निक्षेप, देपोसित्स्वद्रव्यं यत्र विश्रम्भान् निक्षिपत्य् अविशङ्कितः । (१।१)

निक्षेपो नाम तत् प्रोक्तं व्यवहारपदं बुधैः ॥ (१।२)

अन्यद्रव्यव्यवहितं द्रव्यम् अव्याकृतं च यत् । (२।१)

निक्षिप्यते परगृहे तद् औपनिधिकं स्मृतम् ॥ (२।२)

स पुनर् द्विविधः प्रोक्तः साक्षिमान् इतरस् तथा । (३।१)

प्रतिदानं तथैवास्य प्रत्ययः स्याद् विपर्यये ॥ (३।२)

याच्यमानस् तु यो दात्रा निक्षेपं न प्रयच्छति । (४।१)

दण्ड्यः स राज्ञा दाप्यश् च नष्टे दाप्यश् च तत्समम् ॥ (४।२)

यश् चार्थं साधयेत् तेन निक्षेप्तुर् अननुज्ञया । (५।१)

तत्रापि दण्ड्यः स भवेत् तच् च सोदयम् आवहेत् ॥ (५।२)

ग्रहीतुः सह यो ऽर्थेन नष्टो नष्टः स दायिनः । (६।१)

दैवराजकृते तद्वन् न चेत् तज् जिह्मकारितम् ॥ (६।२)

एष एव विधिर् दृष्टो याचितान्वाहितादिषु । (७।१)

शिल्पिषूपनिधौ न्यासे प्रतिन्यासे तथैव च ॥ (७।२)

प्रतिगृह्णाति पोगण्डं यश् च सप्रधनं नरः । (८।१)

तस्याप्य् एष भवेद् धर्मः षड् एते विधयः समाः ॥ (८।२)