विभागो ऽर्थस्य पित्र्यस्य पुत्रैर् यत्र प्रकल्प्यते । (१।१)

दायभाग इति प्रोक्तं तद् विवादपदं बुधैः ॥ (१।२)

पितर्य् ऊर्ध्वं मृते पुत्रा विभजेयुर् धनं पितुः । (२।१)

मातुर् दुहितरो ऽभावे दुहितारं तदन्वयः ॥ (२।२)

मातुर् निवृत्ते रजसि प्रत्तासु भगिनीषु च । (३।१)

निरष्टे वाप्य् अमरणे पितर्य् उपरतस्पृहे ॥ (३।२)

पितैव वा स्वयं पुत्रान् विभजेद् वयसि स्थितः । (४।१)

ज्येष्ठं श्रेष्ठविभागेन यथा वास्य मतिर् भवेत् ॥ (४।२)

बिभृयाद् वेच्छतः सर्वाञ् ज्येष्ठो भ्राता यथा पिता । (५।१)

भ्राता शक्तः कनिष्ठो वा शक्त्यपेक्षः कुले क्रिया ॥ (५।२)

शौर्यभार्याधने हित्वा यच् च विद्याधनं भवेत् । (६।१)

त्रीण्य् एतान्य् अविभाज्यानि प्रसादो यश् च पैतृकः ॥ (६।२)

मात्रा च स्वधनं दत्तं यस्मै स्यात् प्रीतिपूर्वकम् । (७।१)

तस्याप्य् एष विधिर् दृष्टो मातापीष्टे यथा पिता ॥ (७।२)

अध्यग्न्यध्यावहनिकं भर्तृदायस् तथैव च । (८।१)

भ्रातृमातृपितृभ्यश् च षड्विधं स्त्रीधनं स्मृतम् ॥ (८।२)

स्त्रीधनं तदपत्यानां भर्तृगाम्य् अप्रजासु च । (९।१)

ब्राह्मादिषु चतुःष्व् आहुः पितृगामीतरेषु तु ॥ (९।२)

कुटुम्बं बिभृयाद् भ्रातुर् यो विद्याम् अधिगच्छतः । (१०।१)

भागं विद्याधनात् तस्मात् स लभेताश्रुतो ऽपि सन् ॥ (१०।२)

वैद्यो ऽवैद्याय नाकामो दद्याद् अंशं स्वतो धनात् । (११।१)

पितृद्रव्यं तद् आश्रित्य न चेत् तेन तद् आहृतम् ॥ (११।२)

द्वाव् आंशौ प्रतिपद्येत विभजन्न् आत्मनः पिता । (१२।१)

समांशभागिनी माता पुत्राणां स्यान् मृते पतौ ॥ (१२।२)

ज्येष्ठायांशो ऽधिको देयः ज्येष्ठाय तु वरः स्मृतः । (१३।१)

समांशभाजः शेषाः स्युर् अप्रत्ता भगिनी तथा ॥ (१३।२)

क्षेत्रजेष्व् अपि पुत्रेषु तद्वज् जातेषु धर्मतः । (१४।१)

वर्णावरेष्व् अंशहानिर् ऊढाजातेष्व् अनुक्रमात् ॥ (१४।२)

पित्रैव तु विभक्ता ये हीनाधिकसमैर् धनैः । (१५।१)

तेषां स एव धर्मः स्यात् सर्वस्य हि पिता प्रभुः ॥ (१५।२)

कानीनश् च सहोढश् च गूढायां यश् च जायते । (१६।१)

तेषां वोढापिता ज्ञेयस् ते च भागहराः स्मृताः ॥ (१६।२)

अज्ञातपितृको यश् च कानीनो ऽनूढमातृकः । (१७।१)

मातामहाय दद्यात् स पिण्डं रिक्थं हरेत च ॥ (१७।२)

जाता ये त्व् अनियुक्तायाम् एकेन बहुभिस् तथा । (१८।१)

अरिक्थभाजस् ते सर्वे बीजिनाम् एव ते सुताः ॥ (१८।२)

दद्युस् ते बीजिने पिण्डं माता चेच्छुल्कतो हृता । (१९।१)

अशुल्कोपगतायां तु पिण्डदा वोढुर् एव ते ॥ (१९।२)

पितृद्विट् पतितः पण्डो यश् च स्याद् औपपातिकः । (२०।१)

औरसा अपि नैते ऽंशं लभेरन् क्षेत्रजाः कुतः ॥ (२०।२)

दीर्घतीव्रामयग्रस्ता जडोन्मत्तान्धपङ्गवः । (२१।१)

भर्तव्याः स्युः कुले चैते तत्पुत्रास् त्व् अंशभागिनः ॥ (२१।२)

द्विरामुष्यायणा दद्युर् द्वाभ्यां पिण्डोदके पृथक् । (२२।१)

रिक्थाद् अर्धांशम् आदद्युर् बीजिक्षेत्रिकयोस् तथा ॥ (२२।२)

संसृष्टिनां तु यो भागस् तेषाम् एव स इष्यते । (२३।१)

अतो ऽन्यथांशभाजो हि निर्बीजिष्व् इतरान् इयात् ॥ (२३।२)

भ्राताम् अप्रजः प्रेयात् कश्चिच् चेत् प्रव्रजेत् तु वा । (२४।१)

विभजेयुर् धनं तस्य शेषास् तु स्त्रीधनं विना ॥ (२४।२)

भरणम् चास्य कुर्वीरन् स्त्रीणाम् आ जीवितक्षयात् । (२५।१)

रक्षन्ति शय्यां भर्तुश् चेद् आछिन्द्युर् इतरासु तु ॥ (२५।२)

स्याद् यस्य दुहिता तस्याः पित्रंशो भरणे मतः । (२६।१)

आ संस्काराद् भजेद् एनां परतो बिभृयात् पतिः ॥ (२६।२)

मृते भर्तर्य् अपुत्रायाः पतिपक्षः प्रभुः स्त्रियाः । (२७।१)

विनियोगात्मरक्षासु भरणे च स ईश्वरः ॥ (२७।२)

परिक्षीणे पतिकुले निर्मनुष्ये निराश्रये । (२८।१)

तत्सपिण्डेषु वासत्सु पितृपक्षः प्रभुः स्त्रियाः ॥ (२८।२)

पक्षद्वयावसाने तु राजा भर्ता स्मृतः स्त्रियाः । (२९।१)

स तस्या भरणं कुर्यान् निगृह्णीयात् पथश् च्युताम् ॥ (२९।२)

स्वातन्त्र्याद् विप्रणश्यन्ति कुले जाता अपि स्त्रियः । (३०।१)

अस्वातन्त्र्यम् अतस् तासां प्रजापतिर् अकल्पयत् ॥ (३०।२)

पिता रक्षति कौमारे भर्ता रक्षति यौवने । (३१।१)

पुत्रा रक्षन्ति वैधव्ये न स्त्री स्वातन्त्र्यम् अर्हति ॥ (३१।२)

यच्छिष्टं पितृदायेभ्यो दत्त्वर्णं पैतृकं च यत् । (३२।१)

भ्रातृभिस् तद् विभक्तव्यम् ऋणी न स्याद् यथा पिता ॥ (३२।२)

येषां च न कृताः पित्रा संस्कारविधयः क्रमात् । (३३।१)

कर्तव्या भ्रातृभिस् तेषां पैतृकाद् एव ते धनात् ॥ (३३।२)

अविद्यमाने पित्र्ये ऽर्थे स्वांशाद् उद्धृत्य वा पुनः । (३४।१)

अवश्यकार्याः संस्कारा भ्रातरं पूर्वसंस्कृतैः ॥ (३४।२)

कुटुम्बार्थेषु चोद्युक्तस् तत्कार्यं कुरुते च यः । (३५।१)

स भ्रातृभिर् बृंहणीयो ग्रासाच्छादनवाहनैः ॥ (३५।२)

विभागधर्मसंदेहे दायादानां विनिर्णये । (३६।१)

ज्ञातिभिर् भागलेख्यैश् च पृथक्कार्यप्रवर्तनात् ॥ (३६।२)

भ्राताम् अविभक्तानाम् एको धर्मः प्रवर्तते । (३७।१)

विभागे सति धर्मो ऽपि भवेद् एषां पृथक् पृथक् ॥ (३७।२)

दानग्रहणपश्वन्नगृहक्षेत्रपरिग्रहाः । (३८।१)

विभक्तानां पृथग् ज्ञेयाः पाकधर्मागमव्ययाः ॥ (३८।२)

साक्षित्वं प्रातिभाव्यं च दानं ग्रहणम् एव च । (३९।१)

विभक्ता भ्रातरः कुर्युर् नाविभक्ता परस्परम् ॥ (३९।२)

येषाम् एताः क्रिया लोके प्रवर्तन्ते स्वरिक्थिनाम् । (४०।१)

विभक्तान् अवगच्छेयुर् लेख्यम् अप्य् अन्तरेण तान् ॥ (४०।२)

यद्य् एकजाता बहवः पृथग्धर्माः पृथक्क्रियाः । (४१।१)

पृथक्कर्मगुणोपेता न ते कृत्येषु संमताः ॥ (४१।२)

स्वान् भागान् यदि दद्युस् ते विक्रीणीरन्न् अथापि वा । (४२।१)

कुर्युर् यथेष्टं तत् सर्वम् ईशन्ते स्वधनस्य ते ॥ (४२।२)

औरसः क्षेत्रजश् चैव पुत्रिकापुत्र एव च । (४३।१)

कानीनश् च सहोढश् च गूढोत्पन्नस् तथैव च ॥ (४३।२)

पौनर्भवो ऽपविद्धश् च लब्धः क्रीतः कृतस् तथा । (४४।१)

स्वयं चोपगतः पुत्रा द्वादशैत उदाहृताः ॥ (४४।२)

तेषां षड् बन्धुदायादाः षड् अदायादबान्धवाः । (४५।१)

पूर्वः पूर्वः स्मृतः श्रेयाज् जघन्यो यो य उत्तरः ॥ (४५।२)

क्रमाद्ध्य् एते प्रपद्येरन् मृते पितरि तद्धनम् । (४६।१)

ज्यायसो ज्यायसो ऽभावे जघन्यस् तद् अवाप्नुयात् ॥ (४६।२)

पुत्राभावे तु दुहिता तुल्यसंतानदर्शनात् । (४७।१)

पुत्रश् च दुहिता चोक्तौ पितुः संतानकारकौ ॥ (४७।२)

अभावे तु दुहितॄणां सकुल्या बान्धवास् ततः । (४८।१)

ततः सजात्याः सर्वेषाम् अभावे राजगामि तत् ॥ (४८।२)

अन्यत्र ब्राह्मणात् किंतु राजा धर्मपरायणः । (४९।१)

स स्त्रीणां जीवनं दद्याद् एष दायविधिः स्मृतः ॥ (४९।२)