जनक उवाच । (१।१)

कायकृत्यासहः पूर्वं ततो वाग्विस्तरासहः । (१।२)

अथ चिन्तासहस् तस्माद् एवम् एवाहम् आस्थितः ॥ (१।३)

प्रीत्यभावेन शब्दादेर् अदृश्यत्वेन चात्मनः । (२।१)

विक्षेपैकाग्रहृदय एवम् एवाहं आस्थितः ॥ (२।२)

समाध्यासादिविक्षिप्तौ व्यवहारः समाधये । (३।१)

एवं विलोक्य नियमम् एवम् एवाहम् आस्थितः ॥ (३।२)

हेयोपादेयविरहाद् एवं हर्षविषादयोः । (४।१)

अभावाद् अद्य हे ब्रह्मन्न् एवम् एवाहम् आस्थितः ॥ (४।२)

आश्रमानाश्रमं ध्यानं चित्तस्वीकृतवर्जनम् । (५।१)

विकल्पं मम वीक्ष्यैतैर् एवम् एवाहम् आस्थितः ॥ (५।२)

कर्मानुष्ठानम् अज्ञानाद् यथैवोपरमस् तथा । (६।१)

बुद्ध्वा सम्यग् इदं तत्त्वम् एवम् एवाहम् आस्थितः ॥ (६।२)

अचिन्त्यं चिन्त्यमानो ऽपि चिन्तारूपं भजत्य् असौ । (७।१)

त्यक्त्वा तद्भावनं तस्माद् एवम् एवाहम् आस्थितः ॥ (७।२)

एवम् एव कृतं येन स कृतार्थो भवेद् असौ । (८।१)

एवम् एव स्वभावो यः स कृतार्थो भवेद् असौ ॥ (८।२)