क्रियागुणव्यपदेशाभावादसत् ॥ (१।१)

सदसत् ॥ (२।०)

असतः सत्क्रियागुणव्यपदेशाभावाद् अर्थान्तरम् ॥ (३।०)

सच्चासत् ॥ (४।०)

यच्चान्यत् सतस्तदप्यसत् ॥ (५।०)

असदिति भूतप्रत्यक्षाभावाद् भूतस्मृतेर्विरोधिप्रत्यक्षत्वाच्च ज्ञानम् ॥ (६।०)

तथाभावे भावप्रत्यक्षत्वाच्च ॥ (७।०)

एतेनाघटो ऽगौर् अधर्मश्च व्याख्यातः ॥ (८।०)

अभूतं नास्तीत्यनर्थान्तरम् ॥ (९।०)

नास्ति घटो गेह इति सतो घटस्य गेहसंयोगप्रतिषेधः ॥ (१०।०)

नास्त्यन्यश्चन्द्रमा इति सामान्याच्चन्द्रमसः प्रतिषेधः ॥ (११।१)

सदसतोर् वैधर्म्यात् कार्ये सदसत्ता न ॥ (१२।१)

आत्मन्यात्ममनसोः संयोगविशेषादात्मप्रत्यक्षम् ॥ (१३।१)

तथा द्रव्यान्तरेषु ॥ (१४।१)

आत्मेन्द्रियमनोऽर्थसन्निकर्षाच्च ॥ (१५।१)

तत्समवायात् कर्मगुणेषु ॥ (१६।१)

आत्मसमवायादात्मगुणेषु ॥ (१७।१)

अस्येदं कार्यं कारणं सम्बन्धि एकार्थसमवायि विरोधि चेति लैङ्गिकम् ॥ (१८।१)

एतेन शाब्दं व्याख्यातम् ॥ (१९।०)

हेतुरपदेशो लिङ्गं निमित्तं प्रमाणं कारणमित्यनर्थान्तरम् ॥ (२०।१)

अस्येदमिति बुद्ध्यपेक्षत्वात् ॥ (२१।०)

आत्ममनसोः संयोगविशेषात् संस्काराच्च स्मृतिः ॥ (२२।१)

तथा स्वप्नः स्वप्नान्तिकं च ॥ (२३।१)

धर्माच्च ॥ (२४।१)

इन्द्रियदोषात् संस्काराच्चाविद्या ॥ (२५।१)

तद्दुष्टं ज्ञानम् ॥ (२६।१)

अदुष्टं विद्या ॥ (२७।१)

आर्षं सिद्धदर्शनं च धर्मेभ्यः ॥ (२८।१)