रूपरसगन्धस्पर्शवती पृथिवी ॥ (१।०)

रूपरसस्पर्शवत्य आपो द्रवाः स्निग्धाश्च ॥ (२।०)

तेजो रूपस्पर्शवत् ॥ (३।०)

वायुः स्पर्शवान् ॥ (४।०)

त आकाशे न विद्यन्ते ॥ (५।०)

सर्पिर्जतुमधूच्छिष्टानां पार्थिवानाम् अग्निसंयोगाद् द्रवताद्भिः सामान्यम् ॥ (६।१)

त्रपुसीसलोहरजतसुवर्णानां तैजसानाम् अग्निसंयोगाद् द्रवताद्भिः सामान्यम् ॥ (७।०)

विषाणी ककुद्मान् प्रान्तेवालधिः सास्नावानिति गोत्वे दृष्टं लिङ्गम् ॥ (८।०)

स्पर्शश्च ॥ (९।०)

न च दृष्टानां स्पर्श इत्यदृष्टलिङ्गो वायुः ॥ (१०।०)

अद्रव्यवत्त्वाद् द्रव्यम् ॥ (११।१)

क्रियावत्त्वाद् गुणवत्त्वाच्च ॥ (१२।१)

अद्रव्यवत्त्वेन नित्यत्वमुक्तम् ॥ (१३।०)

वायोर् वायुसंमूर्च्छनं नानात्वे लिङ्गम् ॥ (१४।१)

वायुरिति सति सन्निकर्षे प्रत्यक्षाभावाद् दृष्टं लिङ्गं न विद्यते ॥ (१५।०)

सामान्यतोदृष्टाच्चाविशेषः ॥ (१६।०)

तस्मादागमिकम् ॥ (१७।१)

संज्ञाकर्म त्वस्मद्विशिष्टानां लिङ्गम् ॥ (१८।१)

प्रत्यक्षपूर्वकत्वात् संज्ञाकर्मणः ॥ (१९।०)

निष्क्रमणं प्रवेशनमित्याकाशस्य लिङ्गम् ॥ (२०।१)

तदलिङ्गमेकद्रव्यवत्त्वात्कर्मणः ॥ (२१।१)

कारणान्तरानुकॢप्तिवैधर्म्याच्च ॥ (२२।१)

संयोगादभावः कर्मणः ॥ (२३।१)

कारणगुणपूर्वः कार्ये गुणो दृष्टः कार्यान्तराप्रादुर्भावाच्च शब्दः स्पर्शवतामगुणः ॥ (२४।०)

परत्र समवायात्प्रत्यक्षत्वाच्च नात्मगुणो न मनोगुणः ॥ (२५।१)

लिङ्गमाकाशस्य ॥ (२६।१)

द्रव्यत्वनित्यत्वे वायुना व्याख्याते ॥ (२७।१)

तत्त्वं भावेन ॥ (२८।१)