विरेचनगणम् आह निकुम्भकुम्भेति ॥ (१।०)

निकुम्भो दन्ती ॥ (२।०)

कुम्भः त्रिवृत् ॥ (३।०)

त्रिफला प्रसिद्धा ॥ (४।०)

गवाक्षी श्वेतपुष्पेन्द्रवारुणी ॥ (५।०)

स्नुक् स्नुही ॥ (६।०)

शङ्खिनी कालाञ्जनीसदृशा श्वेतपुष्पा ॥ (७।०)

नीलिनी कालाञ्जनिका ॥ (८।०)

तिल्वको रोध्रः ॥ (९।०)

शम्याकः आरग्वधः ॥ (१०।०)

कम्पिल्लो रक्ताङ्गः ॥ (११।०)

हेमदुग्धा हेमावती कङ्कुष्ठप्रकृतिः ॥ (१२।०)

संग्रहे त्व् अधिकम् उक्तम् त्रिवृच्छ्यामादन्तीद्रवन्तीशङ्खिनीसप्तलाजगन्धाजशृङ्गीवचागवाक्षीछगलान्त्रीसुवर्णक्षीरीचित्रककिणिहीह्रस्वपञ्चमूलवृश्चीवपुनर्नवापलङ्कषावास्तुकशाकसालमूलानि । (१३।१)

तिल्वकरम्यककम्पिल्लकपाटलीत्वचः । (१३।२)

त्रिफलापीलुप्रियालबकुलबदरकर्कन्धुकाश्मर्यपरूषकद्राक्षानीलिनीक्लीतनकक्षीरकोदकीर्याविडङ्गपूगपञ्चाङ्गुलफलानि चतुरङ्गुलफलपत्त्राणि । (१३।३)

पूतीकत्वक्फलपत्त्राणि । (१३।४)

महावृक्षसप्तपर्णज्योतिष्मतीक्षीराणि । (१३।५)

क्षीरमस्तुमद्यधान्याम्लमूत्राणि चेति विरेचनोपयोगीनि ॥ (१३।६)

कोशातकीदेवदालीसप्तलाकारवेल्लिकास्वरसा अर्कक्षीरम् उष्णोदकं चेत्य् उभयात्मकानि ॥ (१४।०)

इति ॥ (१५।०)