उक्ता गुणाः ॥ (१।०)

गुणलक्षणं चोक्तम् ॥ (२।०)

इदमेवंगुणम् इदम् एवंगुणमिति चोक्तम् ॥ (३।०)

पृथिव्यां रूपरसगन्धस्पर्शा द्रव्यानित्यत्वादनित्याः ॥ (४।०)

अग्निसंयोगाच्च ॥ (५।०)

गुणान्तरप्रादुर्भावात् ॥ (६।०)

एतेन नित्येष्वनित्यत्वमुक्तम् ॥ (७।०)

अप्सु तेजसि वायौ च नित्या द्रव्यनित्यत्वात् ॥ (८।०)

अनित्येष्वनित्या द्रव्यानित्यत्वात् ॥ (९।०)

कारणगुणपूर्वाः पृथिव्यां पाकजाश्च ॥ (१०।०)

अप्सु तेजसि वायौ च कारणगुणपूर्वाः पाकजा न विद्यन्ते ॥ (११।१)

अगुणवतो द्रव्यस्य गुणारम्भात् कर्मगुणा अगुणाः ॥ (१२।१)

एतेन पाकजा व्याख्याताः ॥ (१३।१)

एकद्रव्यवत्त्वात् ॥ (१४।१)

अणोर्महतश्चोपलब्ध्यनुपलब्धी नित्ये व्याख्याते ॥ (१५।१)

कारणबहुत्वात् कारणमहत्त्वात् प्रचयविशेषाच्च महत् ॥ (१६।०)

तद्विपरीतमणु ॥ (१७।१)

अणु महदिति तस्मिन् विशेषभावाद् विशेषाभावाच्च ॥ (१८।१)

एककालत्वात् ॥ (१९।१)

दृष्टान्ताच्च ॥ (२०।१)

अणुत्वमहत्त्वयोर् अणुत्वमहत्त्वाभावः कर्मगुणैर्व्याख्यातः ॥ (२१।१)

अणुत्वमहत्त्वाभ्यां कर्मगुणा अगुणाः ॥ (२२।१)

एतेन दीर्घत्वह्रस्वत्वे व्याख्याते ॥ (२३।१)

कर्मभिः कर्माणि गुणैर्गुणाः ॥ (२४।१)

तदनित्येऽनित्यम् ॥ (२५।१)

नित्यं परिमण्डलम् ॥ (२६।१)

अविद्या विद्यालिङ्गम् ॥ (२७।१)

विभवान् महानाकाशः ॥ (२८।१)

तथा चात्मा ॥ (२९।१)

तदभावादणु मनः ॥ (३०।१)

गुणैर्दिग् व्याख्याता ॥ (३१।०)

कारणेन काल इति ॥ (३२।१)