श्वग्रहगृहीतं कुमारं तपोयुक्तो जालेन प्रच्छाद्य कंसं किङ्किणिं वा ह्रादयन्न् अद्वारेण सभां प्रपाद्य सभाया मध्ये ऽधिदेवनम् उद्धत्यावोक्ष्याक्षान् न्युप्याक्षेषूत्तानं निपात्य दध्ना लवणमिश्रेणाञ्जलिनोत्तरैर् अवोक्षेत् प्रातर् मध्यन्दिने सायम् ॥ (१।१)

अगदो भवति ॥ (२।१)

शङ्खिनं कुमारं तपोयुक्त उत्तराभ्याम् अभिमन्त्र्योत्तरयोदकुम्भेन शिरस्तो ऽवनयेत् प्रातर् मध्यन्दिने सायम् ॥ (३।१)

अगदो भवति ॥ (४।१)

श्रावण्यां पौर्णमास्याम् अस्तमिते स्थालीपाकः ॥ (५।१)

पार्वणवद् आज्यभागान्ते स्थालीपाकाद्धुत्वाञ्जलिनोत्तरैः प्रतिमन्त्रं किंशुकानि जुहोति ॥ (६।१)

उत्तराभिस् तिसृभिर् आरग्वधमय्यः समिधः ॥ (७।१)

आज्याहुतीर् उत्तराः ॥ (८।१)

जयादि प्रतिपद्यते ॥ (९।१)

परिषेचनान्तं कृत्वा वाग्यतः संभारान् आदाय प्राचीम् उदीचीं वा दिशम् उपनिष्क्रम्यस्थण्डिलं कल्पयित्वा तत्र प्राचीर् उदीचीश् च तिस्रस् तिस्रो लेखा लिखित्वाद्भिर् उपनिनीय तासूत्तरया सक्तून् निवपति ॥ (१०।१)

तूष्णीं संपुष्का धाना लाजान् आञ्जनाभ्यञ्जने स्थगरोशीरम् इति ॥ (११।१)

उत्तरैर् उपस्थायापः परिषिच्याप्रतीक्षस् तूष्णीम् एत्यापश्वेत पदेत्य् आभ्याम् उदकुम्भेन त्रिः प्रदक्षिणम् अन्तरतो ऽगारं निवेशनं वा परिषिच्य ब्राह्मणान् भोजयेत् ॥ (१२।१)