आत्मसंयोगप्रयत्नाभ्यां हस्ते कर्म ॥ (१।०)

तथा मुसलकर्म हस्तसंयोगाच्च ॥ (२।०)

अभिघातजे मुसलकर्मणि व्यतिरेकादकारणं हस्तसंयोगः ॥ (३।०)

तथात्मसंयोगो हस्तमुसलकर्मणि ॥ (४।०)

मुसलाभिघातात्तु मुसलसंयोगाद्धस्ते कर्म ॥ (५।०)

तथात्मकर्म हस्तसंयोगाच्च ॥ (६।०)

संयोगाभावे गुरुत्वात् पतनम् ॥ (७।०)

नोदनविशेषाभावान् नोर्ध्वं न तिर्यग् गमनम् ॥ (८।०)

प्रयत्नविशेषान्नोदनविशेषः ॥ (९।०)

नोदनविशेषादुदसनविशेषः ॥ (१०।०)

हस्तकर्मणा दारककर्म व्याख्यातम् ॥ (११।१)

तथा दग्धस्य विस्फोटनम् ॥ (१२।१)

प्रयत्नाभावे गुरुत्वात् सुप्तस्य पतनम् ॥ (१३।१)

तृणकर्म वायुसंयोगात् ॥ (१४।१)

मणिगमनं सूच्यभिसर्पणमित्यदृष्टकारितानि ॥ (१५।१)

इषावयुगपत् संयोगविशेषाः कर्मान्यत्वे हेतुः ॥ (१६।१)

नोदनादाद्यमिषोः कर्म कर्मकारिताच्च संस्कारादुत्तरं तथोत्तरम् उत्तरं च ॥ (१७।१)

संस्काराभावे गुरुत्वात् पतनम् ॥ (१८।१)