Chapter 20
Select a line for its word-by-word analysis.
क्व भूतानि क्व देहो वा क्वेन्द्रियाणि क्व वा मनः । (१।२)
kva bhūtāni kva deho vā kvendriyāṇi kva vā manaḥ |
क्व शून्यं क्व च नैराश्यं मत्स्वरूपे निरञ्जने ॥ (१।३)
kva śūnyaṃ kva ca nairāśyaṃ matsvarūpe nirañjane ||
क्व शास्त्रं क्वात्मविज्ञानं क्व वा निर्विषयं मनः । (२।१)
kva śāstraṃ kvātmavijñānaṃ kva vā nirviṣayaṃ manaḥ |
क्व तृप्तिः क्व वितृष्णत्वं गतद्वन्द्वस्य मे सदा ॥ (२।२)
kva tṛptiḥ kva vitṛṣṇatvaṃ gatadvandvasya me sadā ||
क्व विद्या क्व च वाविद्या क्वाहं क्वेदं मम क्व वा । (३।१)
kva vidyā kva ca vāvidyā kvāhaṃ kvedaṃ mama kva vā |
क्व बन्धः क्व च वा मोक्षः स्वरूपस्य क्व रूपिता ॥ (३।२)
kva bandhaḥ kva ca vā mokṣaḥ svarūpasya kva rūpitā ||
क्व प्रारब्धानि कर्माणि जीवन्मुक्तिर् अपि क्व वा । (४।१)
kva prārabdhāni karmāṇi jīvanmuktir api kva vā |
क्व तद् विदेहकैवल्यं निर्विशेषस्य सर्वदा ॥ (४।२)
kva tad videhakaivalyaṃ nirviśeṣasya sarvadā ||
क्व कर्ता क्व च वा भोक्ता निष्क्रियं स्फुरणं क्व वा । (५।१)
kva kartā kva ca vā bhoktā niṣkriyaṃ sphuraṇaṃ kva vā |
क्वापरोक्षं फलं वा क्व निःस्वभावस्य मे सदा ॥ (५।२)
kvāparokṣaṃ phalaṃ vā kva niḥsvabhāvasya me sadā ||
क्व लोकः क्व मुमुक्षुर् वा क्व योगी ज्ञानवान् क्व वा । (६।१)
kva lokaḥ kva mumukṣur vā kva yogī jñānavān kva vā |
क्व बद्धः क्व च वा मुक्तः स्वस्वरूपे ऽहम् अद्वये ॥ (६।२)
kva baddhaḥ kva ca vā muktaḥ svasvarūpe 'ham advaye ||
क्व सृष्टिः क्व च संहारः क्व साध्यं क्व च साधनम् । (७।१)
kva sṛṣṭiḥ kva ca saṃhāraḥ kva sādhyaṃ kva ca sādhanam |
क्व साधकः क्व सिद्धिर् वा स्वस्वरूपे ऽहम् अद्वये ॥ (७।२)
kva sādhakaḥ kva siddhir vā svasvarūpe 'ham advaye ||
क्व प्रमाता प्रमाणं वा क्व प्रमेयं क्व च प्रमा । (८।१)
kva pramātā pramāṇaṃ vā kva prameyaṃ kva ca pramā |
क्व किंचित् क्व न किंचिद् वा सर्वदा विमलस्य मे ॥ (८।२)
kva kiṃcit kva na kiṃcid vā sarvadā vimalasya me ||
क्व विक्षेपः क्व चैकाग्र्यं क्व निर्बोधः क्व मूढता । (९।१)
kva vikṣepaḥ kva caikāgryaṃ kva nirbodhaḥ kva mūḍhatā |
क्व हर्षः क्व विषादो वा सर्वदा निष्क्रियस्य मे ॥ (९।२)
kva harṣaḥ kva viṣādo vā sarvadā niṣkriyasya me ||
क्व चैष व्यवहारो वा क्व च सा परमार्थता । (१०।१)
kva caiṣa vyavahāro vā kva ca sā paramārthatā |
क्व सुखं क्व च वा दुःखं निर्विमर्शस्य मे सदा ॥ (१०।२)
kva sukhaṃ kva ca vā duḥkhaṃ nirvimarśasya me sadā ||
क्व माया क्व च संसारः क्व प्रीतिर् विरतिः क्व वा । (११।१)
kva māyā kva ca saṃsāraḥ kva prītir viratiḥ kva vā |
क्व जीवः क्व च तद्ब्रह्म सर्वदा विमलस्य मे ॥ (११।२)
kva jīvaḥ kva ca tadbrahma sarvadā vimalasya me ||
क्व प्रवृत्तिर् निर्वृत्तिर् वा क्व मुक्तिः क्व च बन्धनम् । (१२।१)
kva pravṛttir nirvṛttir vā kva muktiḥ kva ca bandhanam |
कूटस्थनिर्विभागस्य स्वस्थस्य मम सर्वदा ॥ (१२।२)
kūṭasthanirvibhāgasya svasthasya mama sarvadā ||
क्वोपदेशः क्व वा शास्त्रं क्व शिष्यः क्व च वा गुरुः । (१३।१)
kvopadeśaḥ kva vā śāstraṃ kva śiṣyaḥ kva ca vā guruḥ |
क्व चास्ति पुरुषार्थो वा निरुपाधेः शिवस्य मे ॥ (१३।२)
kva cāsti puruṣārtho vā nirupādheḥ śivasya me ||
क्व चास्ति क्व च वा नास्ति क्वास्ति चैकं क्व च द्वयम् । (१४।१)
kva cāsti kva ca vā nāsti kvāsti caikaṃ kva ca dvayam |
बहुनात्र किम् उक्तेन किंचिन् नोत्तिष्ठते मम ॥ (१४।२)
bahunātra kim uktena kiṃcin nottiṣṭhate mama ||
Data courtesy of The Digital Corpus of Sanskrit.