ॐ महन् मे वोचो भर्गो मे वोचो यशो मे वोचः स्तोमं मे वोचो भुक्तिं मे वोचः सर्वं मे वोचस् तन् मावतु तन् माविशतु तेन भुक्षिषीय । (१।१)

देवो देवम् एतु सोमः सोमम् एत्व् ऋतस्य पथा । (१।२)

विहाय दौष्कृत्यम् । (१।३)

बद्वा नामसि सृतिः सोमसरणी सोमं गमेयम् । (१।४)

पितरो भूः पितरो भूः पितरो भूः । (१।५)

नृमण ऊर्ध्वभरसं त्वोर्ध्वभरा दृशेयम् । (१।६)

मृदा शिथिरा देवानां तीर्थं वेदिर् असि मा मा हिंसीः । (१।७)

विष्णोः शिरो ऽसि यशोधा यशो मयि धेहि । (१।८)

इष ऊर्ज आयुषे वर्चसे च ॥ (१।९)

युनज्मि ते पृथिवीम् अग्निना सह युनज्मि वाचं सह सूर्येण युक्तो वातो ऽन्तरिक्षेण ते सह युक्तास् तिस्रो विमृजः सूर्यस्य । (२।१)

ऋतस्य सदने सीदामि । (२।२)

ऋतपात्रम् असि । (२।३)

वानस्पत्यो ऽसि बार्हस्पत्यो ऽसि प्राजापत्यो ऽसि प्रजापतेर् मूर्धास्य् अत्यायुपात्रम् असीदम् अहं मां प्राञ्चं प्रोहामि तेजसे ब्रह्मवर्चसाय । (२।४)

मरुतो नपातो ऽपां क्षयाः पर्वतानां ककुभः श्येना अजिरा एन्द्रं वग्नुना वहत घोषेणामीवां चातयध्वं युक्तास्थ वहत । (२।५)

इदम् अहम् अमुं यजमानं पशुष्व् अध्य् ऊहामि पशुषु च मां ब्रह्मवर्चसे च । (२।६)

वसवस् त्वा गायत्रेण छन्दसा संमृजन्तु रुद्रास् त्वा त्रैष्टुभेन छन्दसा संमृजन्त्व् आदित्यास् त्वा जागतेन छन्दसा संमृजन्तु । (२।७)

पवित्रं ते विततं ब्रह्मणस्पते प्रभुर् गात्राणि पर्येषि विश्वतो ऽतप्ततनूर् न तद् आमो अश्नुते शृतास इद् वहन्तः सं तद् आशतः । (२।८)

प्रशुक्रैतु देवीमनीषास्मद् रथः सुतष्टो न वाज्य् आयुषे मे पचस्व वर्चसे मे पवस्व विदुः पृथिव्या दिवो जनित्राच्छृण्वन्त्व् आपो ऽधः क्षरन्तीः सोमेहोद्गाय माम् आयुषे मम ब्रह्मवर्चसाय यजमानस्यर्द्ध्या अमुष्य राज्याय ॥ (२।९)

वेकुरानामासि जुष्टा देवेभ्यो नमो वाचे नमो वाचस्पतये देवि वाग् यत् ते वाचो मधुमत् तस्मिन् मा हाः सरस्वत्यै स्वाहा । (३।१)

सूर्यो मा दिव्याभ्यो नाष्ट्राभ्यः पातु वायुर् अन्तरिक्षाभ्यो ऽग्निः पार्थिवाभ्यः स्वाहा । (३।२)

यो ऽद्य सौम्यो वधो ऽघायूनाम् उदीरते विषूकुहस्य धन्वनाप तान् वरुणो ऽपधमतु । (३।३)

यो म आत्मा या मे प्रजा ये मे पशवस् तैर् अहं मनो वाचं प्रसीदामि । (३।४)

अग्नेस् तेजसेन्द्रस्येन्द्रियेण सूर्यस्य वर्चसा बृहस्पतिस् त्वा युनक्तु देवेभ्यः प्राणायाग्निर् युनक्तु तपसा सोमं यज्ञाय वोढवे दधात्व् इन्द्र इन्द्रियं सत्याः कामा यजमानस्य सन्तु । (३।५)

अन्नं करिष्याम्य् अन्नं प्रविष्याम्य् अन्नं जनयिष्यामि । (३।६)

अन्नम् अकरम् अन्नम् अभूद् अन्नम् अजीजनम् । (३।७)

श्येनो ऽसि गायत्रच्छन्दा अनु त्वा रभे स्वस्ति मा सं पारया मा स्तोत्रस्य स्तोत्रं गम्याद् इन्द्रवन्तो वनेमहि भक्षीमहि प्रजाम् इषम् । (३।८)

सं वर्चसा पयसा सं तपोभिर् अगन्महि मनसा सं शिवेन सं विज्ञानेन मनसश् च सत्यैर् यथा वो ऽहं चारुतमं वदानीन्द्रो वो दृशे भूयासं सूर्यश् चक्षुषे वातः प्राणाय सोमो गन्धाय ब्रह्म क्षत्राय । (३।९)

नमो गन्धर्वाय विष्वग्वादिने वर्चोधा असि वर्चो मयि धेहि ॥ (३।१०)

अध्वनाम् अध्वपते स्वस्ति मे ऽद्यास्मिन् देवयाने पथि भूयात् । (४।१)

सम्राड् असि कृशानुः । (४।२)

तुथो ऽसि जनधायो नभो ऽसि प्रतक्वासंमृष्टो ऽसि हव्यसूदनः । (४।३)

विभुर् असि प्रवाहणः । (४।४)

वह्निर् असि हव्यवाहनः । (४।५)

श्वात्रो ऽसि प्रचेताः । (४।६)

तुथो ऽसि विश्ववेदा उशिग् असि कविर् अङ्घारिर् असि बम्भारिर् अवस्युर् असि दुवस्वान् । (४।७)

शुन्ध्युर् असि मार्जालीयः । (४।८)

ऋतधामासि स्वर्ज्योतिः । (४।९)

समुद्रो ऽसि विश्वव्यचाः । (४।१०)

अहिर् असि बुध्न्यः । (४।११)

अजो ऽस्य् एकपात् । (४।१२)

सगरा असि बुध्न्यः । (४।१३)

कव्यो ऽसि कव्यवाहनः । (४।१४)

पात माग्नयो रौद्रेणानीकेन पिष्टत मा नमो वो ऽस्तु मा मा हिंसिष्ट ॥ (४।१५)

ऋतस्य द्वारौ स्थो मा मा संताप्तम् । (५।१)

नमः सखिभ्यः पूर्वसद्भ्यो नमः परसद्भ्यः । (५।२)

श्येनो नृचक्षा अग्नेष्ट्वा चक्षुषाव पश्यामि । (५।३)

इन्दविन्द्रपीतस्य त इन्द्रियावतो गायत्रच्छन्दसः सर्वगणस्य सर्वगण उपहूत उपहूतस्य भक्षयामि । (५।४)

ऊर्ध्वः सप्त ऋषीन् उप तिष्ठस्वेन्द्रपीतो वाचस्पते सप्तर्त्विजो ऽभ्युच्छ्रयस्व जुषस्व लोकम् मार्वाग् अवगाः । (५।५)

सोम रारन्धि नो हृदि पिता नो ऽसि मम तन् मा मा हिंसीः । (५।६)

सोम गीर्भिष्ट्वा वयं वर्धयामो वाचोविदः सुमृडीको न आविश । (५।७)

आप्यायस्व समेतु ते विश्वतः सोम वृष्ण्यम् । (५।८)

अवमैस् त ऊर्ध्वैस् ते काव्यैस् ते पितृभिर् भक्षितस्य मधुमतो नाराशंसस्य सर्वगणस्य सर्वगण उपहूत उपहूतस्य भक्षयामि । (५।९)

दीक्षायै वर्णेन तपसो रूपेण मनसो महिम्ना वाचो विभूत्या प्रजापतिस् त्वा युनक्तु प्रजाभ्यो ऽपानाय । (५।१०)

वायुर् युनक्तु मनसा स्तोमं यज्ञाय वोढवे दधात्व् इन्द्र इन्द्रियं सत्याः कामा यजमानस्य सन्तु । (५।११)

वृषको ऽसि त्रिष्टुप्छन्दा अनु त्वा रभे स्वस्ति मा संपारया मा स्तोत्रस्य स्तोत्रं गम्याद् इन्द्रवन्तो वनेमहि भक्षीमहि प्रजाम् इषम् । (५।१२)

इन्दविन्द्रपीतस्य त इन्द्रियावतस्त्रिष्टुप्छन्दसः सर्वगणस्य सर्वगण उपहूत उपहूतस्य भक्षयामि । (५।१३)

सूर्यो युनक्तु वाचा स्तोमं यज्ञाय वोढवे दधात्व् इन्द्र इन्द्रियं सत्याः कामा यजमानस्य सन्तु । (५।१४)

स्वरो ऽसि गयो ऽसि जगच्छन्दा अनु त्वा रभे स्वस्ति मा संपारया मा स्तोत्रस्य स्तोत्रं गम्याद् इन्द्रवन्तो वनेमहि भक्षीमहि प्रजाम् इषम् । (५।१५)

इन्दविन्द्रपीतस्य त इन्द्रियावतस्त्रिष्टुप्छन्दसः सर्वगणस्य सर्वगण उपहूत उपहूतस्य भक्षयामि । (५।१६)

आयुर् मे प्राणो मनो ऽसि मे प्राण आयुपत्न्याम् ऋचि यन् मे मनो यमं गतं यद् वा मे अपरागतं राज्ञा सोमेन तद् वयं पुनर् अस्मासु दध्नसि । (५।१७)

यन् मे यमं वैवस्वतं मनो जगाम दूरगास् तन् म आवर्तया पुनर् जीवातवे न मर्तवे ऽथो अरिष्टतातये । (५।१८)

येनाह्याजिम् अजयद् विचक्ष्य येन श्येनं शकुनं सुपर्णं यद् आहुश् चक्षुर् अदिताव् अनन्तं सोमो नृचक्षा मयि तद् दधातु ॥ (५।१९)

ऐन्द्रं सहो ऽसर्जि तस्य त इन्दविन्द्रपीतस्येन्द्रियावतो ऽनुष्टुप्छन्दसो हरिवतः सर्वगणस्य सर्वगण उपहूत उपहूतस्य भक्षयामि । (६।१)

इन्दविन्द्रपीतस्य त इन्द्रियावतो ऽनुष्टुप्छन्दसः सर्वगणस्य सर्वगण उपहूत उपहूतस्य भक्षयामि । (६।२)

स्तुतस्य स्तुतम् अस्य् ऊर्जस्वत् पयस्वद् आ मा स्तोत्रस्य स्तोत्रं गम्याद् इन्द्रवन्तो वनेमहि भक्षीमहि प्रजाम् इषम् । (६।३)

इष्टयजुषस् ते देव सोम स्तुतस्तोमस्य शस्तोक्थस्य तिरोह्न्यस्य यो ऽश्वसनिर् गोसनिर् भक्षस् तस्योपहूत उपहूतस्य भक्षयामि । (६।४)

ऋतस्य त्वा देव स्तोमपदे विष्णोर् धामानि विमुञ्चाम्य् एतत् त्वं देव स्तोमान् अवकरम् अगन्न् अशीमहि वयं प्रतिष्ठाम् । (६।५)

सोमेहानु मेहि सोम सह सदस इन्द्रियेण । (६।६)

सुभूर् असि श्रेष्ठो रश्मिर् देवानां संसद् देवानां यातुर् यया तन्वा ब्रह्म जिन्वसि तया मा जिन्व तया मा जनय प्रकाशं मा कुरु । (६।७)

अपां पुष्पम् अस्य् ओषधीनां रस इन्द्रस्य प्रियतमं हविः स्वाहा । (६।८)

हारियोजनस्य ते देव सोमेष्टयजुषः स्तुतस्तोमस्य शस्तोक्थस्य यो ऽश्वसनिर् गोसनिर् भक्षस् तस्योपहूत उपहूतस्य भक्षयामि । (६।९)

देवकृतस्यैनसो ऽवयजनम् असि पितृकृतस्यैनसो ऽवयजनम् असि मनुष्यकृतस्यैनसो ऽवयजनम् अस्य् अस्मत्कृतस्यैनसो ऽवयजनम् असि यद् दिवा च नक्तं चैनश् चकृम तस्यावयजनम् असि यत् स्वपन्तश् च जाग्रतश् चैनश् चकृम तस्यावयजनम् असि यद् विद्वांसश् चाविद्वांसश् चैनश् चकृम तस्यावयजनम् अस्य् एनस एनसावयजनम् असि । (६।१०)

अप्सु घौतस्य ते देव सोम नृभिः सुतस्य । (६।११)

मधुमन्तं भक्षं करोमि । (६।१२)

सम् अद्भ्य ओषधीभ्यः । (६।१३)

कामकामं म आवर्तय । (६।१४)

ऊर्ग् अस्य् ऊर्जम् मयि धेहि । (६।१५)

प्राण सोमपीथे मे जागृहि । (६।१६)

दधिक्राव्णो अकारिषं जिष्णोर् अश्वस्य वाजिनः । (६।१७)

सुरभि नो मुखा करत् प्र न आयूंषि तारिषत् ॥ (६।१८)

अश्वो ऽस्य् अत्यो ऽसि मयो ऽसि हयो ऽसि वाज्य् असि सप्तिर् अर्वागसि वृषासि । (७।१)

आदित्यानां पत्मान्व् इहि नमस् ते ऽस्तु मा मा हिंसीः । (७।२)

वायोष्ट्वा तेजसा प्रतिगृह्णामि नक्षत्राणां त्वां रूपेण प्रतिगृह्णामि सूर्यस्य त्वा वर्चसा प्रतिगृह्णामि । (७।३)

रथन्तरम् असि वामदेव्यम् असि बृहद् असि । (७।४)

अङ्कान्यङ्कू अभितो रथं यौ ध्वान्तं वाताग्रम् अभिसंचरतौ दूरे हेतिर् इन्द्रियवान् पतत्री ते नो ऽग्नयः पप्रयः पारयन्तु । (७।५)

वैश्वानरः प्रत्नथा नाकम् आरुह दिवः पृष्ठे मन्दमानः सुमन्मभिः सपूर्ववज् जन्तवे धनाः समानम् अय्मन् पर्येति जागृविः । (७।६)

गिदैष ते रथ एष वाम् अश्विना रथो ऽरिष्टो विश्वभेषजः । (७।७)

कृशानो सव्यान् आयच्छ । (७।८)

दासानो दक्षिणान् अवगृहाण ॥ (७।९)

देवस्य त्वा सवितुः प्रसवे ऽश्विनोर् बाहुभ्यां पूष्णो हस्ताभ्यां प्रतिगृह्णामि । (८।१)

वरुणस् त्वा नयतु देवि दक्षिणे वरुणायाश्वं तेनामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।२)

वरुणस् त्वा नयतु देवि दक्षिणे रुद्राय गां तयामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।३)

वरुणस् त्वा नयतु देवि दक्षिणे ऽग्नये ऽजम् । (८।४)

अग्नये हिरण्यम् । (८।५)

अग्नीषोमाभ्याम् अजान् मयामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।६)

अन्नस्यान्नपतिः प्रादाद् अनमीवस्य शुष्मिणो नमो विश्वजनस्य क्षामाय भुञ्जति मा मा हिंसीः । (८।७)

वरुणस् त्वा नयतु देवि दक्षिणे त्वष्ट्रे ऽविं तयामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।८)

ग्नास् त्वा ऽकृन्तन्न् अपसो ऽतन्वत वयित्र्यो ऽवयन् । (८।९)

वरुणस् त्वा नयतु देवि दक्षिणे बृहस्पतये वासस् तेनामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।१०)

वरुणस् त्वा नयतु देवि दक्षिणे उत्तानायाङ्गिरसायाप्राणत् तेनामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।११)

वरुणस् त्वा नयतु देवि दक्षिणे पूष्ण उष्ट्रम् । (८।१२)

वायवे मृगं तेनामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।१३)

प्रजापतये हस्तिनं प्रजापतये वराहं प्रजापतये व्रीहियवांस् तैर् अमृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।१४)

वरुणस् त्वा नयतु देवि दक्षिणे क्षेत्रपतये तिलमाषास् तैर् अमृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।१५)

वरुणस् त्वा नयतु देवि दक्षिणे सवित्रे ऽश्वतरं वाश्वतरीं वा तयामृतत्वम् अशीय वयो दात्रे भूयान् मयो मह्यं प्रतिग्रहीत्रे । (८।१६)

क इदं कस्मा अदात् कामः कामायादात् कामो दाता कामः प्रतिग्रहीता कामः समुद्रम् आविशत् कामेन त्वा प्रतिगृह्णामि कामैतत् ते ॥ (८।१७)

रश्मिर् असि क्षयाय त्वा क्षयं जिन्व सवितृप्रसूता बृहस्पतये स्तुत । (९।१)

प्रेतिर् असि धर्मणे त्वा धर्मं जिन्व सवितृप्रसूता बृहस्पतये स्तुत । (९।२)

अन्वितिर् असि दिवे त्वा दिवं जिन्व सवितृप्रसूता बृहस्पतये स्तुत । (९।३)

संधिर् अस्य् अन्तरिक्षाय त्वान्तरिक्षं जिन्व सवितृप्रसूता बृहस्पतये स्तुत । (९।४)

प्रतिधिर् असि पृथिव्यै त्वा पृथिवीं जिन्व सवितृप्रसूता बृहस्पतये स्तुत । (९।५)

विष्टम्भो ऽसि वृष्ट्यै त्वा वृष्टिं जिन्व सवितृप्रसूता बृहस्पतये स्तुत । (९।६)

प्राचो ऽस्य् अह्ने त्वाहर् जिन्व सवितृप्रसूता बृहस्पतये स्तुत । (९।७)

अन्वासि रात्र्यै रात्रिं जिन्व सवितृप्रसूता बृहस्पतये स्तुत । (९।८)

उशिग् असि वसुभ्यस् त्वा वसून् जिन्व सवितृप्रसूता बृहस्पतये स्तुत । (९।९)

प्रकेतो ऽसि रुद्रेभ्यस् त्वा रुद्रान् जिन्व सवितृप्रसूता बृहस्पतये स्तुत । (९।१०)

सुदीतिर् अस्य् आदित्येभ्यस् त्वादित्यान् जिन्व सवितृप्रसूता बृहस्पतये स्तुत । (९।११)

ओजो ऽसि पितृभ्यस् त्वा पितॄन् जिन्व सवितृप्रसूता बृहस्पतये स्तुत ॥ (९।१२)

तन्तुर् असि प्रजाभ्यस् त्वा प्रजा जिन्व सवितृप्रसूता बृहस्पतये स्तुत । (१०।१)

रोदस्य् अस्य् ओषधीभ्यस् त्वौषधीर् जिन्व सवितृप्रसूता बृहस्पतये स्तुत । (१०।२)

पृतनाषाड् असि पशुभ्यस् त्वा पशून् जिन्व सवितृप्रसूता बृहस्पतये स्तुत । (१०।३)

अभिजिद् असि युक्तग्रावेन्द्राय त्वेन्द्रं जिन्व सवितृप्रसूता बृहस्पतये स्तुत । (१०।४)

अधिपतिर् असि प्राणाय त्वा प्राणान् जिन्व सवितृप्रसूता बृहस्पतये स्तुत । (१०।५)

धरुणो ऽस्य् अपानाय त्वापानान् जिन्व सवितृप्रसूता बृहस्पतये स्तुत । (१०।६)

संसर्पो ऽसि चक्षुषे त्वा चक्षुर् जिन्व सवितृप्रसूता बृहस्पतये स्तुत । (१०।७)

वयोधा असि क्षेत्राय त्वा क्षेत्रं जिन्व सवितृप्रसूता बृहस्पतये स्तुत । (१०।८)

त्रिवृद् असि त्रिवृते त्वा सवृद् असि सवृते त्वा प्रवृद् असि प्रवृते त्वानुवृद् अस्य् अनुवृते त्वा सवितृप्रसूता बृहस्पतये स्तुत । (१०।९)

निरोहो ऽसि निरोहाय त्वा संरोहो ऽसि संरोहाय त्वा प्ररोहो ऽसि प्ररोहाय त्वानुरोहो ऽस्य् अनुरोहाय त्वा सवितृप्रसूता बृहस्पतये स्तुत । (१०।१०)

वसुको ऽसि वस्यष्टिर् असि वेषश्रीर् असि सवितृप्रसूता बृहस्पतये स्तुत । (१०।११)

आक्रमो ऽस्याक्रमाय त्वा संक्रमो ऽसि संक्रमाय त्वोत्क्रमो ऽस्य् उत्क्रमाय त्वोत्क्रान्तिर् अस्य् उत्क्रान्त्यै त्वा सवितृप्रसूता बृहस्पतये स्तुत ॥ (१०।१२)