ततः किराताधिपतेर् अलघ्वीम् आजिक्रियां वीक्ष्य विवृद्धमन्युः । (१।१)

स तर्कयामास विविक्ततर्कश् चिरं विचिन्वन्न् इति कारणानि ॥ (१।२)

मदस्रुतिश्यामितगण्डलेखाः क्रामन्ति विक्रान्तनराधिरूढाः । (२।१)

सहिष्णवो नेह युधाम् अभिज्ञा नागा नगोच्छ्रायम् इवाक्षिपन्तः ॥ (२।२)

विचित्रया चित्रयतेव भिन्नां रुचं रवेः केतनरत्नभासा । (३।१)

महारथौघेन न संनिरुद्धाः पयोदमन्द्रध्वनिना धरित्री ॥ (३।२)

समुल्लसत्प्रासमहोर्मिमालं परिस्फुरच्चामरफेनपङ्क्ति । (४।१)

विभिन्नमर्यादम् इहातनोति नाश्वीयम् आशा जलधेर् इवाम्भः ॥ (४।२)

हताहतेत्य् उद्धतभीष्मघोषैः समुझिता योद्धृभिर् अभ्यमित्रम् । (५।१)

न हेतयः प्राप्ततडित्त्विषः खे विवस्वदंशुज्वलिताः पतन्ति ॥ (५।२)

अभ्यायतः संततधूमधूम्रं व्यापि प्रभाजालम् इवान्तकस्य । (६।१)

रजः प्रतूर्णाश्वरथाङ्गनुन्नं तनोति न व्योमनि मातरिश्वा ॥ (६।२)

भूरेणुना रासभधूसरेण तिरोहिते वर्त्मनि लोचनानाम् । (७।१)

नास्त्य् अत्र तेजस्विभिर् उत्सुकानाम् अह्नि प्रदोषः सुरसुन्दरीणाम् ॥ (७।२)

रथाङ्गसंक्रीडितम् अश्वहेषा बृहन्ति मत्तद्विपबृंहितानि । (८।१)

संघर्षयोगाद् इव मूर्छितानि ह्रादं निगृह्णन्ति न दुन्दुभीनाम् ॥ (८।२)

अस्मिन् यशःपौरुषलोलुपानाम् अरातिभिः प्रत्युरसं क्षतानाम् । (९।१)

मूर्छान्तरायं मुहुर् उच्छिनत्ति नासारशीतं करिशीकराम्भः ॥ (९।२)

असृङ्नदीनाम् उपचीयमानैर् विदारयद्भिः पदवीं ध्वजिन्याः । (१०।१)

उच्छ्रायम् आयान्ति न शोणितौघैः पङ्कैर् इवाश्यानघनैस् तटानि ॥ (१०।२)

परिक्षते वक्षसि दन्तिदन्तैः प्रियाङ्कशीता नभसः पतन्ती । (११।१)

नेह प्रमोहं प्रियसाहसानां मन्दारमाला विरलीकरोति ॥ (११।२)

निषादिसंनाहमणिप्रभौघे परीयमाणे करिशीकरेण । (१२।१)

अर्कत्विषोन्मीलितम् अभ्युदेति न खण्डम् आखण्डलकार्मुकस्य ॥ (१२।२)

महीभृता पक्षवतेव भिन्ना विगाह्य मध्यं परवारणेन । (१३।१)

नावर्तमाना निनदन्ति भीमम् अपां निधेर् आप इव ध्वजिन्यः ॥ (१३।२)

महारथानां प्रतिदन्त्यनीकम् अधिस्यदस्यन्दनम् उत्थितानाम् । (१४।१)

आमूललूनैर् अतिमन्युनेव मातङ्गहस्तैर् व्रियते न पन्थाः ॥ (१४।२)

धृतोत्पलापीड इव प्रियायाः शिरोरुहाणां शिथिलः कलापः । (१५।१)

न बर्हभारः पतितस्य शङ्कोर् निषादिवक्षःस्थलम् आतनोति ॥ (१५।२)

उझत्सु संहार इवास्तसंख्यम् अह्नाय तेजस्विषु जीवितानि । (१६।१)

लोकत्रयास्वादनलोलजिह्वं न व्याददात्य् आननम् अत्र मृत्युः ॥ (१६।२)

इयं च दुर्वारमहारथानाम् आक्षिप्य वीर्यं महतां बलानाम् । (१७।१)

शक्तिर् ममावस्यति हीनयुद्धे सौरीव ताराधिपधाम्नि दीप्तिः ॥ (१७।२)

माया स्विद् एषा मतिविभ्रमो वा ध्वस्तं नु मे वीर्यम् उताहम् अन्यः । (१८।१)

गाण्डीवमुक्ता हि यथा पुरा मे पराक्रमन्ते न शराः किराते ॥ (१८।२)

पुंसः पदं मध्यमम् उत्तमस्य द्विधेव कुर्वन् धनुषः प्रणादैः । (१९।१)

नूनं तथा नैषा यथास्य वेषः प्रच्छन्नम् अप्य् ऊहयते हि चेष्टा ॥ (१९।२)

धनुः प्रबन्धध्वनितं रुषेव सकृद् विकृष्टा विततेव मौर्वी । (२०।१)

संधानम् उत्कर्षम् इव व्युदस्य मुष्टेर् असंभेद इवापवर्गे ॥ (२०।२)

अंसाव् अवष्टब्धनतौ समाधिः शिरोधराया रहितप्रयासः । (२१।१)

धृता विकारांस् त्यजता मुखेन प्रसादलक्ष्मीः शशलाञ्छनस्य ॥ (२१।२)

प्रहीयते कार्यवशागतेषु स्थानेषु विष्टब्धतया न देहः । (२२।१)

स्थितप्रयातेषु ससौष्ठवश् च लक्ष्येषु पातः सदृशः शराणाम् ॥ (२२।२)

परस्य भूयान् विवरे ऽभियोगः प्रसह्य संरक्षणम् आत्मरन्ध्रे । (२३।१)

भीष्मे ऽप्य् असंभाव्यम् इदं गुरौ वा न सम्भवत्य् एव वनेचरेषु ॥ (२३।२)

अप्राकृतस्याहवदुर्मदस्य निवार्यम् अस्यास्त्रबलेन वीर्यम् । (२४।१)

अल्पीयसो ऽप्य् आमयतुल्यवृत्तेर् महापकाराय रिपोर् विवृद्धिः ॥ (२४।२)

स सम्प्रधार्यैवम् अहार्यसारः सारं विनेष्यन् सगणस्य शत्रोः । (२५।१)

प्रस्वापनास्त्रं द्रुतम् आजहार ध्वान्तं घनानद्ध इवार्धरात्रः ॥ (२५।२)

प्रसक्तदावानलधूमधूम्रा निरुन्धती धाम सहस्ररश्मेः । (२६।१)

महावनानीव महातमिस्रा छाया ततानेशबलानि काली ॥ (२६।२)

आसादिता तत्प्रथमं प्रसह्य प्रगल्भतायाः पदवीं हरन्ती । (२७।१)

सभेव भीमा विदधे गणानां निद्रा निरासं प्रतिभागुणस्य ॥ (२७।२)

गुरुस्थिराण्य् उत्तमवंशजत्वाद् विज्ञातसाराण्य् अनुशीलनेन । (२८।१)

केचित् समाश्रित्य गुणान् वितानि सुहृत्कुलानीव धनूंषि तस्थुः ॥ (२८।२)

कृतान्तदुर्वृत्त इवापरेषां पुरः प्रतिद्वन्द्विनि पाण्डवास्त्रे । (२९।१)

अतर्कितं पाणितलान् निपेतुः क्रियाफलानीव तदायुधानि ॥ (२९।२)

अंसस्थलैः केचिद् अभिन्नधैर्याः स्कन्धेषु संश्लेषवतां तरूणाम् । (३०।१)

मदेन मीलन्नयनाः सलीलं नागा इव स्रस्तकरा निषेदुः ॥ (३०।२)

तिरोहितेन्दोर् अथ शम्भुमूर्ध्नः प्रणम्यमानं तपसां निवासैः । (३१।१)

सुमेरुशृङ्गाद् इव बिम्बम् आर्कं पिशङ्गम् उच्चैर् उदियाय तेजः ॥ (३१।२)

छायां विनिर्धूय तमोमयीं तां तत्त्वस्य संवित्तिर् इवापविद्याम् । (३२।१)

ययौ विकासं द्युतिर् इन्दुमौलेर् आलोकम् अभ्यादिशती गणेभ्यः ॥ (३२।२)

त्विषां ततिः पाटलिताम्बुवाहा सा सर्वतः पूर्वसरीव संध्या । (३३।१)

निनाय तेषां द्रुतम् उल्लसन्ती विनिद्रतां लोचनपङ्कजानि ॥ (३३।२)

पृथग्विधान्य् अस्त्रविरामबुद्धाः शस्त्राणि भूयः प्रतिपेदिरे ते । (३४।१)

मुक्ता वितानेन बलाहकानां ज्योतींषि रम्या इव दिग्विभागाः ॥ (३४।२)

द्यौर् उन्ननामेव दिशः प्रसेदुः स्फुटं विसस्रे सवितुर् मयूखैः । (३५।१)

क्षयं गतायाम् इव यामवत्यां पुनः समीयाय दिनं दिनश्रीः ॥ (३५।२)

महास्त्रदुर्गे शिथिलप्रयत्नं दिग्वारणेनेव परेण रुग्णे । (३६।१)

भुजङ्गपाशान् भुजवीर्यशाली प्रबन्धनाय प्रजिघाय जिष्णुः ॥ (३६।२)

जिह्वाशतान्य् उल्लसयन्त्य् अजस्रं लसत्तडिल्लोलविषानलानि । (३७।१)

त्रासान् निरस्तां भुजगेन्द्रसेना नभश्चरैस् तत्पदवीं विवव्रे ॥ (३७।२)

दिङ्नागहस्ताकृतिम् उद्वहद्भिर् भोगैः प्रशस्तासितरत्ननीलैः । (३८।१)

रराज सर्पावलिर् उल्लसन्ती तरङ्गमालेव नभोऽर्णवस्य ॥ (३८।२)

निःश्वासधूमैः स्थगितांशुजालं फणावताम् उत्फणमण्डलानाम् । (३९।१)

गच्छन्न् इवास्तं वपुर् अभ्युवाह विलोचनानां सुखम् उष्णरश्मिः ॥ (३९।२)

प्रतप्तचामीकरभासुरेण दिशः प्रकाशेन पिशङ्गयन्त्यः । (४०।१)

निश्चक्रमुः प्राणहरेक्षणानां ज्वाला महोल्का इव लोचनेभ्यः ॥ (४०।२)

आक्षिप्तसम्पातम् अपेतशोभम् उद्वह्नि धूमाकुलदिग्विभागम् । (४१।१)

वृतं नभो भोगिकुलैर् अवस्थां परोपरुद्धस्य पुरस्य भेजे ॥ (४१।२)

तम् आशु चक्षुःश्रवसां समूहं मन्त्रेण तार्क्ष्योदयकारणेन । (४२।१)

नेता नयेनेव परोपजापं निवारयामास पतिः पशूनाम् ॥ (४२।२)

प्रतिघ्नतीभिः कृतमीलितानि द्युलोकभाजाम् अपि लोचनानि । (४३।१)

गरुत्मता संहतिभिर् विहायः क्षणप्रकाशाभिर् इवावतेने ॥ (४३।२)

ततः सुपर्णव्रजपक्षजन्मा नानागतिर् मण्डलयञ् जवेन । (४४।१)

जरत्तृणानीव वियन् निनाय वनस्पतीनां गहनानि वायुः ॥ (४४।२)

मनःशिलाभङ्गनिभेन पश्चान् निरुध्यमानं निकरेण भासाम् । (४५।१)

व्यूढैर् उरोभिश् च विनुद्यमानं नभः ससर्पेव पुरः खगानाम् ॥ (४५।२)

दरीमुखैर् आसवरागताम्रं विकासि रुक्मच्छदधाम पीत्वा । (४६।१)

जवानिलाघूर्णितसानुजालो हिमाचलः क्षीब इवाचकम्पे ॥ (४६।२)

प्रवृत्तनक्तंदिवसंधिदीप्तैर् नभस्तलं गां च पिशङ्गयष्टिः । (४७।१)

अन्तर्हितार्कैः परितः पतद्भिश् छायाः समाचिक्षिपिरे वनानाम् ॥ (४७।२)

स भोगसंघः शमम् उग्रधाम्नां सैन्येन निन्ये विनतासुतानाम् । (४८।१)

महाध्वरे विध्यपचारदोषः कर्मान्तरेणेव महोदयेन ॥ (४८।२)

साफल्यम् अस्त्रे रिपुपौरुषस्य कृत्वा गते भाग्य इवापवर्गम् । (४९।१)

अनिन्धनस्य प्रसभं समन्युः समाददे ऽस्त्रं ज्वलनस्य जिष्णुः ॥ (४९।२)

ऊर्ध्वं तिरश्चीनम् अधश् च कीर्णैर् ज्वालासटैर् लङ्घितमेघपङ्क्तिः । (५०।१)

आयस्तसिंहाकृतिर् उत्पपात प्राण्यन्तम् इच्छन्न् इव जातवेदाः ॥ (५०।२)

भित्त्वेव भाभिः सवितुर् मयूखाञ् जज्वाल विष्वग् विसृतस्फुलिङ्गः । (५१।१)

विदीर्यमाणाश्मनिनादधीरं ध्वनिं वितन्वन्न् अकृशः कृशानुः ॥ (५१।२)

चयान् इवाद्रीन् इव तुङ्गशृङ्गान् क्वचित् पुराणीव हिरण्मयानि । (५२।१)

महावनानीव च किंशुकानाम् अत्तान वह्निः पवनानुवृत्त्या ॥ (५२।२)

मुहुश् चलत्पल्लवलोहिनीभिर् उच्चैः शिखाभिः शिखिनो ऽवलीढाः । (५३।१)

तलेषु मुक्ताविशदा बभूवुः सान्द्राञ्जनश्यामरुचः पयोदाः ॥ (५३।२)

लिलिक्षतीव क्षयकालरौद्रे लोकं विलोलार्चिषि रोहिताश्वे । (५४।१)

पिनाकिना हूतमहाम्बुवाहम् अस्त्रं पुनः पाशभृतः प्रणिन्ये ॥ (५४।२)

ततो धरित्रीधरतुल्यरोधसस् तडिल्लतालिङ्गितनीलमूर्तयः । (५५।१)

अधोमुखाकाशसरिन्निपातिनीर् अपः प्रसक्तं मुमुचुः पयोमुचः ॥ (५५।२)

पराहतध्वस्तशिखे शिखावतो वपुष्य् अधिक्षिप्तसमिद्धतेजसि । (५६।१)

कृतास्पदास् तप्त इवायसि ध्वनिं पयोनिपाताः प्रथमे वितेनिरे ॥ (५६।२)

महानले भिन्नसिताभ्रपातिभिः समेत्य सद्यः कथनेन फेनताम् । (५७।१)

व्रजद्भिर् आर्द्रेन्धनवत् परिक्षयं जलैर् वितेने दिवि धूमसंततिः ॥ (५७।२)

स्वकेतुभिः पाण्डुरनीलपाटलैः समागताः शक्रधनुःप्रभाभिदः । (५८।१)

असंस्थिताम् आदधिरे विभावसोर् विचित्रचीनांशुकचारुतां त्विषः ॥ (५८।२)

जलौघसंमूर्छनमूर्छितस्वनः प्रसक्तविद्युल्लसितैधितद्युतिः । (५९।१)

प्रशान्तिम् एष्यन् धृतधूममण्डलो बभूव भूयान् इव तत्र पावकः ॥ (५९।२)

प्रवृद्धसिन्धूर्मिचयस्थवीयसां चयैर् विभिन्नाः पयसां प्रपेदिरे । (६०।१)

उपात्तसंध्यारुचिभिः सरूपतां पयोदविच्छेदलवैः कृशानवः ॥ (६०।२)

उपैत्य् अनन्तद्युतिर् अप्य् असंशयं विभिन्नमूलो ऽनुदयाय संक्षयम् । (६१।१)

तथा हि तोयौघविभिन्नसंहतिः स हव्यवाहः प्रययौ पराभवम् ॥ (६१।२)

अथ विहितविधेयैर् आशु मुक्तावितानैर् असितनगनितम्बश्यामभासां घनानाम् । (६२।१)

विकसदमलधाम्नां प्राप नीलोत्पलानां श्रियम् अधिकविशुद्धां वह्निदाहाद् इव द्यौः ॥ (६२।२)

इति विविधम् उदासे सव्यसाची यद् अस्त्रं बहुसमरनयज्ञः सादयिष्यन्न् अरातिम् । (६३।१)

विधिर् इव विपरीतः पौरुषं न्यायवृत्तेः सपदि तद् उपनिन्ये रिक्ततां नीलकण्ठः ॥ (६३।२)

वीतप्रभावतनुर् अप्य् अतनुप्रभावः प्रत्याचकाङ्क्ष जयिनीं भुजवीर्यलक्ष्मीम् । (६४।१)

अस्त्रेषु भूतपतिनापहृतेषु जिष्णुर् वर्षिष्यता दिनकृतेव जलेषु लोकः ॥ (६४।२)