उपाकरणे समापने च ऋषिर् यः प्रज्ञायते ॥ (१।१)

सदसस्पतिर् द्वितीयः ॥ (२।१)

स्त्रियानुपेतेन क्षारलवणावरान्नसंसृष्टस्य च होमं परिचक्षते ॥ (३।१)

यथोपदेशं काम्यानि बलयश् च ॥ (४।१)

सर्वत्र स्वयं प्रज्वलिते ऽग्नाव् उत्तराभ्यां समिधाव् आदध्यात् ॥ (५।१)

आपन् मा श्रीः श्रीर् मागाद् इति वा ॥ (६।१)

एतद् अहर् विजानीयाद् यद् अहर् भार्याम् आवहते ॥ (७।१)

त्रिरात्रम् उभयोर् अधःशय्या ब्रह्मचर्यं क्षारलवणवर्जनं च ॥ (८।१)

तयोः शय्याम् अन्तरेण दण्डो गन्धलिप्तो वाससा सूत्रेण वा परिवीतस् तिष्ठति ॥ (९।१)

तं चतुर्थ्यापररात्र उत्तराभ्याम् उत्थाप्य प्रक्षाल्य निधायाग्नेर् उपसमाधानाद्य् आज्यभागान्ते ऽन्वारब्धायाम् उत्तरा आहुतीर् हुत्वा जयादि प्रतिपद्यते परिषेचनान्तं कृत्वापरेणाग्निं प्राचीम् उपवेश्य तस्याः शिरस्य् आज्यशेषाद् व्याहृतिभिर् ओङ्कारचतुर्थाभिर् आनीयोत्तराभ्यां यथालिङ्गं मिथस् समीक्ष्योत्तरयाज्यशेषेण हृदयदेशौ संमृज्योत्तरास् तिस्रो जपित्वा शेषं समावेशने जपेत् ॥ (१०।१)

अन्यो वैनाम् अभिमन्त्रयेत ॥ (११।१)

यदा मलवद्वासाः स्याद् अथैनां ब्राह्मणप्रतिषिद्धानि कर्माणि संशास्ति यां मलवद्वाससम् इत्य् एतानि ॥ (१२।१)

रजसः प्रादुर्भावात् स्नाताम् ऋतुसमावेशने उत्तराभिर् अभिमन्त्रयेत ॥ (१३।१)