अथैनाम् आग्नेयेन स्थालीपाकेन याजयति ॥ (१।१)

पत्न्य् अवहन्ति ॥ (२।१)

श्रपयित्वाभिघार्य प्राचीनम् उदीचीनं वोद्वास्य प्रतिष्ठितम् अभिघार्याग्नेर् उपसमाधानाद्य् आज्यभागान्ते ऽन्वारब्धायां स्थालीपाकाज् जुहोति ॥ (३।१)

सकृद् उपस्तरणाभिघारणे द्विर् अवदानम् ॥ (४।१)

अग्निर् देवता स्वाहाकारप्रदानः ॥ (५।१)

अपि वा सकृद् उपहत्य जुहुयात् ॥ (६।१)

अग्निः स्विष्टकृत् द्वितीयः ॥ (७।१)

सकृद् उपस्तरणावदाने द्विर् अभिघारणम् ॥ (८।१)

मध्यात् पूर्वस्यावदानम् ॥ (९।१)

मध्ये होमः ॥ (१०।१)

उत्तरार्धाद् उत्तरस्य ॥ (११।१)

उत्तरार्धपूर्वार्धे होमः ॥ (१२।१)

लेपयोः प्रस्तरवत् तूष्णीं बर्हिर् अङ्क्त्वाग्नौ प्रहरति ॥ (१३।१)

सिद्धम् उत्तरं परिषेचनम् ॥ (१४।१)

तेन सर्पिष्मता ब्राह्मणं भोजयेत् ॥ (१५।१)

यो ऽस्यापचितस् तस्मा ऋषभं ददाति ॥ (१६।१)

एवम् अत ऊर्ध्वं दक्षिणावर्जम् उपोषिताभ्यां पर्वसु कार्यः ॥ (१७।१)

पूर्णपात्रस् तु दक्षिणेत्य् एके ॥ (१८।१)

सायं प्रातर् अत ऊर्ध्वं हस्तेनैते आहुती तण्डुलैर् यवैर् वा जुहुयात् ॥ (१९।१)

स्थालीपाकवद् दैवतम् ॥ (२०।१)

सौरी पूर्वाहुतिः प्रातर् इत्य् एके ॥ (२१।१)

उभयतः परिषेचनं यथा पुरस्तात् ॥ (२२।१)

पार्वणेनातो ऽन्यानि कर्माणि व्याख्यातान्य् आचाराद् यानि गृह्यन्ते ॥ (२३।१)

यथोपदेशं देवताः ॥ (२४।१)

अग्निं स्विष्टकृतं चान्तरेण ॥ (२५।१)

अविकृतम् आतिथ्यम् ॥ (२६।१)

वैश्वदेवे विश्वे देवाः ॥ (२७।१)

पौर्णमास्यां पौर्णमासी यस्यां क्रियते ॥ (२८।१)