येन जुहोति तद् अग्नौ प्रतितप्य दर्भैः संमृज्य पुनः प्रतितप्य प्रोक्ष्य निधाय दर्भान् अद्भिः संस्पृश्याग्नौ प्रहरति ॥ (१।१)

शम्याः परिध्यर्थे विवाहोपनयनसमावर्तनसीमन्तचौलगोदानप्रायश्चित्तेषु ॥ (२।१)

अग्निं परिषिञ्चत्य् अदिते ऽनुमन्यस्वेति दक्षिणतः प्राचीनम् अनुमते ऽनुमन्यस्वेति पश्चाद् उदीचीनं सरस्वते ऽनुमन्यस्वेत्य् उत्तरतः प्राचीनं देव सवितः प्रसुवेति समन्तम् ॥ (३।१)

पैतृकेषु समन्तम् एव तूष्णीम् ॥ (४।१)

इध्मम् आधायाघाराव् आघारयति दर्शपूर्णमासवत् तूष्णीम् ॥ (५।१)

अथाज्यभागौ जुहोत्य् अग्नये स्वाहेत्य् उत्तरार्धपूर्वार्धे सोमाय स्वाहेति दक्षिणार्धपूर्वार्धे समं पूर्वेण ॥ (६।१)

यथोपदेशं प्रधानाहुतीर् हुत्वा जयाभ्यातानान् राष्ट्रभृतः प्राजापत्यां व्याहृतीर् विहृताः सौविष्टकृतीम् इत्य् उपजुहोति यद् अस्य कर्मणो ऽत्यरीरिचं यद् वा न्यूनम् इहाकरम् अग्निष्टकृत् स्विष्टकृद् विद्वान् सर्वं स्विष्टं सुहुतं करोतु स्वाहेति ॥ (७।१)

पूर्ववत् परिषेचनम् अन्वमंस्थाः प्रासावीर् इति मन्त्रसंनामः ॥ (८।१)

लौकिकानां पाकयज्ञशब्दः ॥ (९।१)

तत्र ब्राह्मणावेक्षो विधिः ॥ (१०।१)

द्विर् जुहोति द्विर् निमार्ष्टि द्विः प्राश्नात्य् उत्सृत्याचामति निर्लेढीति ॥ (११।१)

सर्वऋतवो विवाहस्य शैशिरौ मासौ परिहाप्योत्तमं च नैदाघम् ॥ (१२।१)

सर्वाणि पुण्योक्तानि नक्षत्राणि ॥ (१३।१)

तथा मङ्गलानि ॥ (१४।१)

आवृतश् च स्त्रीभ्यः प्रतीयेरन् ॥ (१५।१)

इन्वकाभिः प्रसृज्यन्ते ते वराः प्रतिनन्दिताः ॥ (१६।१)