नोदनाद् अभिघातात्संयुक्तसंयोगाच्च पृथिव्यां कर्म ॥ (१।०)

तद् विशेषेणादृष्टकारितम् ॥ (२।०)

अपां गुरुत्वात् संयोगाभावे पतनम् ॥ (३।०)

तद् विशेषेणादृष्टकारितम् ॥ (४।०)

द्रवत्वात् स्यन्दनम् ॥ (५।०)

नाड्या वायुसंयोगादारोहणम् ॥ (६।०)

नोदनात्पीडनात्संयुक्तसंयोगाच्च ॥ (७।०)

वृक्षाभिसर्पणमित्यदृष्टकारितम् ॥ (८।०)

अपां सङ्घातो विलयनं च तेजसः संयोगात् ॥ (९।०)

तत्रावस्फूर्जथुर्लिङ्गम् ॥ (१०।०)

वैदिकं च ॥ (११।१)

अपां संयोगाद् विभागाच्च स्तनयित्नुः ॥ (१२।१)

पृथिवीकर्मणा तेजःकर्म वायुकर्म च व्याख्यातम् ॥ (१३।१)

अग्नेरूर्ध्वज्वलनं वायोश्च तिर्यक्पवनमणुमनसोश्चाद्यं कर्मेत्यदृष्टकारितानि ॥ (१४।०)

हस्तकर्मणा मनसः कर्म व्याख्यातम् ॥ (१५।१)

आत्मेन्द्रियमनोऽर्थसंनिकर्षात् सुखदुःखे तदनारम्भः ॥ (१६।१)

आत्मस्थे मनसि सशरीरस्य सुखदुःखाभावः स योगः ॥ (१७।१)

कायकर्मणात्मकर्म व्याख्यातम् ॥ (१८।१)

अपसर्पणम् उपसर्पणम् अशितपीतसंयोगः कार्यान्तरसंयोगाश्चेत्यदृष्टकारितानि ॥ (१९।१)

तदभावे संयोगाभावोऽप्रादुर्भावः स मोक्षः ॥ (२०।१)

द्रव्यगुणकर्मवैधर्म्याद् भावाभावमात्रं तमः ॥ (२१।१)

तेजसो द्रव्यान्तरेणावरणाच्च ॥ (२२।१)

दिक्कालावाकाशं च क्रियावद्भ्यो वैधर्म्यान्निष्क्रियाणि ॥ (२३।०)

एतेन कर्माणि गुणाश्च व्याख्याताः ॥ (२४।१)

निष्क्रियाणां समवायः कर्मभ्यः प्रतिषिद्धः ॥ (२५।१)

कारणं त्वसमवायिनो गुणाः ॥ (२६।१)

गुणैर्दिग् व्याख्याता ॥ (२७।१)

कारणेन काल इति ॥ (२८।१)