प्राग्घोमात् प्रदक्षिणम् अग्निं कृत्वा यथास्थानम् उपविश्यान्वारब्धायाम् उत्तरा आहुतीर् जुहोति सोमाय जनिविदे स्वाहेत्य् एतैः प्रतिमन्त्रम् ॥ (१।१)

अथैनाम् उत्तरेणाग्निं दक्षिणेन पदाश्मानम् आस्थापयत्य् आतिष्ठेति ॥ (२।१)

अथास्या अञ्जलाव् उपस्तीर्य द्विर् लाजान् ओप्याभिघारयति ॥ (३।१)

तस्याः सोदर्यो लाजान् आवपतीत्य् एके ॥ (४।१)

जुहोति यं नारीति ॥ (५।१)

उत्तराभिस् तिसृभिः प्रदक्षिणम् अग्निं कृत्वाश्मानम् आस्थापयति यथा पुरस्तात् ॥ (६।१)

होमश् चोत्तरया ॥ (७।१)

पुनः परिक्रमणम् ॥ (८।१)

आस्थापनम् ॥ (९।१)

होमश् चोत्तरया ॥ (१०।१)

पुनः परिक्रमणम् ॥ (११।१)

जयादि प्रतिपद्यते ॥ (१२।१)

परिषेचनान्तं कृत्वोत्तराभ्यां योक्त्रं विमुच्य तां ततः प्र वा वाहयेत् प्र वा हारयेत् ॥ (१३।१)

समोप्यैतम् अग्निम् अनुहरन्ति ॥ (१४।१)

नित्यः ॥ (१५।१)

धार्यः ॥ (१६।१)

अनुगतो मन्थ्यः ॥ (१७।१)

श्रोत्रियागाराद् वाहार्यः ॥ (१८।१)

उपवासश् चान्यतरस्य भार्यायाः पत्युर् वा ॥ (१९।१)

अनुगते ऽपि वोत्तरया जुहुयान् नोपवसेत् ॥ (२०।१)

उत्तरा रथस्योत्तम्भनी ॥ (२१।१)

वाहाव् उत्तराभ्यां युनक्ति दक्षिणम् अग्रे ॥ (२२।१)

आरोहतीम् उत्तराभिर् अभिमन्त्रयते ॥ (२३।१)

सूत्रे वर्त्मनोर् व्यवस्तृणात्य् उत्तरया नीलं दक्षिणस्यां लोहितम् उत्तरस्याम् ॥ (२४।१)

ते उत्तराभिर् अभियाति ॥ (२५।१)

तीर्थस्थाणुचतुष्पथव्यतिक्रमे चोत्तरां जपेत् ॥ (२६।१)