उपनयनप्रभृति व्रतचारी स्यात् ॥ (१।०)

उपनयनेन व्रतादेशा व्याख्याताः ॥ (२।०)

मार्गवासाः संहतकेशः भैक्षाचर्यवृत्तिः सशल्कदण्डः सप्तमौञ्जीं मेखलां धारयेद् आचार्यस्याप्रतिकूलः सर्वकारी ॥ (३।०)

यदेनम् उपेयात् तद् अस्मै दद्यात् । (४।१)

बहूनां येन संयुक्तः ॥ (४।२)

नास्य शय्यामाविशेत् ॥ (५।०)

न रथमारोहेत् ॥ (६।०)

न संवसेत् ॥ (७।०)

न विहारार्थो जल्पेत् ॥ (८।०)

न रुच्यर्थः काञ्चनं धारयेत् ॥ (९।०)

सर्वाणि सांस्पर्शकानि स्त्रीभ्यो वर्जयेत् ॥ (१०।०)

न स्नायाद् दण्डवत् ॥ (११।०)

नोदकमभ्युपेयात् ॥ (१२।०)

न दिवा स्वपेत् ॥ (१३।०)

त्रैविद्यकं ब्रह्मचर्यं चरेत् ॥ (१४।०)

इन्द्रियसंयतः सायं प्रातर् भैक्ष्यवृत्तिः ॥ (१५।०)

सायं प्रातर् अग्निं परिचरेत् ॥ (१६।०)

अधःशायी आचार्याधीनवृत्तिः तन्निसर्गाद् अशनम् अयाचितं लवणम् ॥ (१७।०)

वाग्यतो ऽश्नीयात् ॥ (१८।०)

मधुमांसे वर्जयेत् ॥ (१९।०)

अच्छन्नवस्त्रां विवृतां स्त्रियं न पश्येत् ॥ (२०।०)

यौप्यस्य वृक्षस्य दण्डी स्यात् ॥ (२१।०)

नानेन प्रहरेद्गवे न ब्राह्मणाय ॥ (२२।०)

न नृत्यगीते गच्छेत् ॥ (२३।०)

न चैने कुर्यात् ॥ (२४।०)

नावलिखेत् ॥ (२५।०)

शिखाजटः सर्वजटो वा स्यात् ॥ (२६।०)

शाणीक्षौमाजिनवासाः ॥ (२७।०)

रक्तं वसनकम्बलम् ऐणेयं ब्राह्मणस्य रौरवं क्षत्रियस्य आजं वैश्यस्य ॥ (२८।०)

एतेन धर्मेण द्वादशवर्षाण्य् एकवेदे ब्रह्मचर्यं चरेत् । (२९।१)

चतुर्विंशति द्वयोः षट्त्रिंशति त्रयाणाम् अष्टाचत्वारिंशति सर्वेषाम् । (२९।२)

यावद् ग्रहणं वा ॥ (२९।३)

मलज्ञुरबलः कृशः स्नात्वा स सर्वं लभते यत् किंचिन् मनसेप्सितमिति ॥ (३०।०)

एतेन धर्मेण साध्व् अधीते ॥ (३१।०)

मन्त्रब्राह्मणान्यधीत्य कल्पं मीमांसां च याज्ञिको ऽधीत्य वक्त्रं पदं स्मृतिं चैच्छिकः ॥ (३२।०)

तौ स्नातकौ ॥ (३३।०)

श्रोत्रियो ऽन्यो वेदपाठी । (३४।१)

न तस्य स्नानम् ॥ (३४।२)

उपविश्याचमनं विधीयते । (३५।१)

अन्तर्जानु बाहू कृत्वा त्रिर् आचामेत् ॥ (३५।२)

द्विः परिमृजेत् । (३६।१)

खानि चोपस्पृशेच्छीर्षण्यानि ॥ (३६।२)