आत्मसमवायः सुखदुःखयोः पञ्चभ्यो ऽर्थान्तरत्वे हेतुस्तदाश्रयिभ्यश्च गुणेभ्यः ॥ (१।०)

इष्टानिष्टकारणविशेषाद् विरोधाच्च मिथः सुखदुःखयोर् अर्थान्तरभावः ॥ (२।०)

संशयनिर्णययोरर्थान्तरभावश्च ज्ञानान्तरत्वे हेतुः ॥ (३।०)

तयोर्निष्पत्तिः प्रत्यक्षलैङ्गिकाभ्यां ज्ञानाभ्यां व्याख्याता ॥ (४।०)

भूतमिति प्रत्यक्षं व्याख्यातम् ॥ (५।०)

भविष्यतीति कार्यान्तरे दृष्टत्वात् ॥ (६।०)

तथा भवतीति सापेक्षेभ्योऽनपेक्षेभ्यश्च ॥ (७।०)

अभूदित्यभूतात् ॥ (८।०)

सति च कार्यासमवायात् ॥ (९।०)

एकार्थसमवायिषु कारणान्तरेषु दर्शनादेकदेश इत्येकस्मिन् ॥ (१०।०)

शिरः पृष्ठमुदरं पाणिरिति तद्विशेषेभ्यः ॥ (११।१)

कारणमिति द्रव्ये कार्यसमवायात् ॥ (१२।१)

संयोगाद्वा ॥ (१३।१)

कारणसमवायात्कर्मणि ॥ (१४।१)

तथा रूपे कारणकारणसमवायाच्च ॥ (१५।१)

कारणसमवायात्संयोगे ॥ (१६।१)

तथा कारणाकारणसमवायाच्च ॥ (१७।१)

संयुक्तसमवायादग्नेर्वैशेषिकम् ॥ (१८।१)

लैङ्गिकं प्रमाणं व्याख्यातम् ॥ (१९।०)

दृष्टानां दृष्टप्रयोजनानां दृष्टाभावे प्रयोगो ऽभ्युदयाय ॥ (२०।१)

तद्वचनाद् आम्नायप्रामाण्यमिति ॥ (२१।१)