दृष्टानां दृष्टप्रयोजनानां दृष्टाभावे प्रयोगोऽभ्युदयाय ॥ (१।०)

अभिषेचनोपवासब्रह्मचर्यगुरुकुलवासवानप्रस्थ्ययज्ञदानप्रोक्षणदिङ्नक्षत्रमन्त्रकालनियमाश्चादृष्टाय ॥ (२।०)

चातुराश्रम्यम् उपधाच्चानुपधाच्च ॥ (३।०)

भावदोष उपधा ॥ (४।०)

अदोषोऽनुपधा ॥ (५।०)

इष्टरूपरसगन्धस्पर्शं प्रोक्षितमभ्युक्षितं च तच्छुचि ॥ (६।०)

अशुचीति शुचिप्रतिषेधः ॥ (७।०)

अर्थान्तरं च ॥ (८।०)

अयतस्य शुचिभोजनादभ्युदयो न विद्यते यमाभावात् ॥ (९।०)

विद्यते चानर्थान्तरत्वाद् यमस्य ॥ (१०।०)

असति चाभावात् ॥ (११।०)

सुखाद्रागः ॥ (१२।१)

तन्मयत्वात् ॥ (१३।१)

तृप्तेः ॥ (१४।१)

अदृष्टात् ॥ (१५।१)

जातिविशेषाच्च रागविशेषः ॥ (१६।१)

इच्छाद्वेषपूर्विका धर्माधर्मयोः प्रवृत्तिः ॥ (१७।१)

ततः संयोगो विभागश्च ॥ (१८।१)

आत्मकर्मसु मोक्षो व्याख्यातः ॥ (१९।१)