धानाः कुमारान् प्राशयन्ति ॥ (१।१)

एवम् अत ऊर्ध्वं यदशनीयस्य सक्तूनां वैतं बलिं हरेद् आ मार्गशीर्ष्याः ॥ (२।१)

मार्गशीर्ष्यां पौर्णमास्याम् अस्तमिते स्थालीपाकः ॥ (३।१)

अहार्षम् इति बलिमन्त्रस्य संनामः ॥ (४।१)

अत्रैनम् उत्सृजति ॥ (५।१)

अनाहिताग्नेर् आग्रयणम् ॥ (६।१)

नवानां स्थालीपाकं श्रपयित्वाग्रयणदेवताभ्यः स्विष्टकृच्चतुर्थाभ्यो हुत्वा तण्डुलानां मुखं पूरयित्वा गीर्त्वाचम्यौदनपिण्डं संवृत्योत्तरेण यजुषागारस्तूप उद्विद्धेत् ॥ (७।१)

हेमन्तप्रत्यवरोहणम् ॥ (८।१)

उत्तरेण यजुषा प्रत्यवरुह्योत्तरैर् दक्षिणैः पार्श्वैः नवस्वस्तरे संविशन्ति ॥ (९।१)

दक्षिणतः पितोत्तरा मातैवम् अवशिष्टानां ज्येष्ठो ज्येष्ठो ऽनन्तरः ॥ (१०।१)

संहायोत्तराभ्यां पृथिवीम् अभिमृशन्ति ॥ (११।१)

एवं संवेशनादि त्रिः ॥ (१२।१)

ईशानाय स्थालीपाकं श्रपयित्वा क्षैत्रपत्यं च प्राचीम् उदीचीं वा दिशम् उपनिष्क्रम्य स्थण्डिलं कल्पयित्वाग्नेर् उपसमाधानादि ॥ (१३।१)

अपरेणाग्निं द्वे कुटी कृत्वा ॥ (१४।१)