उक्तानां प्रकाराणां संज्ञामाह रसभेदैककत्वाभ्याम् इति ॥ (१।०)

उक्तप्रकारः स्नेहो विचारणासंज्ञः ॥ (२।०)

स च चतुःषष्टिधा ॥ (३।०)

तत्र भक्ष्याद्यन्नेन युक्तोऽन्नस्य मधुरादिरसभेदैस् त्रिषष्टिभेदत्वात् त्रिषष्टिधा ॥ (४।०)

स चान्यैः संयोगद्रव्यैर् अभिभूतत्वाद् अल्पवीर्यः ॥ (५।०)

बस्त्यादिप्रयुक्तस्तु केवलत्वादेकधा ॥ (६।०)

स चाल्पमात्रत्वादल्पवीर्यः ॥ (७।०)

अल्पवीर्यत्वाद्विविधोऽपि विचारणासंज्ञः तच्छक्तेर्विचारणाविषयत्वात् ॥ (८।०)