मासिश्राद्धस्यापरपक्षे यथोपदेशं कालाः ॥ (१।१)

शुचीन् मन्त्रवतो योनिगोत्रमन्त्रासम्बन्धान् अयुग्मांस् त्र्यवरान् अनर्थावेक्षो भोजयेत् ॥ (२।१)

अन्नस्योत्तराभिर् जुहोति ॥ (३।१)

आज्याहुतीर् उत्तराः ॥ (४।१)

एतद् वा विपरीतम् ॥ (५।१)

सर्वम् उत्तरैर् अभिमृशेत् ॥ (६।१)

कॢप्तान् वा प्रतिपूरुषम् ॥ (७।१)

उत्तरेण यजुषोपस्पर्शयित्वा ॥ (८।१)

भुक्तवतो ऽनुव्रज्य प्रदक्षिणीकृत्य द्वैधं दक्षिणाग्रान् दर्भान् संस्तीर्य तेषूत्तरैर् अपो दत्त्वोत्तरैर् दक्षिणापवर्गान् पिण्डान् दत्त्वा पूर्ववद् उत्तरैर् अपो दत्त्वोत्तरैर् उपस्थायोत्तरयोदपात्रेण त्रिः प्रसव्यं परिषिच्य न्युब्ज्य पात्राण्य् उत्तरं यजुर् अनवानं त्र्यवरार्ध्यम् आवर्तयित्वा प्रोक्ष्य पात्राणि द्वन्द्वम् अभ्य् उदाहृत्य सर्वतः समवदायोत्तरेण यजुषाशेषस्य ग्रासावरार्ध्यं प्राश्नीयात् ॥ (९।०)

या माघ्याः पौर्णमास्या उपरिष्टाद् व्यष्टका तस्याम् अष्टमी ज्येष्ठया सम्पद्यते ताम् एकाष्टकेत्य् आचक्षते ॥ (१०।१)

तस्याः सायम् औपकार्यम् ॥ (११।१)

अपूपं चतुःशरावं श्रपयति ॥ (१२।१)

अष्टाकपाल इत्य् एके ॥ (१३।१)