अथ भूतानि वार्त्रघ्नशरेभ्यस् तत्र तत्रसुः । (१।१)

भेजे दिशः परित्यक्तमहेष्वासा च सा चमूः ॥ (१।२)

अपश्यद्भिर् इवेशानं रणान् निववृते गणैः । (२।१)

मुह्यतीव हि कृच्छ्रेषु सम्भ्रमज्वलितं मनः ॥ (२।२)

खण्डिताशंसया तेषां पराङ्मुखतया तया । (३।१)

आविवेश कृपा केतौ कृतोच्चैर्वानरं नरम् ॥ (३।२)

आस्थाम् आलम्ब्य नीतेषु वशं क्षुद्रेष्व् अरातिषु । (४।१)

व्यक्तिम् आयाति महतां माहात्म्यम् अनुकम्पया ॥ (४।२)

स सासिः सासुसूः सासो येयायेयाययाययः । (५।१)

ललौ लीलां ललो ऽलोलः शशीशशिशुशीः शशन् ॥ (५।२)

त्रासजिह्मं यतश् चैतान् मन्दम् एवान्वियाय सः । (६।१)

नातिपीडयितुं भग्नान् इच्छन्ति हि महौजसः ॥ (६।२)

अथाग्रे हसता साचिस्थितेन स्थिरकीर्तिना । (७।१)

सेनान्या ते जगदिरे किंचिदायस्तचेतसा ॥ (७।२)

मा विहासिष्ट समरं समरन्तव्यसंयतः । (८।१)

क्षतं क्षुण्णासुरगणैर् अगणैर् इव किं यशः ॥ (८।२)

विवस्वदंशुसंश्लेषद्विगुणीकृततेजसः । (९।१)

अमी वो मोघम् उद्गूर्णा हसन्तीव महासयः ॥ (९।२)

वने ऽवने वनसदां मार्गं मार्गम् उपेयुषाम् । (१०।१)

वाणैर् बाणैः समासक्तं शङ्के ऽशं केन शाम्यति ॥ (१०।२)

पातितोत्तुङ्गमाहात्म्यैः संहृतायतकीर्तिभिः । (११।१)

गुर्वीं काम् आपदं हन्तुं कृतम् आवृत्तिसाहसम् ॥ (११।२)

नासुरो ऽयं न वा नागो धरसंस्थो न राक्षसः । (१२।१)

ना सुखो ऽयं नवाभोगो धरणिस्थो हि राजसः ॥ (१२।२)

मन्दम् अस्यन्न् इषुलतां घृणया मुनिर् एष वः । (१३।१)

प्रणुदत्य् आगतावज्ञं जघनेषु पशून् इव ॥ (१३।२)

न नोननुन्नो ऽनुन्नेनो न ना नानानना ननु । (१४।१)

नुन्नो ऽनुन्नो न नुन्नेनो नानेनानुन्ननुन् न नुत् ॥ (१४।२)

वरं कृतध्वस्तगुणाद् अत्यन्तम् अगुणः पुमान् । (१५।१)

प्रकृत्या ह्य् अमणिः श्रेयान् नालंकारश् च्युतोपलः ॥ (१५।२)

स्यन्दना नो चतुरगाः सुरेभा वाविपत्तयः । (१६।१)

स्यन्दना नो च तुरगाः सुरेभावा विपत्तयः ॥ (१६।२)

भवद्भिर् अधुनारातिपरिहापितपौरुषैः । (१७।१)

ह्रदैर् इवार्कनिष्पीतैः प्राप्तः पङ्को दुरुत्सहः ॥ (१७।२)

वेत्रशाककुजे शैले ऽलेशैजे ऽकुकशात्रवे । (१८।१)

यात किं विदिशो जेतुं तुञ्जेशो दिवि किंतया ॥ (१८।२)

अयं वः क्लैब्यम् आपन्नान् दृष्टपृष्ठान् अरातिना । (१९।१)

इच्छतीशश् च्युताचारान् दारान् इव निगोपितुम् ॥ (१९।२)

ननु हो मथना राघो घोरा नाथमहो नु न । (२०।१)

तयदातवदा भीमा माभीदा बत दायत ॥ (२०।२)

किं त्यक्तापास्तदेवत्वमानुष्यकपरिग्रहैः । (२१।१)

ज्वलितान्यगुणैर् गुर्वी स्थिता तेजसि मान्यता ॥ (२१।२)

निशितासिरतो ऽभीको न्येजते ऽमरणा रुचा । (२२।१)

सारतो न विरोधी नः स्वाभासो भरवान् उत ॥ (२२।२)

तनुवारभसो भास्वान् अधीरो ऽविनतोरसा । (२३।१)

चारुणा रमते जन्ये को ऽभीतो रसिताशिनि ॥ (२३।२)

निर्भिन्नपातिताश्वीयनिरुद्धरथवर्त्मनि । (२४।१)

हतद्विपनगष्ठ्यूतरुधिराम्बुनदाकुले ॥ (२४।२)

देवाकानिनि कावादे वाहिकास्वस्वकाहि वा । (२५।१)

काकारेभभरे काका निस्वभव्यव्यभस्वनि ॥ (२५।२)

प्रनृत्तशववित्रस्ततुरगाक्षिप्तसारथौ । (२६।१)

मारुतापूर्णतूणीरविक्रुष्टहतसादिनि ॥ (२६।२)

ससत्त्वरतिदे नित्यं सदरामर्षनाशिनि । (२७।१)

त्वराधिककसन्नादे रमकत्वम् अकर्षति ॥ (२७।२)

आसुरे लोकवित्रासविधायिनि महाहवे । (२८।१)

युष्माभिर् उन्नतिं नीतं निरस्तम् इह पौरुषम् ॥ (२८।२)

इति शासति सेनान्यां गच्छतस् तान् अनेकधा । (२९।१)

निषिध्य हसता किंचित् तत्र तस्थे ऽन्धकारिणा ॥ (२९।२)

मुनीषुदहनातप्तांल्लज्जया निविवृत्सतः । (३०।१)

शिवः प्रह्लादयामास तान् निषेधहिमाम्बुना ॥ (३०।२)

दूनास् ते ऽरिबलाद् ऊना निरेभा बहु मेनिरे । (३१।१)

भीताः शितशराभीताः शंकरं तत्र शंकरम् ॥ (३१।२)

महेषुजलधौ शत्रोर् वर्तमाना दुरुत्तरे । (३२।१)

प्राप्य पारम् इवेशानम् आशश्वास पताकिनी ॥ (३२।२)

स बभार रणापेतां चमूं पश्चाद् अवस्थिताम् । (३३।१)

पुरः सूर्याद् उपावृत्तां छायाम् इव महातरुः ॥ (३३।२)

मुञ्चतीशे शराञ् जिष्णौ पिनाकस्वनपूरितः । (३४।१)

दध्वान ध्वनयन्न् आशाः स्फुटन्न् इव धराधरः ॥ (३४।२)

तद्गणा ददृशुर् भीमं चित्रसंस्था इवाचलाः । (३५।१)

विस्मयेन तयोर् युद्धं चित्रसंस्था इवाचलाः ॥ (३५।२)

परिमोहयमाणेन शिक्षालाघवलीलया । (३६।१)

जैष्णवी विशिखश्रेणी परिजह्रे पिनाकिना ॥ (३६।२)

अवद्यन् पत्रिणः शम्भोः सायकैर् अवसायकैः । (३७।१)

पाण्डवः परिचक्राम शिक्षया रणशिक्षया ॥ (३७।२)

चारचुञ्चुश् चिरारेची चञ्चच्चीररुचा रुचः । (३८।१)

चचार रुचिरश् चारु चारैर् आचारचञ्चुरः ॥ (३८।२)

स्फुरत्पिशङ्गमौर्वीकं धुनानः स बृहद्धनुः । (३९।१)

धृतोल्कानलयोगेन तुल्यम् अंशुमता बभौ ॥ (३९।२)

पार्थबाणाः पशुपतेर् आवव्रुर् विशिखावलिम् । (४०।१)

पयोमुच इवारन्ध्राः सावित्रीम् अंशुसंहतिम् ॥ (४०।२)

शरवृष्टिं विधूयोर्वीम् उदस्तां सव्यसाचिना । (४१।१)

रुरोध मार्गणैर् मार्गं तपनस्य त्रिलोचनः ॥ (४१।२)

तेन व्यातेनिरे भीमा भीमार्जनफलाननाः । (४२।१)

न नानुकम्प्य विशिखाः शिखाधरजवाससः ॥ (४२।२)

द्युवियद्गामिनी तारसंरावविहतश्रुतिः । (४३।१)

हैमीषुमाला शुशुभे विद्युताम् इव संहतिः ॥ (४३।२)

विलङ्घ्य पत्रिणां पङ्क्तिं भिन्नः शिवशिलीमुखैः । (४४।१)

ज्यायो वीर्यं समाश्रित्य न चकम्पे कपिध्वजः ॥ (४४।२)

जगतीशरणे युक्तो हरिकान्तः सुधासितः । (४५।१)

दानवर्षीकृताशंसो नागराज इवाबभौ ॥ (४५।२)

विफलीकृतयत्नस्य क्षतबाणस्य शम्भुना । (४६।१)

गाण्डीवधन्वनः खेभ्यो निश्चचार हुताशनः ॥ (४६।२)

स पिशङ्गजटावलिः किरन्न् उरुतेजः परमेण मन्युना । (४७।१)

ज्वलितौषधिजातवेदसा हिमशैलेन समं विदिद्युते ॥ (४७।२)

शतशो विशिखान् अवद्यते भृशम् अस्मै रणवेगशालिने । (४८।१)

प्रथयन्न् अनिवार्यवीर्यतां प्रजिगायेषुम् अघातुकं शिवः ॥ (४८।२)

शम्भो धनुर्मण्डलतः प्रवृत्तं तं मण्डलाद् अंशुम् इवांशुभर्तुः । (४९।१)

निवारयिष्यन् विदधे सिताश्वः शिलीमुखच्छायवृतां धरित्रीम् ॥ (४९।२)

घनं विदार्यार्जुनबाणपूगं ससारबाणो ऽयुग् अलोचनस्य । (५०।१)

घनं विदार्यार्जुनबाणपूगं ससार बाणो ऽयुगलोचनस्य ॥ (५०।२)

रुजन् परेषून् बहुधाशुपातिनो मुहुः शरौघैर् अपवारयन् दिशः । (५१।१)

चलाचलो ऽनेक इव क्रियावशान् महर्षिसंघैर् बुबुधे धनंजयः ॥ (५१।२)

विकाशम् ईयुर् जगतीशमार्गणा विकाशम् ईयुर् जगतीशमार्गणाः । (५२।१)

सम्पश्यताम् इति शिवेन वितायमानं लक्ष्मीवतः क्षितिपतेस् तनयस्य वीर्यम् । (५३।१)

अङ्गान्य् अभिन्नम् अपि तत्त्वविदां मुनीनां रोमाञ्चम् अञ्चिततरं बिभरांबभूवुः ॥ (५३।२)