निरूहगणम् आह मदनेत्यादि ॥ (१।०)

कुष्ठं पाकलम् ॥ (२।०)

दशमूलं महद्ध्रस्वे पञ्चमूले ॥ (३।०)

दारु देवदारु ॥ (४।०)

रास्ना प्रसिद्धा ॥ (५।०)

यवस् तीक्ष्णशूकः ॥ (६।०)

मिशिः शतपुष्पा ॥ (७।०)

कृतवेधनं कटुकोशातकी ॥ (८।०)

कुलत्थः शिम्बीधान्यविशेषः ॥ (९।०)

मधु माक्षिकम् ॥ (१०।०)

संग्रहे त्व् अधिकम् उक्तम् ॥ (११।०)

वस्तिषु तु तेषु तेष्व् अवस्थान्तरेषु यान्युपयुज्यन्ते द्रव्याणि तान्य् असंख्येयत्वान् नोपदिश्यन्ते ॥ (१२।०)

रसस्कन्धेभ्य एव यथादोषं यथावस्थं च विभजेत् ॥ (१३।०)

सर्वेषु प्रायो मदनकुटजजीमूतकेक्ष्वाकुकोशातकीद्वयत्रपुससिद्धार्थकशताह्वाफलानि बलादशमूलैरण्डत्रिवृद्वचायष्ट्याह्वकुष्ठरास्नापुनर्नवाकट्तृणमूलानि सरलदेवदारुहपुषाहिङ्गुरसाञ्जनव्योषपत्त्रैलामृतायवकोलकुलत्था गुडलवणमस्तुधान्याम्लमूत्रस्नेहक्षीरक्षौद्राणि चेति ॥ (१४।०)

इति ॥ (१५।०)