प्रभावमुदाहरति दन्तीति ॥ (१।०)

रसादय उक्ताश् चरकेण कटुकः कटुकः पाके वीर्योष्णश् चित्रको मतः । (२।१)

तद्वद्दन्ती प्रभावात् तु विरेचयति सा नरम् ॥ (२।२)

इति ॥ (३।०)

मधुकमृद्वीकयोः क्षीरघृतयोश्च मधुररसपाकत्वेन शीतवीर्यत्वेन च साम्येऽपि मृद्वीकैव विरेचनी न मधुकम् घृतमेव दीपनं न क्षीरम् ॥ (४।०)

संग्रहे त्व् अन्यद् अप्य् उदाहृतम् । (५।१)

कटुपाकरसस्निग्धगुरुत्वैः कफवातजित् । (५।२)

लशुनो वातकफकृन्न तु तैर् एव यद्गुणैः ॥ (५।३)

मिथो विरुद्धान् वातादीन् लोहिताद्या जयन्ति यत् । (६।१)

कुर्वन्ति यवकाद्याश्च तत्प्रभावविजृम्भितम् ॥ (६।२)

शिरीषादि विषं हन्ति स्वप्नाद्यं तद्विवृद्धये । (७।१)

मणिमन्त्रौषधीनां च यत्कर्म विविधात्मकम् ॥ (७।२)

शल्याकर्षणपुंजन्मरक्षायुधवशादिकम् । (८।१)

दर्शनाद्यैर् अपि विषं यन्नियच्छति चागदः ॥ (८।२)

विरेचयति यद्वृष्यमाशु शुक्रं करोति वा । (९।१)

ऊर्ध्वाधोभागिकं यच्च द्रव्यं यच्छमनादिकम् ॥ (९।२)

मात्रादि प्राप्य तत्तच्च यत्प्रपञ्चेन वर्णितम् । (१०।१)

तच्च प्रभावजं सर्वमतोऽचिन्त्यः स उच्यते ॥ (१०।२)

रसेन वीर्येण गुणैश्च कर्म द्रव्यं विपाकेन च यद् विदध्यात् । (११।१)

सद्योऽन्यथा तत् कुरुते प्रभावाद्धेतोर् अतस् तस्य न गोचरो ऽस्ति ॥ (११।२)

इति ॥ (१२।१)