सुहृदः समवेतान् मन्त्रवतो वरान् प्रहिणुयात् ॥ (१।१)

तान् आदितो द्वाभ्याम् अभिमन्त्रयेत ॥ (२।१)

स्वयं दृष्ट्वा तृतीयां जपेत् ॥ (३।१)

चतुर्थ्या समीक्षेत ॥ (४।१)

अङ्गुष्ठेनोपमध्यमया चाङ्गुल्या दर्भं संगृह्योत्तरेण यजुषा तस्या भ्रुवोर् अन्तरं संमृज्य प्राचीनं निरस्येत् ॥ (५।१)

प्राप्ते निमित्त उत्तरां जपेत् ॥ (६।१)

युग्मान् समवेतान् मन्त्रवत उत्तरयाद्भ्यः प्रहिणुयात् ॥ (७।१)

उत्तरेण यजुषा तस्याः शिरसि दर्भेण्ड्वं निधाय तस्मिन्न् उत्तरया दक्षिणं युगच्छिद्रं प्रतिष्ठाप्य छिद्रे सुवर्णम् उत्तरयान्तर्धायोत्तराभिः पञ्चभिः स्नापयित्वोत्तरयाहतेन वाससाच्छाद्योत्तरया योक्त्रेण संनह्यति ॥ (८।१)

अथैनाम् उत्तरया दक्षिणे हस्ते गृहीत्वाग्निम् अभ्यानीयापरेणाग्निम् उदगग्रं कटम् आस्तीर्य तस्मिन्न् उपविशत उत्तरो वरः ॥ (९।१)

अग्नेर् उपसमाधानाद्य् आज्यभागान्ते ऽथैनाम् आदितो द्वाभ्याम् अभिमन्त्रयेत ॥ (१०।१)

अथास्यै दक्षिणेन नीचा हस्तेन दक्षिणम् उत्तानं हस्तं गृह्णीयात् ॥ (११।१)

यदि कामयेत स्त्रीर् एव जनयेयम् इत्य् अङ्गुलीर् एव गृह्णीयात् ॥ (१२।१)

यदि कामयेत पुंस एव जनयेयम् इत्य् अङ्गुष्ठम् एव सो ऽभीवाङ्गुष्ठम् अभीव लोमानि गृह्णाति ॥ (१३।१)

गृभ्णामि त इत्य् एताभिश् चतसृभिः ॥ (१४।१)

अथैनाम् उत्तरेणाग्निं दक्षिणेन पदा प्राचीम् उदीचीं वा दिशम् अभि प्रक्रमयत्य् एकम् इष इति ॥ (१५।१)

सखेति सप्तमे पदे जपति ॥ (१६।१)