रूपरसगन्धस्पर्शव्यतिरेकाद् अर्थान्तरम् एकत्वं तथा पृथक्त्वम् ॥ (१।१)

तयोर्नित्यत्वानित्यत्वे तेजसो रूपस्पर्शाभ्यां व्याख्याते ॥ (२।०)

निष्पत्तिश्च ॥ (३।०)

एकत्वपृथक्त्वयोर् एकत्वपृथक्त्वाभावो ऽणुत्वमहत्त्वाभ्यां व्याख्यातः ॥ (४।०)

कर्मभिः कर्माणि गुणैर्गुणाः ॥ (५।०)

निःसंख्यत्वात् कर्मगुणानां सर्वैकत्वं न विद्यते ॥ (६।०)

एकत्वस्याभावाद् भाक्तं न विद्यते ॥ (७।०)

कार्यकारणैकत्वपृथक्त्वाभावाद् एकत्वपृथक्त्वे न विद्येते ॥ (८।०)

एतदनित्यनित्ययोर्व्याख्यातम् ॥ (९।०)

अन्यतरकर्मज उभयकर्मजः संयोगजश्च संयोगः ॥ (१०।०)

एतेन विभागो व्याख्यातः ॥ (११।१)

संयोगविभागयोः संयोगविभागाभावो ऽणुत्वमहत्त्वाभ्यां व्याख्यातः ॥ (१२।१)

कर्मभिः कर्माणि गुणैर्गुणाः ॥ (१३।०)

युतसिद्ध्यभावात् कार्यकारणयोः संयोगविभागौ न विद्येते ॥ (१४।१)

गुणत्वात् ॥ (१५।१)

गुणे च भाष्यते ॥ (१६।०)

निष्क्रियत्वात् ॥ (१७।१)

असति नास्तीति च प्रयोगात् ॥ (१८।१)

शब्दार्थावसम्बद्धौ ॥ (१९।१)

संयोगिनो दण्डात् समवायिनो विषाणाच्च ॥ (२०।०)

दृष्टत्वादहेतुः प्रत्ययः ॥ (२१।१)

तथा प्रत्ययाभावः ॥ (२२।१)

सम्बद्धसम्बन्धादिति चेत् सन्देहः ॥ (२३।१)

सामयिकः शब्दादर्थप्रत्ययः ॥ (२४।१)

एकदिक्कालाभ्यां संनिकृष्टविप्रकृष्टाभ्यां परमपरम् ॥ (२५।१)

कारणपरत्वात् कारणापरत्वाच्च ॥ (२६।१)

परत्वापरत्वयोः परत्वापरत्वाभावोऽणुत्वमहत्त्वाभ्यां व्याख्यातः ॥ (२७।१)

कर्मभिः कर्माणि गुणैर्गुणाः ॥ (२८।१)

इहेति यतः कार्यकारणयोः स समवायः ॥ (२९।१)

द्रव्यत्वगुणत्वकर्मत्वप्रतिषेधो भावेन व्याख्यातः ॥ (३०।१)

तत्त्वं चेति ॥ (३१।१)