पुष्पवस्त्रयोः सति संनिकर्षे गन्धान्तराप्रादुर्भावो वस्त्रे गन्धाभावलिङ्गम् ॥ (१।०)

एतेनाप्सूष्णता व्याख्याता ॥ (२।०)

व्यवस्थितः पृथिव्यां गन्धः ॥ (३।०)

तेजस्युष्णता ॥ (४।०)

अप्सु शीतता ॥ (५।०)

अपरस्मिन् परं युगपद् अयुगपच्चिरं क्षिप्रमिति काललिङ्गानि ॥ (६।०)

द्रव्यत्वनित्यत्वे वायुना व्याख्याते ॥ (७।०)

तत्त्वं भावेन ॥ (८।०)

कार्यविशेषेण नानात्वम् ॥ (९।०)

नित्येष्वभावादनित्येषु भावात् ॥ (१०।०)

कारणे कालाख्या ॥ (११।१)

इत इदमिति यतस्तद्दिशो लिङ्गम् ॥ (१२।१)

द्रव्यत्वनित्यत्वे वायुना व्याख्याते ॥ (१३।१)

तत्त्वं भावेन ॥ (१४।१)

कार्यविशेषेण नानात्वम् ॥ (१५।०)

आदित्यसंयोगाद् भूतपूर्वाद् भविष्यतो भूताच्च प्राची ॥ (१६।०)

तथा दक्षिणा प्रतीच्युदीची च ॥ (१७।०)

एतेन दिगन्तराणि व्याख्यातानि ॥ (१८।१)

सामान्यप्रत्यक्षाद् विशेषाप्रत्यक्षाद् विशेषस्मृतेश्च संशयः ॥ (१९।१)

दृष्टमदृष्टम् ॥ (२०।०)

दृष्टं च दृष्टवत् ॥ (२१।१)

दृष्टं यथादृष्टमयथादृष्टमुभयथा दृष्टत्वात् ॥ (२२।०)

विद्याविद्यातश्च संशयः ॥ (२३।१)

श्रोत्रग्रहणो योऽर्थः स शब्दः ॥ (२४।१)

तस्मिन् द्रव्यं कर्म गुण इति संशयः ॥ (२५।१)

तुल्यजातीयेष्वर्थान्तरभूतेषु च विशेषस्योभयथा दृष्टत्वात् ॥ (२६।१)

एकद्रव्यवत्त्वान्न द्रव्यम् ॥ (२७।०)

अचाक्षुषत्वान्न कर्म ॥ (२८।१)

गुणस्य सतोऽपवर्गः कर्मभिः साधर्म्यम् ॥ (२९।१)

सतो लिङ्गाभावात् ॥ (३०।०)

नित्यवैधर्म्यात् ॥ (३१।१)

कार्यत्वात् ॥ (३२।१)

अभावात् ॥ (३३।१)

कारणतो विकारात् ॥ (३४।१)

दोषात् ॥ (३५।१)

संयोगाद् विभागाच्छब्दाच्च शब्दनिष्पत्तेः ॥ (३६।१)

लिङ्गाच्चानित्यः ॥ (३७।१)

द्वयोस्तु प्रवृत्त्योरभावात् ॥ (३८।१)

संख्याभावात् ॥ (३९।१)

प्रथमाशब्दात् ॥ (४०।१)

सम्प्रतिपत्तिभावाच्च ॥ (४१।१)

संदिग्धाः सति बहुत्वे ॥ (४२।०)

संख्याभावः सामान्यतः ॥ (४३।१)