वणिक्प्रभृतयो यत्र कर्म सम्भूय कुर्वते । (१।१)

तत् संभूयसमुत्थानं व्यवहारपदं स्मृतम् ॥ (१।२)

फलहेतोर् उपायेन कर्म सम्भूय कुर्वताम् । (२।१)

आधारभूतः प्रक्षेपस् तेनोत्तिष्ठेयुर् अंशतः ॥ (२।२)

समो ऽतिरिक्तो हीनो वा यत्रांशो यस्य यादृशः । (३।१)

क्षयव्ययौ तथा वृद्धिस् तस्य तत्र तथाविधाः ॥ (३।२)

भाण्डपिण्डव्ययोद्धारभारसारान्ववेक्षणम् । (४।१)

कुर्युस् ते ऽव्यभिचारेण समये स्वे व्यवस्थिताः ॥ (४।२)

प्रमादान् नाशितं दाप्यः प्रतिषिद्धकृतं च यत् । (५।१)

असंदिष्टश् च यत् कुर्यात् सर्वैः संभूयकारिभिः ॥ (५।२)

दैवतस्करराजोत्थे व्यसने समुपस्थिते । (६।१)

यस् तत् स्वशक्त्या संरक्षेत् तस्यांशो दशमः स्मृतः ॥ (६।२)

एकस्य चेत् स्याद् व्यसनं दायादो ऽस्य तद् आप्नुयात् । (७।१)

अन्यो वासति दायादे शक्ताश् चेत् सर्व एव वा ॥ (७।२)

ऋत्विजां व्यसने ऽप्य् एवम् अन्यस् तत् कर्म निस्तरेत् । (८।१)

लभेत दक्षिणाभागं स तस्मात् संप्रकल्पितम् ॥ (८।२)

ऋत्विग् याज्यम् अदुष्टं यस् त्यजेद् अनपकारिणम् । (९।१)

अदुष्टं वर्त्विजं याज्यो विनेयौ ताव् उभाव् अपि ॥ (९।२)

ऋत्विक् तु त्रिविधो दृष्टः पूर्वजुष्टः स्वयंकृतः । (१०।१)

यदृच्छया च यः कुर्याद् आर्त्विज्यं प्रीतिपूर्वकम् ॥ (१०।२)

क्रमागतेष्व् एष धर्मो वृतेष्व् ऋत्विक्षु च स्वयम् । (११।१)

यादृच्छिके तु संयाज्ये तत्त्यागे नास्ति किल्बिषम् ॥ (११।२)

शुल्कस्थानं वणिक् प्राप्तः शुल्कं दद्याद् यथोपगम् । (१२।१)

न तद् व्यतिहरेद् राज्ञां बलिर् एष प्रकल्पितः ॥ (१२।२)

शुल्कस्थानं परिहरन् न काले क्रयविक्रयी । (१३।१)

मिथ्योक्त्वा च परीमाणं दाप्यो ऽष्टगुणम् अत्ययम् ॥ (१३।२)

कश्चिच् चेत् संचरन् देशात् प्रेयाद् अभ्यागतो वणिक् । (१४।१)

राजास्य भाण्डं तद् रक्षेत् यावद् दायाददर्शनम् ॥ (१४।२)

दायादे ऽसति बन्धुभ्यो ज्ञातिभ्यो वा तद् अर्पयेत् । (१५।१)

तदभावे सुगुप्तं तद् धारयेद् दशतीः समाः ॥ (१५।२)

अस्वामिकम् अदायादं दशवर्षस्थितं ततः । (१६।१)

राजा तद् आत्मसात् कुर्याद् एवं धर्मो न हीयते ॥ (१६।२)