Kir, 5
Select a line for its word-by-word analysis.
अथ जयाय नु मेरुमहीभृतो रभसया नु दिगन्तदिदृक्षया । (१।१)
atha jayāya nu merumahībhṛto rabhasayā nu digantadidṛkṣayā |
अभिययौ स हिमाचलम् उच्छ्रितं समुदितं नु विलङ्घयितुं नभः ॥ (१।२)
abhiyayau sa himācalam ucchritaṃ samuditaṃ nu vilaṅghayituṃ nabhaḥ ||
तपनमण्डलदीतितम् एकतः सततनैशतमोवृतम् अन्यतः । (२।१)
tapanamaṇḍaladītitam ekataḥ satatanaiśatamovṛtam anyataḥ |
हसितभिन्नतमिस्रचयं पुरः शिवम् इवानुगतं गजचर्मणा ॥ (२।२)
hasitabhinnatamisracayaṃ puraḥ śivam ivānugataṃ gajacarmaṇā ||
क्षितिनभःसुरलोकनिवासिभिः कृतनिकेतम् अदृष्टपरस्परैः । (३।१)
kṣitinabhaḥsuralokanivāsibhiḥ kṛtaniketam adṛṣṭaparasparaiḥ |
प्रथयितुं विभुताम् अभिनिर्मितं प्रतिनिधिं जगताम् इव शम्भुना ॥ (३।२)
prathayituṃ vibhutām abhinirmitaṃ pratinidhiṃ jagatām iva śambhunā ||
भुजगराजसितेन नभःश्रिया कनकराजिविराजितसानुना । (४।१)
bhujagarājasitena nabhaḥśriyā kanakarājivirājitasānunā |
समुदितं निचयेन तडित्वतीं लङ्घयता शरदम्बुदसंहतिम् ॥ (४।२)
samuditaṃ nicayena taḍitvatīṃ laṅghayatā śaradambudasaṃhatim ||
मणिमयूखचयांशुकभासुराः सुरवधूपरिभुक्तलतागृहाः । (५।१)
maṇimayūkhacayāṃśukabhāsurāḥ suravadhūparibhuktalatāgṛhāḥ |
दधतम् उच्चशिलान्तरगोपुराः पुर इवोदितपुष्पवना भुवः ॥ (५।२)
dadhatam uccaśilāntaragopurāḥ pura ivoditapuṣpavanā bhuvaḥ ||
अविरतोज्झितवारिविपाण्डुभिर् विरहितैर् अचिरद्युतितेजसा । (६।१)
aviratojjhitavārivipāṇḍubhir virahitair aciradyutitejasā |
उदितपक्षम् इवारतनिःस्वनैः पृथुनितम्बविलम्बिभिर् अम्बुदैः ॥ (६।२)
uditapakṣam ivārataniḥsvanaiḥ pṛthunitambavilambibhir ambudaiḥ ||
दधतम् आकरिभिः करिभिः क्षतैः समवतारसमैर् असमैस् तटैः । (७।१)
dadhatam ākaribhiḥ karibhiḥ kṣataiḥ samavatārasamair asamais taṭaiḥ |
विविधकामहिता महिताम्भसः स्फुटसरोजवना जवना नदीः ॥ (७।२)
vividhakāmahitā mahitāmbhasaḥ sphuṭasarojavanā javanā nadīḥ ||
नवविनिद्रजपाकुसुमत्विषां द्युतिमतां निकरेण महाश्मनाम् । (८।१)
navavinidrajapākusumatviṣāṃ dyutimatāṃ nikareṇa mahāśmanām |
विहितसांध्यमयूखम् इव क्वचिन् निचितकाञ्चनभित्तिषु सानुषु ॥ (८।२)
vihitasāṃdhyamayūkham iva kvacin nicitakāñcanabhittiṣu sānuṣu ||
पृथुकदम्बकदम्बकराजितं ग्रहितमालतमालवनाकुलम् । (९।१)
pṛthukadambakadambakarājitaṃ grahitamālatamālavanākulam |
लघुतुषारतुषारजलश्च्युतं धृतसदानसदाननदन्तिनम् ॥ (९।२)
laghutuṣāratuṣārajalaścyutaṃ dhṛtasadānasadānanadantinam ||
रहितरत्नचयान् न शिलोच्चयान् अफलताभवना न दरीभुवः । (१०।१)
rahitaratnacayān na śiloccayān aphalatābhavanā na darībhuvaḥ |
विपुलिनाम्बुरुहा न सरिद्वधूर् अकुसुमान् दधतं न महीरुहः ॥ (१०।२)
vipulināmburuhā na saridvadhūr akusumān dadhataṃ na mahīruhaḥ ||
व्यथितसिन्धुम् अनीरशनैः शनैर् अमरलोकवधूजघनैर् घनैः । (११।१)
vyathitasindhum anīraśanaiḥ śanair amaralokavadhūjaghanair ghanaiḥ |
फणभृताम् अभितो विततं ततं दयितरम्यलताबकुलैः कुलैः ॥ (११।२)
phaṇabhṛtām abhito vitataṃ tataṃ dayitaramyalatābakulaiḥ kulaiḥ ||
ससुरचापम् अनेकमणिप्रभैर् अपपयोविशदं हिमपाण्डुभिः । (१२।१)
sasuracāpam anekamaṇiprabhair apapayoviśadaṃ himapāṇḍubhiḥ |
अविचलं शिखरैर् उपबिभ्रतं ध्वनितसूचितम् अम्बुमुचां चयम् ॥ (१२।२)
avicalaṃ śikharair upabibhrataṃ dhvanitasūcitam ambumucāṃ cayam ||
विकचवारिरुहं दधतं सरः सकलहंसगणं शुचि मानसम् । (१३।१)
vikacavāriruhaṃ dadhataṃ saraḥ sakalahaṃsagaṇaṃ śuci mānasam |
शिवम् अगात्मजया च कृतेर्ष्यया सकलहं सगणं शुचिमानसम् ॥ (१३।२)
śivam agātmajayā ca kṛterṣyayā sakalahaṃ sagaṇaṃ śucimānasam ||
ग्रहविमानगणान् अभितो दिवं ज्वलयतौषधिजेन कृशानुना । (१४।१)
grahavimānagaṇān abhito divaṃ jvalayatauṣadhijena kṛśānunā |
मुहुर् अनुस्मरयन्तम् अनुक्षपं त्रिपुरदाहम् उमापतिसेविनः ॥ (१४।२)
muhur anusmarayantam anukṣapaṃ tripuradāham umāpatisevinaḥ ||
विततशीकरराशिभिर् उच्छ्रितैर् उपलरोधविवर्तिभिर् अम्बुभिः । (१५।१)
vitataśīkararāśibhir ucchritair upalarodhavivartibhir ambubhiḥ |
दधतम् उन्नतसानुसमुद्धतां धृतसितव्यजनाम् इव जाह्नवीम् ॥ (१५।२)
dadhatam unnatasānusamuddhatāṃ dhṛtasitavyajanām iva jāhnavīm ||
अनुचरेण धनाधिपतेर् अथो नगविलोकनविस्मितमानसः । (१६।१)
anucareṇa dhanādhipater atho nagavilokanavismitamānasaḥ |
स जगदे वचनं प्रियम् आदरान् मुखरतावसरे हि विराजते ॥ (१६।२)
sa jagade vacanaṃ priyam ādarān mukharatāvasare hi virājate ||
अलम् एष विलोकितः प्रजानां सहसा संहतिम् अंहसां विहन्तुम् । (१७।१)
alam eṣa vilokitaḥ prajānāṃ sahasā saṃhatim aṃhasāṃ vihantum |
घनवर्त्म सहस्रधेव कुर्वन् हिमगौरैर् अचलाधिपः शिरोभिः ॥ (१७।२)
ghanavartma sahasradheva kurvan himagaurair acalādhipaḥ śirobhiḥ ||
इह दुरधिगमैः किंचिद् एवागमैः सततम् असुतरं वर्णयन्त्य् अन्तरम् । (१८।१)
iha duradhigamaiḥ kiṃcid evāgamaiḥ satatam asutaraṃ varṇayanty antaram |
अमुम् अतिविपिनं वेद दिग्व्यापिनं पुरुषम् इव परं पद्मयोनिः परम् ॥ (१८।२)
amum ativipinaṃ veda digvyāpinaṃ puruṣam iva paraṃ padmayoniḥ param ||
रुचिरपल्लवपुष्पलतागृहैर् उपलसज्जलजैर् जलराशिभिः । (१९।१)
rucirapallavapuṣpalatāgṛhair upalasajjalajair jalarāśibhiḥ |
नयति संततम् उत्सुकताम् अयं धृतिमतीर् उपकान्तम् अपि स्त्रियः ॥ (१९।२)
nayati saṃtatam utsukatām ayaṃ dhṛtimatīr upakāntam api striyaḥ ||
सुलभैः सदा नयवतायवता निधिगुह्यकाधिपरमैः परमैः । (२०।१)
sulabhaiḥ sadā nayavatāyavatā nidhiguhyakādhiparamaiḥ paramaiḥ |
अमुना धनैः क्षितिभृतातिभृता समतीत्य भाति जगती जगती ॥ (२०।२)
amunā dhanaiḥ kṣitibhṛtātibhṛtā samatītya bhāti jagatī jagatī ||
अखिलम् इदम् अमुष्य गैरीगुरोस् त्रिभुवनम् अपि नैति मन्ये तुलाम् । (२१।१)
akhilam idam amuṣya gairīguros tribhuvanam api naiti manye tulām |
अधिवसति सदा यद् एनं जनैर् अविदितविभवो भवानीपतिः ॥ (२१।२)
adhivasati sadā yad enaṃ janair aviditavibhavo bhavānīpatiḥ ||
वीतजन्मजरसं परं शुचि ब्रह्मणः पदम् उपैतुम् इच्छताम् । (२२।१)
vītajanmajarasaṃ paraṃ śuci brahmaṇaḥ padam upaitum icchatām |
आगमाद् इव तमोऽपहाद् इतः सम्भवन्ति मतयो भवच्छिदः ॥ (२२।२)
āgamād iva tamo'pahād itaḥ sambhavanti matayo bhavacchidaḥ ||
दिव्यस्त्रीणां सचरणलाक्षारागा रागायाते निपतितपुष्पापीडाः । (२३।१)
divyastrīṇāṃ sacaraṇalākṣārāgā rāgāyāte nipatitapuṣpāpīḍāḥ |
पीडाभाजः कुसुमचिताः साशंसं शंसन्त्य् अस्मिन् सुरतविशेषं शय्याः ॥ (२३।२)
pīḍābhājaḥ kusumacitāḥ sāśaṃsaṃ śaṃsanty asmin surataviśeṣaṃ śayyāḥ ||
गुणसम्पदा समधिगम्य परं महिमानम् अत्र महिते जगताम् । (२४।१)
guṇasampadā samadhigamya paraṃ mahimānam atra mahite jagatām |
नयशालिनि श्रिय इवाधिपतौ विरमन्ति न ज्वलितुम् औषधयः ॥ (२४।२)
nayaśālini śriya ivādhipatau viramanti na jvalitum auṣadhayaḥ ||
कुररीगणः कृतरवस् तरवः कुसुमानताः सकमलं कमलम् । (२५।१)
kurarīgaṇaḥ kṛtaravas taravaḥ kusumānatāḥ sakamalaṃ kamalam |
इह सिन्धवश् च वरणावरणाः करिणां मुदे सनलदानलदाः ॥ (२५।२)
iha sindhavaś ca varaṇāvaraṇāḥ kariṇāṃ mude sanaladānaladāḥ ||
सादृश्यं गतम् अपनिद्रचूतगन्धैर् आमोदं मदजलसेकजं दधानः । (२६।१)
sādṛśyaṃ gatam apanidracūtagandhair āmodaṃ madajalasekajaṃ dadhānaḥ |
एतस्मिन् मदयति कोकिलान् अकाले लीनालिः सुरकरिणां कपोलकाषः ॥ (२६।२)
etasmin madayati kokilān akāle līnāliḥ surakariṇāṃ kapolakāṣaḥ ||
सनाकवनितं नितम्बरुचिरं चिरं सुनिनदैर् नदैर् वृतम् अमुम् । (२७।१)
sanākavanitaṃ nitambaruciraṃ ciraṃ suninadair nadair vṛtam amum |
मता फलवतो ऽवतो रसपरा परास्तवसुधा सुधाधिवसति ॥ (२७।२)
matā phalavato 'vato rasaparā parāstavasudhā sudhādhivasati ||
श्रीमल्लताभवनम् ओषधयः प्रदीपाः शय्या नवानि हरिचन्दनपल्लवानि । (२८।१)
śrīmallatābhavanam oṣadhayaḥ pradīpāḥ śayyā navāni haricandanapallavāni |
अस्मिन् रतिश्रमनुदश् च सरोजवाताः स्मर्तुं दिशन्ति न दिवः सुरसुन्दरीभ्यः ॥ (२८।२)
asmin ratiśramanudaś ca sarojavātāḥ smartuṃ diśanti na divaḥ surasundarībhyaḥ ||
ईशार्थम् अम्भसि चिराय तपश् चरन्त्या यादोविलङ्घनविलोलविलोचनायाः । (२९।१)
īśārtham ambhasi cirāya tapaś carantyā yādovilaṅghanavilolavilocanāyāḥ |
आलम्बताग्रकरम् अत्र भवो भवान्याः च्योतन्निदाघसलिलाङ्गुलिना करेण ॥ (२९।२)
ālambatāgrakaram atra bhavo bhavānyāḥ cyotannidāghasalilāṅgulinā kareṇa ||
येनापविद्धसलिलः स्फुटनागसद्मा देवासुरैर् अमृतम् अम्बुनिधिर् ममन्थे । (३०।१)
yenāpaviddhasalilaḥ sphuṭanāgasadmā devāsurair amṛtam ambunidhir mamanthe |
व्यावर्तनैर् अहिपतेर् अयम् आहिताङ्कः खं व्यालिखन्न् इव विभाति स मन्दराद्रिः ॥ (३०।२)
vyāvartanair ahipater ayam āhitāṅkaḥ khaṃ vyālikhann iva vibhāti sa mandarādriḥ ||
नीतोच्छ्रायं मुहुर् अशिशिररश्मेर् उस्रैर् आनीलाभैर् विरचितपरभागा रत्नैः । (३१।१)
nītocchrāyaṃ muhur aśiśiraraśmer usrair ānīlābhair viracitaparabhāgā ratnaiḥ |
ज्योत्स्नाशङ्काम् इव वितरति हंसश्येनी मध्ये ऽप्य् अह्नः स्फटिकरजतभित्तिच्छाया ॥ (३१।२)
jyotsnāśaṅkām iva vitarati haṃsaśyenī madhye 'py ahnaḥ sphaṭikarajatabhitticchāyā ||
दधत इव विलासशालि नृत्यं मृदु पतता पवनेन कम्पितानि । (३२।१)
dadhata iva vilāsaśāli nṛtyaṃ mṛdu patatā pavanena kampitāni |
इह ललितविलासिनीजनभ्रूगतिकुटिलेषु पयःसु पङ्कजानि ॥ (३२।२)
iha lalitavilāsinījanabhrūgatikuṭileṣu payaḥsu paṅkajāni ||
अस्मिन्न् अगृह्यत पिनाकभृता सलीलम् आबद्धवेपथुर् अधीरविलोचनायाः । (३३।१)
asminn agṛhyata pinākabhṛtā salīlam ābaddhavepathur adhīravilocanāyāḥ |
विन्यस्तमङ्गलमहौषधिर् ईश्वरायाः स्रस्तोरगप्रतिसरेण करेण पाणिः ॥ (३३।२)
vinyastamaṅgalamahauṣadhir īśvarāyāḥ srastoragapratisareṇa kareṇa pāṇiḥ ||
क्रामद्भिर् घनपदवीम् अनेकसंख्यैस् तेजोभिः शुचिमणिजन्मभिर् विभिन्नः । (३४।१)
krāmadbhir ghanapadavīm anekasaṃkhyais tejobhiḥ śucimaṇijanmabhir vibhinnaḥ |
उस्राणां व्यभिचरतीव सप्तसप्तेः पर्यस्यन्न् इह निचयः सहस्रसंख्याम् ॥ (३४।२)
usrāṇāṃ vyabhicaratīva saptasapteḥ paryasyann iha nicayaḥ sahasrasaṃkhyām ||
व्यधत्त यस्मिन् पुरम् उच्चगोपुरं पुरां विजेतुर् धृतये धनाधिपः । (३५।१)
vyadhatta yasmin puram uccagopuraṃ purāṃ vijetur dhṛtaye dhanādhipaḥ |
स एष कैलास उपान्तसर्पिणः करोत्य् अकालास्तमयं विवस्वतः ॥ (३५।२)
sa eṣa kailāsa upāntasarpiṇaḥ karoty akālāstamayaṃ vivasvataḥ ||
नानारत्नज्योतिषां संनिपातैश् छन्नेष्व् अन्तःसानु वप्रान्तरेषु । (३६।१)
nānāratnajyotiṣāṃ saṃnipātaiś channeṣv antaḥsānu vaprāntareṣu |
बद्धां बद्धां भित्तिशङ्काम् अमुष्मिन् नावानावान् मातरिश्वा निहन्ति ॥ (३६।२)
baddhāṃ baddhāṃ bhittiśaṅkām amuṣmin nāvānāvān mātariśvā nihanti ||
रम्या नवद्युतिर् अपैति न शाद्वलेभ्यः श्यामीभवन्त्यनुदिनं नलिनीवनानि । (३७।१)
ramyā navadyutir apaiti na śādvalebhyaḥ śyāmībhavantyanudinaṃ nalinīvanāni |
अस्मिन् विचित्रकुसुमस्तबकाचितानां शाखाभृतां परिणमन्ति न पल्लवानि ॥ (३७।२)
asmin vicitrakusumastabakācitānāṃ śākhābhṛtāṃ pariṇamanti na pallavāni ||
परिसरविषयेषु लीढमुक्ता हरिततृणोद्गमशङ्कया मृगीभिः । (३८।१)
parisaraviṣayeṣu līḍhamuktā haritatṛṇodgamaśaṅkayā mṛgībhiḥ |
इह नवशुककोमला मणीनां रविकरसंवलिताः फलन्ति भासः ॥ (३८।२)
iha navaśukakomalā maṇīnāṃ ravikarasaṃvalitāḥ phalanti bhāsaḥ ||
उत्फुल्लस्थलनलिनीवनाद् अमुष्माद् उद्धूतः सरसिजसम्भवः परागः । (३९।१)
utphullasthalanalinīvanād amuṣmād uddhūtaḥ sarasijasambhavaḥ parāgaḥ |
वात्याभिर् वियति विवर्तितः समन्ताद् आधत्ते कनकमयातपत्रलक्ष्मीम् ॥ (३९।२)
vātyābhir viyati vivartitaḥ samantād ādhatte kanakamayātapatralakṣmīm ||
इह सनियमयोः सुरापगायाम् उषसि सयावकसव्यपादरेखा । (४०।१)
iha saniyamayoḥ surāpagāyām uṣasi sayāvakasavyapādarekhā |
कथयति शिवयोः शरीरयोगं विषमपदा पदवी विवर्तनेषु ॥ (४०।२)
kathayati śivayoḥ śarīrayogaṃ viṣamapadā padavī vivartaneṣu ||
संमूर्छतां रजतभित्तिमयूखजालैर् आलोकपादपलतान्तरनिर्गतानाम् । (४१।१)
saṃmūrchatāṃ rajatabhittimayūkhajālair ālokapādapalatāntaranirgatānām |
घर्मद्युतेर् इह मुहुः पटलानि धाम्नाम् आदर्शमण्डलनिभानि समुल्लसन्ति ॥ (४१।२)
gharmadyuter iha muhuḥ paṭalāni dhāmnām ādarśamaṇḍalanibhāni samullasanti ||
शुक्लैर् मयूखनिचयैः परिवीतमूर्तिर् वप्राभिघातपरिमण्डलितोरुदेहः । (४२।१)
śuklair mayūkhanicayaiḥ parivītamūrtir vaprābhighātaparimaṇḍalitorudehaḥ |
शृङ्गाण्य् अमुष्य भजते गणभर्तुर् उक्षा कुर्वन् वधूजनमनःसु शशाङ्कशङ्काम् ॥ (४२।२)
śṛṅgāṇy amuṣya bhajate gaṇabhartur ukṣā kurvan vadhūjanamanaḥsu śaśāṅkaśaṅkām ||
सम्प्रति लब्धजन्म शनकैः कथमपि लघुनि क्षीणपयस्युपेयुषि भिदां जलधरपटले । (४३।१)
samprati labdhajanma śanakaiḥ kathamapi laghuni kṣīṇapayasyupeyuṣi bhidāṃ jaladharapaṭale |
खण्डितविग्रहं बलभिदो धनुर् इह विविधाः पूरयितुं भवन्ति विभवः शिखरमणिरुचः ॥ (४३।२)
khaṇḍitavigrahaṃ balabhido dhanur iha vividhāḥ pūrayituṃ bhavanti vibhavaḥ śikharamaṇirucaḥ ||
स्नपितनवलतातरुप्रवालैर् अमृतलवस्रुतिशालिभिर् मयूखैः । (४४।१)
snapitanavalatātarupravālair amṛtalavasrutiśālibhir mayūkhaiḥ |
सततम् असितयामिनीषु शम्भो अमलयतीह वनान्तम् इन्दुलेखा ॥ (४४।२)
satatam asitayāminīṣu śambho amalayatīha vanāntam indulekhā ||
क्षिपति यो ऽनुवनं विततां बृहद्बृहतिकाम् इव रौचनिकीं रुचम् । (४५।१)
kṣipati yo 'nuvanaṃ vitatāṃ bṛhadbṛhatikām iva raucanikīṃ rucam |
अयम् अनेकहिरण्मयकंदरस् तव पितुर् दयितो जगतीधरः ॥ (४५।२)
ayam anekahiraṇmayakaṃdaras tava pitur dayito jagatīdharaḥ ||
सक्तिं लवाद् अपनयत्यनिले लतानां वैरोचनैर्द्विगुणिताः सहसा मयूखैः । (४६।१)
saktiṃ lavād apanayatyanile latānāṃ vairocanairdviguṇitāḥ sahasā mayūkhaiḥ |
रोधोभुवां मुहुर् अमुत्र हिरण्मयीनां भासस् तडिद्विलसितानि विडम्बयन्ति ॥ (४६।२)
rodhobhuvāṃ muhur amutra hiraṇmayīnāṃ bhāsas taḍidvilasitāni viḍambayanti ||
कषणकम्पनिरस्तमहाहिभिः क्षणविमत्तमतङ्गजवर्जितैः । (४७।१)
kaṣaṇakampanirastamahāhibhiḥ kṣaṇavimattamataṅgajavarjitaiḥ |
इह मदस्नपितैर् अनुमीयते सुरगजस्य गतं हरिचन्दनैः ॥ (४७।२)
iha madasnapitair anumīyate suragajasya gataṃ haricandanaiḥ ||
जलदजालघनैर् असिताश्मनाम् उपहतप्रचयेह मरीचिभिः । (४८।१)
jaladajālaghanair asitāśmanām upahatapracayeha marīcibhiḥ |
भवति दीप्तिर् अदीपितकंदरा तिमिरसंवलितेव विवस्वतः ॥ (४८।२)
bhavati dīptir adīpitakaṃdarā timirasaṃvaliteva vivasvataḥ ||
भव्यो भवन्न् अपि मुनेर् इह शासनेन क्षात्रे स्थितः पथि तपस्य हतप्रमादः । (४९।१)
bhavyo bhavann api muner iha śāsanena kṣātre sthitaḥ pathi tapasya hatapramādaḥ |
प्रायेण सत्य् अपि हितार्थकरे विधौ हि श्रेयांसि लब्धुम् असुखानि विनान्तरायैः ॥ (४९।२)
prāyeṇa saty api hitārthakare vidhau hi śreyāṃsi labdhum asukhāni vināntarāyaiḥ ||
मा भूवन्न् अपथहृतस् तवेन्द्रियाश्वाः संतापे दिशतु शिवः शिवां प्रसक्तिम् । (५०।१)
mā bhūvann apathahṛtas tavendriyāśvāḥ saṃtāpe diśatu śivaḥ śivāṃ prasaktim |
रक्षन्तस् तपसि बलं च लोकपालाः कल्याणीम् अधिकफलां क्रियां क्रियायुः ॥ (५०।२)
rakṣantas tapasi balaṃ ca lokapālāḥ kalyāṇīm adhikaphalāṃ kriyāṃ kriyāyuḥ ||
इत्युक्त्वा सपदि हितं प्रियं प्रियार्हे धाम स्वं गतवति राजराजभृत्ये । (५१।१)
ityuktvā sapadi hitaṃ priyaṃ priyārhe dhāma svaṃ gatavati rājarājabhṛtye |
सोत्कण्ठं किमपि पृथासुतः प्रदध्यौ संधत्ते भृशम् अरतिं हि सद्वियोगः ॥ (५१।२)
sotkaṇṭhaṃ kimapi pṛthāsutaḥ pradadhyau saṃdhatte bhṛśam aratiṃ hi sadviyogaḥ ||
तम् अनतिशयनीयं सर्वतः सारयोगाद् अविरहितम् अनेकेनाङ्कभाजा फलेन । (५२।१)
tam anatiśayanīyaṃ sarvataḥ sārayogād avirahitam anekenāṅkabhājā phalena |
अकृशम् अकृशलक्ष्मीश् चेतसाशंसितं स स्वम् इव पुरुषकारं शैलम् अभ्याससाद ॥ (५२।२)
akṛśam akṛśalakṣmīś cetasāśaṃsitaṃ sa svam iva puruṣakāraṃ śailam abhyāsasāda ||
Data courtesy of The Digital Corpus of Sanskrit.