अथ प्रवदने कन्यामुपवसितां स्नातां सशिरस्काम् अहतेनाच्छिन्नदशेन वाससा संवीतां संस्तीर्णस्य पुरस्ताद् विहितानि वादित्राणि विधिवदुपकल्प्य पुरस्तात् स्विष्टकृतो वाचे पथ्यायै पूष्णे पृथिव्या अग्नये सेनायै धेनायै गायत्र्यै त्रिष्टुभे जगत्या अनुष्टुभे पङ्क्तये विराजे राकायै सिनीवाल्यै कुह्वै त्वष्ट्र आशायै सम्पत्त्यै भूत्यै निरृत्या अनुमत्यै पर्जन्यायाग्नये स्विष्टकृते च जुहुयात् ॥ (१।०)

आज्यशेषेण पाणी प्रलिप्य कन्याया मुखं संमार्ष्टि प्रियां करोमि पतये देवराणां श्वशुराय च । (२।१)

रुच्यै त्वाग्निः संसृजतु रुचिष्या पतये भव । (२।२)

सौभाग्येन त्वा संसृजत्व् इला देवी घृतपदीन्द्राण्य् अग्नाय्यश्विनी राट् । (२।३)

वागिला द्यौर् अरुन्धती । (२।४)

इति च ॥ (२।५)

सर्वाणि वादित्राण्य् अभिमन्त्रयते या चतुर्धा प्रवदत्य् अग्नौ या वाते या बृहत्युत । (३।१)

पशूनां यां ब्राह्मणे न्यदधुः शिवा सा प्रवदत्व् इह । (३।२)

इति ॥ (३।३)

सर्वाणि वादित्राण्य् अलंकृत्य कन्या प्रवादयते शुभं वद दुन्दुभे सुप्रजास्त्वाय गोमुख । (४।१)

प्रक्रीडन्तु कन्याः सुमनस्यमानाः सहेन्द्राण्या सवयसः सनीडाः । (४।२)

प्रजापतिर्यो वसति प्रजासु प्रजास् तन्वते सुमनस्यमानाः । (४।३)

स इमाः प्रजा रमयतु प्रजात्यै स्वयं च नो रमतां शं दधानः । (४।४)

इति ॥ (४।५)

प्रवदन्ति कारालिकानि ॥ (५।०)

कन्याम् उदकेनाभिषिञ्चेत् ॥ (६।०)