मघाभिर् गावो गृह्यन्ते ॥ (१।१)

फल्गुनीभ्यां व्यूह्यते ॥ (२।१)

यां कामयेत दुहितरं प्रियां स्याद् इति तां निष्ट्यायां दद्यात् प्रियैव भवति नेव तु पुनर् आगच्छतीति ब्राह्मणवेक्षो विधिः ॥ (३।१)

इन्वकाशब्दो मृगशिरसि ॥ (४।१)

निष्ट्याशब्दः स्वातौ ॥ (५।१)

विवाहे गौः ॥ (६।१)

गृहेषु गौः ॥ (७।१)

तया वरम् अतिथिवद् अर्हयेत् ॥ (८।१)

यो ऽस्यापचितः तम् इतरया ॥ (९।१)

एतावद् गोरालम्भस्थानम् अतिथिः पितरो विवाहश् च ॥ (१०।१)

सुप्तां रुदन्तीं निष्क्रान्तां वरणे परिवर्जयेत् ॥ (११।१)

दत्तां गुप्तां द्योताम् ऋषभां शरभां विनतां विकटां मुण्डां मण्डूषिकां साङ्कारिकां रातां पालीं मित्रां स्वनुजां वर्षकारीं च वर्जयेत् ॥ (१२।१)

नक्षत्रनामा नदीनामा वृक्षनामा च गर्हिताः ॥ (१३।१)

सर्वाश् च रेफलकारोपान्ता वरणे परिवर्जयेत् ॥ (१४।१)

शक्तिविषये द्रव्याणि प्रतिच्छन्नान्य् उपनिधाय ब्रूयाद् उपस्पृशेति ॥ (१५।१)

नानाबीजानि संसृष्टानि वेद्याः पांसून् क्षेत्राल् लोष्टं शकृच् छ्मशानलोष्टम् इति ॥ (१६।१)

पूर्वेषाम् उपस्पर्शने यथालिङ्गम् ऋद्धिः ॥ (१७।१)

उत्तमं परिचक्षते ॥ (१८।१)

बन्धुशीललक्षणसम्पन्नाम् अरोगाम् उपयच्छेत ॥ (१९।१)

बन्धुशीललक्षणसम्पन्नः श्रुतवान् अरोग इति वरसम्पत् ॥ (२०।१)

यस्यां मनश्चक्षुषोर् निबन्धस् तस्याम् ऋद्धिर् नेतरद् आद्रियेतेत्य् एके ॥ (२१।१)