पञ्चविंशब्राह्मणPañcaviṃśabrāhmaṇa
PaViBr, 15, 4
Select a line for its word-by-word analysis.
श्रायन्त इव सूर्यम् इति सूर्यवत्यो भवन्ति ॥ (१।०)
śrāyanta iva sūryam iti sūryavatyo bhavanti ||
आदित्यदेवत्यं ह्य् एतद् अहर् अन्तो वै सूरो ऽन्त एतन् नवमम् अह्नाम् अन्त एव तद् अन्तेन स्तुवते प्रतिष्ठायै ॥ (२।०)
ādityadevatyaṃ hy etad ahar anto vai sūro 'nta etan navamam ahnām anta eva tad antena stuvate pratiṣṭhāyai ||
यत इन्द्र भयावहे ततो नो अभयं कृधि मघवञ् छग्धि तव तन् न ऊतये विद्विषो विमृधो जहि इति द्विषश्चैव मृधश्च नवमेनाह्ना विहत्य दशमेनाह्नोत्तिष्ठन्ति ॥ (३।०)
yata indra bhayāvahe tato no abhayaṃ kṛdhi maghavañ chagdhi tava tan na ūtaye vidviṣo vimṛdho jahi iti dviṣaścaiva mṛdhaśca navamenāhnā vihatya daśamenāhnottiṣṭhanti ||
श्रीर् वै श्रायन्तीयं श्रीर् नवमम् अहः श्रियम् एव तच्छ्रियां प्रतिष्ठापयति ॥ (४।०)
śrīr vai śrāyantīyaṃ śrīr navamam ahaḥ śriyam eva tacchriyāṃ pratiṣṭhāpayati ||
समन्तेन पशुकामः स्तुवीत पुरोधाकामः समन्तेन स्तुवीत ॥ (६।०)
samantena paśukāmaḥ stuvīta purodhākāmaḥ samantena stuvīta ||
आग्नेयी पृथिव्याग्नेयो ब्राह्मण ऐन्द्री द्यौर् ऐन्द्रो राजन्यो ऽन्तरिक्षेण द्यावापृथिवी समन्ते अन्तरिक्षेणैवैनं समन्तं करोति विन्दते पशून् प्र पुरोधाम् आप्नोति य एवं विद्वान् समन्तेन स्तुवते स्तोमः ॥ (७।०)
āgneyī pṛthivyāgneyo brāhmaṇa aindrī dyaur aindro rājanyo 'ntarikṣeṇa dyāvāpṛthivī samante antarikṣeṇaivainaṃ samantaṃ karoti vindate paśūn pra purodhām āpnoti ya evaṃ vidvān samantena stuvate stomaḥ ||
Data courtesy of The Digital Corpus of Sanskrit.