अष्टावक्र उवाच । (१।१)

विहाय वैरिणं कामम् अर्थं चानर्थसङ्कुलम् । (१।२)

धर्मम् अप्य् एतयोर् हेतुं सर्वत्रानादरं कुरु ॥ (१।३)

स्वप्नेन्द्रजालवत् पश्य दिनानि त्रीणि पञ्च वा । (२।१)

मित्रक्षेत्रधनागारदारदायादिसम्पदः ॥ (२।२)

यत्र यत्र भवेत् तृष्णा संसारं विद्धि तत्र वै । (३।१)

प्रौढवैराग्यम् आश्रित्य वीततृष्णः सुखी भव ॥ (३।२)

तृष्णामात्रात्मको बन्धस् तन्नाशो मोक्ष उच्यते । (४।१)

भावसंसक्तिमात्रेण प्राप्तितुष्टिर् मुहुर्मुहुः ॥ (४।२)

त्वम् एकश् चेतनः शुद्धो जडं विश्वम् असत् तथा । (५।१)

अविद्यापि न किंचित् सा का बुभुत्सा तथापि ते ॥ (५।२)

राज्यं सुताः कलत्राणि शरीराणि सुखानि च । (६।१)

संसक्तस्यापि नष्टानि तव जन्मनि जन्मनि ॥ (६।२)

अलम् अर्थेन कामेन सुकृतेनापि कर्मणा । (७।१)

एभ्यः संसारकान्तारे न विश्रान्तम् अभून् मनः ॥ (७।२)

कृतं न कति जन्मानि कायेन मनसा गिरा । (८।१)

दुःखम् आयासदं कर्म तद् अद्याप्य् उपरम्यताम् ॥ (८।२)