क्रीत्वा मूल्येन यः पण्यं क्रेता न बहु मन्यते । (१।१)

क्रीत्वानुशय इत्य् एतद् विवादपदम् उच्यते ॥ (१।२)

क्रीत्वा मूल्येन यत् पण्यं दुष्क्रीतं मन्यते क्रयी । (२।१)

विक्रेतुः प्रतिदेयं तत् तस्मिन् एवाह्न्य् अविक्षतम् ॥ (२।२)

द्वितीये ऽह्नि ददत् क्रेता मूल्यात् त्रिंशांशम् आवहेत् । (३।१)

द्विगुणं तत् तृतीये ऽह्नि परतः क्रेतुर् एव तत् ॥ (३।२)

क्रेता पण्यं परीक्षेत प्राक् स्वयं गुणदोषतः । (४।१)

परीक्ष्याभिमतं क्रीतं विक्रेतुर् न भवेत् पुनः ॥ (४।२)

त्र्यहाद् दोह्यं परीक्षेत पञ्चाहाद् वाह्यम् एव तु । (५।१)

मुक्तावज्रप्रवालानां सप्ताहं स्यात् परीक्षणम् ॥ (५।२)

द्विपदाम् अर्धमासं स्यात् पुंसां तद्द्विगुणं स्त्रियाः । (६।१)

दशाहं सर्वबीजानाम् एकाहं लोहवाससाम् ॥ (६।२)

परिभुक्तं च यद् वासः क्लिष्टरूपं मलीमसम् । (७।१)

सदोषम् अपि विक्रीतं विक्रेतुर् न भवेत् पुनः ॥ (७।२)

मूल्याष्टभागो हीयेत सकृद् धौतस्य वाससः । (८।१)

द्विः पादस् त्रिस् त्रिभागस् तु चतुःकृत्वो ऽर्धम् एव च ॥ (८।२)

अर्धक्षयात् तु परतः पादांशापचयः क्रमात् । (९।१)

यावत् क्षीणदशं जीर्णं जीर्णस्यानियमः क्षये ॥ (९।२)

लोहानाम् अपि सर्वेषां हेतुर् अग्निक्रियाविधौ । (१०।१)

क्षयः संस्क्रियमाणानां तेषां दृष्टो ऽग्निसंगमात् ॥ (१०।२)

सुवर्णस्य क्षयो नास्ति रजते द्विपलं शतम् । (११।१)

शतम् अष्टपलं ज्ञेयं क्षयः स्यात् त्रपुसीसयोः ॥ (११।२)

ताम्रे पञ्चपलं विद्याद् विकारा ये च तन्मयाः । (१२।१)

तद्धातूनाम् अनेकत्वाद् अयसो ऽनियमः क्षये ॥ (१२।२)

तान्तवस्य च संस्कारे क्षयवृद्धी उदाहृते । (१३।१)

सूत्रकार्पासिकोर्णानां वृद्धिर् दशपलं शतम् ॥ (१३।२)

स्थूलसूत्रवतां तेषां मध्यानां पञ्चकं शतम् । (१४।१)

त्रिपलं तु सुसूक्ष्माणाम् अन्तःक्षय उदाहृतः ॥ (१४।२)

त्रिंशांशो रोमविद्धस्य क्षयः कर्मकृतस्य तु । (१५।१)

कौशेयवल्कलानां तु नैव वृद्धिर् न च क्षयः ॥ (१५।२)

क्रीत्वा नानुशयं कुर्याद् वणिक् पण्यविचक्षणः । (१६।१)

वृद्धिक्षयौ तु जानीयात् पण्यानाम् आगमं तथा ॥ (१६।२)