चरकमतं दर्शयति चरकस् त्व् आहेति ॥ (१।०)

येन क्रियते तद् वीर्यम् द्रव्यकर्तृके कर्मणि करणभूतम् इत्यर्थः ॥ (२।०)

कतिविधं तद् इत्यपेक्षायामाह या क्रियेति ॥ (३।०)

या क्रिया येन क्रियते तस्यां तद्वीर्यम् यावत्यः क्रियास् तावन्त्येव वीर्याणीत्यर्थः ॥ (४।०)

कुतः इत्याह नावीर्यम् इति ॥ (५।०)

अवीर्यं द्रव्यं न किंचित् कुरुते वीर्यं विना कर्तृत्वं नास्तीत्यर्थः ॥ (६।०)

कुतः इत्याह सर्वा वीर्यकृता हि सा ॥ (७।०)

हि यस्मात् सा क्रिया सर्वापि वीर्यकृता ॥ (८।०)