विनीतक्रोधः सहर्षः सहर्षीं भार्यां विन्देतानन्यपूर्वां यवीयसीम् ॥ (१।०)

असमानप्रवरैर् विवाहः । (२।१)

ऊर्ध्वं सप्तमात् पितृबन्धुभ्यः पञ्चमान् मातृबन्धुभ्यो बीजिनश्च ॥ (२।२)

कृत्तिकास्वातिपूर्वैर् इति वरयेत् ॥ (३।०)

मृगशिरःश्रविष्ठोत्तराणीत्य् उपयमेत् ॥ (४।०)

पञ्च विवाहकारकाणि भवन्ति वित्तं रूपं विद्या प्रज्ञा बान्धवमिति ॥ (५।०)

एकालाभे वित्तं विसृजेत् । (६।१)

द्वितीयालाभे रूपम् । (६।२)

तृतीयालाभे विद्याम् । (६।३)

प्रज्ञायां तु बान्धवे च विवदन्ते ॥ (६।४)

अनृक्षरा ऋजवः सन्तु पन्था येभिः सखायो यन्तु नो वरेयम् । (७।१)

समर्यमा सं भगो नो ऽनुनीयात् सं जास्पत्यं सुयममस्तु देवाः । (७।२)

इति वरकान् व्रजतो ऽनुमन्त्रयते ॥ (७।३)

बन्धुमतीं कन्याम् अस्पृष्टमैथुनाम् उपयच्छेतानग्निकां श्रेष्ठाम् ॥ (८।०)

विज्ञानमस्यै कुर्यात् । (९।१)

चतुरो लोष्टान् आहरेत् सीतालोष्टं वेदिलोष्टं गोमयलोष्टं श्मशानलोष्टं च ॥ (९।२)

तेषामेकं गृह्णीष्वेति ब्रूयात् । (१०।१)

श्मशानलोष्टं चेद् गृह्णीयान् नोपयच्छेत ॥ (१०।२)

असंस्पृष्टां धर्मेणोपयच्छेत ब्राह्मेण शौल्केन वा ॥ (११।०)

शतमितिरथं दद्याद् गोमिथुनं वा ॥ (१२।०)

उभयांस् तेजनीष्व् आसेज् जन्यान् कौमारिकांश् च । (१३।१)

पूर्वे जन्याः स्युर् अपरे कौमारिकाः ॥ (१३।२)

चतुरो गोमयपिण्डान् कृत्वा द्वाव् अन्येभ्यस् तथान्येभ्य इति प्रयच्छेत् ॥ (१४।०)

धनं न इति ब्रूयुः । (१५।१)

पुत्रपशवो न इति जन्याः ॥ (१५।२)

ददानि । (१६।१)

प्रतिगृह्णानीति त्रिर् ब्रह्मदेयाम् ॥ (१६।२)

कृतेनांसेन विसंकसेयुः ॥ (१७।०)

त्रिर् आनन्दं मागधो ह्वयेत् ॥ (१८।०)