षोडशवर्षस्य गोदानम् । (१।१)

अग्निं वाध्येष्यमाणस्य । (१।२)

अग्निगोदानो मैत्रायणिः ॥ (१।३)

जटाकरणेनोक्तो मन्त्रविधिः ॥ (२।०)

उपस्थ उपकक्षयोश् चाधिको मन्त्रप्रयोगः । (३।१)

यत् क्षुरेण पर्चयता सुपेशसा वप्तर् वपसि केशश्मश्रून् । (३।२)

शुन्ध शिरो मुखं मास्यायुः प्रमोषीः । (३।३)

इति ॥ (३।४)

भूमौ केशान् निखनेत् ॥ (४।०)

अन्ते गां दद्यात् ॥ (५।०)

वेदे गुरुणानुज्ञातः स्नायात् ॥ (६।०)

छन्दस्य् अर्थान् बुद्ध्वा स्नास्यन् गां कारयेत् ॥ (७।०)

आचार्यमर्हयेत् ॥ (८।०)

आपो हि ष्ठेति तिसृभिः हिरण्यवर्णाः शुचय इति चतसृभिः स्नात्वाहते वाससी परिदधीत वस्वसि वसुमन्तं मां कुरु सौवर्चसाय वां तेजसे ब्रह्मवर्चसाय परिदधानीति ॥ (९।०)

विश्वजनस्य छायासीति छत्त्रं धारयते ॥ (१०।०)

मालामाबध्नीते याम् अश्विनौ धारयेतां बृहतीं पुष्करस्रजम् । (११।१)

तां विश्वैर् देवैर् अनुमतां मालामारोपयामि । (११।२)

इति ॥ (११।३)

तेजो ऽसीति हिरण्यं बिभृयात् ॥ (१२।०)

प्रतिष्ठे स्थो देवते मा मा संताप्तम् इत्युपानहौ ॥ (१३।०)

विष्टम्भो ऽसीति धारयेद्वैणवीं यष्टिम् ॥ (१४।०)

सोदकं च कमण्डलुम् ॥ (१५।०)

नित्यव्रतान्य् आहुर् आचार्याः ॥ (१६।०)

द्विवस्त्रो ऽत ऊर्ध्वम् । (१७।१)

शोभनं वासो भर्तव्यमिति श्रुतिः ॥ (१७।२)

आमन्त्र्य गुरून् गुर्वधीनांश्च स्वान् गृहान्व्रजेत् ॥ (१८।०)

प्रतिषिद्धम् अपरया द्वारा निःसरणं मलवद्वाससा सह सम्भाषा रजस्वद्वाससा सह शय्या गोर् गुरोर् दुरुक्तवचनम् अस्थाने शयनं स्थानं स्मयनं यानं गानं स्मरणमिति । (१९।१)

तानि वर्जयेत् ॥ (१९।२)

याजनं वृत्तिः । (२०।१)

उञ्छं शिलमयाचितप्रतिग्रहः साधुभ्यो वा याचितम् । (२०।२)

असंसिध्यमानायां वा वैश्यवृत्तिः ॥ (२०।३)

स्वाध्यायविरोधिनो ऽर्थान् उत्सृजेत् ॥ (२१।०)