयोगानां द्रव्यम् ॥ (२५।१)

रूपानां रूपम् ॥ (२६।१)

गुरुत्वप्रयत्नसंयोगानाम् उत्क्षेपणम् ॥ (२७।१)

संयोगविभागाः कर्मणाम् ॥ (२८।१)

कारणसामान्ये द्रव्यकर्मणां कर्माकारणम् उक्तम् ॥ (२९।१)